ក្រុមហ៊ុន Toyota បានប្រកាសចេញផ្សាយរថយន្តស្ព័រម៉ូដែលថ្មីសម្រាប់ឆ្នាំ២០២៦ គឺ Toyota GR86 Yuzu Special Edition ដែលជាការគោរពដល់ប្រវត្តិសាស្ត្រនៃរថយន្ត Scion FR-S ដែលជារថយន្តស៊េរីមុនរបស់ខ្លួន។ Special Edition នេះត្រូវបានរចនាឡើងដើម្បីរំលឹកដល់ Scion FR-S Release Series 1.0 ដែលបានចេញលក់ក្នុងឆ្នាំ២០១៤ ដោយនាំមកនូវពណ៌លឿង Yuzu Yellow ដ៏ទាក់ភ្នែក និងការធ្វើឱ្យប្រសើរឡើងនូវសមត្ថភាពបើកបរ។

រថយន្ត GR86 Yuzu Special Edition នេះនឹងត្រូវផលិតចំនួនត្រឹមតែ ៨៦០ គ្រឿងប៉ុណ្ណោះសម្រាប់ទីផ្សារអាមេរិកខាងជើង ហើយត្រូវបានគ្រោងនឹងដាក់លក់នៅតាមហាងលក់រថយន្ត Toyota នៅរដូវស្លឹកឈើជ្រុះ ឆ្នាំ២០២៥។ ការប្រកាសនេះបានធ្វើឡើងក្នុងព្រឹត្តិការណ៍ Grand Prix នៅទីក្រុង Long Beach សហរដ្ឋអាមេរិក ដែលបង្ហាញពីការប្តេជ្ញាចិត្តរបស់ Toyota ក្នុងការបន្តផលិតរថយន្តស្ព័រដែលមានភាពរស់រវើក និងទាក់ទាញសម្រាប់អ្នកចូលចិត្តបើកបរ។

កំណែ Yuzu Special Edition នេះផ្អែកលើម៉ូដែល GR86 Premium ដោយបន្ថែមនូវកង់ទំហំ ១៨ អ៊ីញពណ៌ខ្មៅ (matte black) ប្រព័ន្ធហ្វ្រាំង Brembo និងប្រព័ន្ធ SACHS ដែលធ្វើឱ្យវាមានស្ថេរភាព និងភាពរហ័សរហួនកាន់តែប្រសើរ។ អ្នកទិញក៏អាចជ្រើសរើសបន្ថែមគ្រឿងបន្លាស់ដូចជា បំពង់ផ្សែងបួនជ្រុង (quad exhaust) ដែលមានស្លាក GR និងគ្រឿងតុបតែងខាងក្រៅ (body kit) ដើម្បីបង្កើនភាពទាក់ទាញ និងសម្លេងម៉ាស៊ីនដ៏ពិរោះ។

ទោះបីជាមានការធ្វើឱ្យប្រសើរឡើងផ្នែករូបរាង និងសមត្ថភាពបើកបរក៏ដោយ ម៉ាស៊ីនរបស់ GR86 Yuzu នៅតែប្រើម៉ាស៊ីន boxer ៤ស៊ីឡាំង ទំហំ ២,៤ លីត្រ ដែលផលិតកម្លាំង ២២៨ សេះ និងកម្លាំងបង្វិល (torque) ១៨៤ ផោន-ហ្វីត ដូចម៉ូដែលស្តង់ដារ។ អ្នកបើកបរអាចជ្រើសរើសប្រអប់លេខដៃ ៦ ល្បឿន ឬប្រអប់លេខអូតូ ៦ ល្បឿន ដែលផ្តល់ភាពបត់បែនសម្រាប់បទពិសោធន៍បើកបរ។ Toyota ក៏បានធ្វើបច្ចុប្បន្នភាពការកំណត់ម៉ាស៊ីន (throttle mapping) ដើម្បីឱ្យការប្តូរលេខកាន់តែរលូន ជាពិសេសសម្រាប់អ្នកចូលចិត្តប្រអប់លេខដៃ។

នៅផ្នែកខាងក្នុង កៅអីធ្វើពី Ultrasuede ពណ៌ខ្មៅ ហើយត្រូវបានតុបតែងដោយថ្នេរពណ៌លឿង ដែលផ្គូផ្គងជាមួយនឹងចង្កូត និងដៃហ្វ្រាំងដៃ បង្កើតបរិយាកាសស្ព័រដ៏ទំនើប។ អេក្រង់ Touchscreen ទំហំ ៨ អ៊ីញ ក៏ត្រូវបានរួមបញ្ចូលជាស្តង់ដារសម្រាប់កំណែ Yuzu នេះ ដើម្បីផ្តល់ភាពងាយស្រួល និងការកម្សាន្ត។

Toyota បាននិយាយថា កំណែ Yuzu Special Edition នេះគឺជាការបន្តនៃបេតិកភណ្ឌរបស់ Scion ដែលជាម៉ាករថយន្តរបស់ Toyota ដែលបានបញ្ចប់ការផលិតក្នុងឆ្នាំ២០១៦។ Scion FR-S ធ្លាប់ជារថយន្តស្ព័រដ៏ពេញនិយម ហើយបានបន្តជីវិតរបស់វាក្រោមឈ្មោះ Toyota 86 មុនពេលក្លាយជា GR86 នាពេលបច្ចុប្បន្ន។ ការនាំយកពណ៌ Yuzu Yellow មកវិញ គឺជាការរំលឹកដល់អ្នកគាំទ្រអំពីភាពជោគជ័យនៃម៉ូដែលមុនៗ។

តម្លៃលក់ និងព័ត៌មានលម្អិតបន្ថែមនឹងត្រូវបានប្រកាសនៅចុងឆ្នាំនេះ ប៉ុន្តែអ្នកវិភាគជឿថា កំណែនេះនឹងមានតម្លៃខ្ពស់ជាងម៉ូដែល GR86 Premium ដែលចាប់ផ្តើមពី ៣២,៦០០ ដុល្លារ។ ជាមួយនឹងចំនួនផលិតកម្រិតតិចតួច និងការរចនាដ៏ប្លែក រថយន្ត GR86 Yuzu Special Edition ត្រូវបានគេរំពឹងថានឹងក្លាយជា Collection សម្រាប់អ្នកស្រឡាញ់រថយន្តស្ព័រ៕