រថយន្ត Kia Niro 2022 ត្រូវ​បានបង្ហាញ​កាលពី​ខែវិច្ឆិកា ឆ្នាំ២០២១ ដោយវា​មានជម្រើសប្រើ Hybrid, Plug-in Hybrid និងអគ្គិសនី។ នៅក្នុងខែមករា​កន្លងទៅ​ទើប Kia ​លាតត្រដាងលម្អិត​អំពី​លក្ខណៈបច្ចេកទេស និងតម្លៃរបស់ជម្រើស​ Hybrid ហើយថ្មីៗនេះ Kia ក៏ទើបតែទម្លាយចេញលម្អិត version Plug-in Hybrid និង អគ្គិសនី។

Kia Niro Plug-in Hybrid ប្រើម៉ាស៊ីនសាំងចំណុះ ១,៦លីត្រ បំពាក់​ម៉ូទ័រ​អគ្គិសនី ៦២គីឡូវ៉ាត់ ដែល​ផលិតកម្លាំងសេះសរុបដល់ ១៨០សេះ។ អាគុយ​របស់​វាធំជាងស៊េរីមុន ដែលមានទំហំដល់ ១១,១គីឡូវ៉ាត់​ គ្រប់គ្រាន់​សម្រាប់ការបើកចម្ងាយ ៦៥គីឡូម៉ែត្រ។

ចំណែក​ប្រភេទ​អគ្គិសនីវិញ រថយន្តនេះ​ បំពាក់​ម៉ូទ័រអគ្គិសនី​ផលិត​បានកម្លាំង ២០១សេះ និង​កម្លាំង​រមួល ២៥៥ញ៉ូតុនម៉ែត្រ។ អាគុយ​វា​ជាប្រភេទ lithium-ion polymer ទំហំ ៦៤,៨គីឡូវ៉ាត់ម៉ោង ដោយពេលសាកពេញ​ម្តង​ អាចបើកដល់ចម្ងាយ ៤៦៣គីឡូម៉ែត្រ។ បើសាកជាមួយដុំសាកលឿន គឺចំណាយប្រហែល ៤៣នាទី ក្នុងការសាកពី ១០ ដល់ ៨០%។

សម្រាប់ Kia Niro ប្រើ Hybrid វិញគឺវា​បំពាក់​ម៉ាស៊ីន​ទាក់បូចំណុះ ១,៦លីត្រ  ដំណើរការ​ជាមួយ​ម៉ូទ័រអគ្គិសនី ៣២គីឡូវ៉ាត់ អាគុយទំហំ ១,៥៦គីឡូវ៉ាត់ម៉ោង ផលិតបានកម្លាំងសរុប ១៣៩សេះ និងកម្លាំងរមួល ២៥៦ញ៉ូតុនម៉ែត្រ។ ចំពោះការប្រើប្រាស់សាំងគឺជិះ១០០គីឡូម៉ែត្រស៊ីសាំង ៤,៨លីត្រ ប្រសិនបើប្រើកង់ទំហំ ១៦អ៊ីញ ឬ ៥,២លីត្រ/១០០គីឡូម៉ែត្រ ប្រសិន​បើ​ប្រើ​កង់ទំហំ ១៨អ៊ីញ។

រថយន្ត Kia Niro នេះ មានការឌីហ្សាញ​ដ៏ស្រស់ស្អាត​ទំនើប​ទាក់ទាញ​ ដោយ​បំពាក់​ចង្កៀង​មុខធំបញ្ឈរ LED និង​អំពូល Daytime running lights។ ប៉ាណា ត្រូវបាន​បែងចែក​ជាពីរផ្នែក ក្នុងនោះ​ផ្នែកលើគឺ​តូច និង​ខាងក្រោមគឺធំ ហើយ​មាន​អំពូលកាត់អ័ព្ទ​នៅជាប់ជាមួយ។

ផ្នែក​ខាងក្នុង​រថយន្ត SUV នេះ បំពាក់​កុងទ័រឌីជីថលភ្ជាប់គ្នា​ជាមួយ​ប្រព័ន្ធកម្សាន្ត Touchscreen មាន​ទំហំសរុប ១០,២៥អ៊ីញ។ ដៃចង្កូត​មានប៊ូតុងចុចបញ្ជា ហើយមាន​អេក្រង់ Head-Up Display ដែលបង្ហាញ​ព័ត៌មាន​ផ្សេងៗដល់​អ្នកបើកបរ​ផ្ទាល់។ ប្រព័ន្ធម៉ាស៊ីន​ត្រជាក់​ ត្រូវបានបញ្ជាដោយអេក្រង់​ touchscreen របស់វាផ្ទាល់ បំពាក់​ប្រព័ន្ធបន្សុទ្ធខ្យល់ និង​មាន​ទ្រនាប់ចង្កឹះលេខ៕