តារា YouTube ជនជាតិអាមេរិក លោក Darren Watkins Jr. ដែលត្រូវបានគេស្គាល់ថា IShowSpeed បានធ្វើឱ្យមហាជនភ្ញាក់ផ្អើលក្នុងអំឡុងដំណើរទេសចរណ៍ នៅប្រទេសចិន នៅពេលលោកបានជិះរថយន្ត BYD Yangwang U8 ចូលទៅក្នុងបឹងមួយក្នុងទីក្រុង Shenzhen កាលពីថ្ងៃទី៥ ខែមេសា ឆ្នាំ២០២៥។

ក្នុងអំឡុងការផ្សាយផ្ទាល់នៅលើ YouTube របស់ខ្លួន IShowSpeed បានបង្ហាញពីភាពរំភើប និងភ្ញាក់ផ្អើលនៅពេលរថយន្តប្រភេទ SUV ប្រណីតរបស់ក្រុមហ៊ុន BYD ដែលមានសមត្ថភាពអណ្តែតលើទឹក បានបើកចូលទៅក្នុងបឹង។ រថយន្ត Yangwang U8 នេះត្រូវបានគេស្គាល់ថាអាចអណ្តែតលើទឹកបានរហូតដល់ ៣០ នាទី ដែលជាលក្ខណៈពិសេសមួយដ៏គួរឱ្យចាប់អារម្មណ៍។ Speed បានស្រែកថា «ខ្ញុំមិនជឿទេ! ចិនពិតជាអស្ចារ្យណាស់!» ខណៈដែលរថយន្តនេះបើកឆ្លងកាត់ទឹក។

ព្រឹត្តិការណ៍នេះបានកើតឡើងបន្ទាប់ពី IShowSpeed បានទិញរថយន្ត BYD Yangwang U9 ដែលជារថយន្តអគ្គិសនីទំនើបតម្លៃប្រមាណ ២៥០,០០០ ដុល្លារអាមេរិក ក្នុងទីក្រុង Chongqing កាលពីថ្ងៃទី២ ខែមេសា។ ក្នុងដំណើរទេសចរណ៍ដែលចាប់ផ្តើមតាំងពីថ្ងៃទី២៤ ខែមីនា Speed បានទៅទស្សនាទីក្រុងជាច្រើនដូចជា សៀងហៃ ប៉េកាំង ហុងកុង និង Chongqing មុនពេលមកដល់ Shenzhen។ ការជិះរថយន្តចូលទឹកនេះបានទាក់ទាញចំណាប់អារម្មណ៍យ៉ាងខ្លាំងពីអ្នកតាមដានជាង ៣៨ លាននាក់របស់គេ នៅលើ YouTube។

រថយន្ត BYD Yangwang U8 គឺជាផ្នែកមួយនៃបច្ចេកវិទ្យាទំនើបរបស់ក្រុមហ៊ុន BYD ដែលជាក្រុមហ៊ុនផលិតរថយន្តអគ្គិសនីឈានមុខគេរបស់ចិន។ ក្រុមហ៊ុននេះបានវ៉ាជែងក្រុមហ៊ុន Tesla ក្នុងឆ្នាំ២០២៤ ដោយក្លាយជាក្រុមហ៊ុនផលិតរថយន្តអគ្គិសនីដ៏ធំបំផុតលើពិភពលោក ជាមួយនឹងការលក់ជាង ៤,៣ លានគ្រឿងកាលពីឆ្នាំមុន។ ការបង្ហាញសមត្ថភាពរបស់ Yangwang U8 នៅចំពោះមុខ IShowSpeed ត្រូវបានគេមើលឃើញថាជាឱកាសដ៏ល្អមួយសម្រាប់ BYD ក្នុងការផ្សព្វផ្សាយបច្ចេកវិទ្យារបស់ខ្លួនទៅកាន់ទស្សនិកជនអន្តរជាតិ។

អ្នកវិភាគបាននិយាយថា ដំណើរទស្សនកិច្ចរបស់លោក IShowSpeed នៅចិនបានជួយបង្ហាញពីភាពជឿនលឿននៃបច្ចេកវិទ្យារថយន្តចិន ជាពិសេសនៅពេលដែលរថយន្តទាំងនេះមិនទាន់អាចនាំចូលទៅសហរដ្ឋអាមេរិកបានដោយសារឧបសគ្គផ្នែកពន្ធគយ។ ទោះជាយ៉ាងណា ការផ្សាយផ្ទាល់របស់ តារា YouTube រូបនេះបានធ្វើឱ្យអ្នកមើលរាប់លាននាក់បានឃើញសមត្ថភាពដ៏អស្ចារ្យនៃរថយន្ត BYD ដែលអាចបើកបរលើទឹក។

ដំណើរទេសចរណ៍របស់ IShowSpeed នៅចិននៅតែបន្តទាក់ទាញការចាប់អារម្មណ៍ ខណៈដែលរូបគេ បានបង្ហាញពីបទពិសោធន៍ជាច្រើន ចាប់ពីការជិះ «រថយន្តហោះ» EHang EH216-S រហូតដល់ការសាកល្បងរថយន្តទំនើបៗរបស់ចិន។ ព្រឹត្តិការណ៍នេះបានបន្សល់ទុកនូវចំណាប់អារម្មណ៍ជាវិជ្ជមានចំពោះបច្ចេកវិទ្យារថយន្តចិនក្នុងចំណោមអ្នកគាំទ្ររបស់រូបគេ នៅទូទាំងពិភពលោក៕