ក្រុមហ៊ុន Mazda ទើបតែបាន​បង្ហាញ​នូវរថយន្ត​ម៉ូដែលថ្មីរបស់ខ្លួន​ជាប្រភេទ​ crossover SUV គឺម៉ូដែល CX-50 ដែល​ខ្ចីរូបរាងពី CX-5 ដើម្បី​ត្រៀម​ប្រជែង​នឹង​រថយន្តប្រភេទដូចគ្នានេះដូចជា Honda CR-V និង Toyota RAV4 ជាដើម។

រថយន្ត Mazda CX-50 ប្រើ​ម៉ាស៊ីន Skyactiv-G ចំណុះ ២,៥លីត្រ ផលិត​បាន​កម្លាំង ១៨៧សេះ និង​កម្លាំងរមួល ២៥២ញូ៊វតុនម៉ែត្រ។ វាក៏មាន​ជម្រើស​ម៉ាស៊ីន Skyactiv-G 2.5 Turbo ផលិត​បាន​កម្លាំង ២៥០សេះ និងកម្លាំងរមួល ៤៣៤ញូ៊វតុនម៉ែត្រ​ផងដែរ។

រថយន្ត​ម៉ូដែល​ថ្មីនេះ ត្រូវបាន​បំពាក់​បច្ចេកវិទ្យាប៉ុង២ i-Activ និង​ប្រព័ន្ធ Intelligent Drive Master ដែល​ជួយ​សម្រួល​ដល់ការ​បើកបរ ក្នុងស្ថានភាព​ផ្លូវ​ផ្សេងៗ​ដែលអាច​ដាក់ម៉ូដបាន​ដូចជា normal, sport, towing និង​ off-road។

ចំពោះ​ការឌីហ្សាញ​ផ្នែក​ខាងក្នុងរថយន្ត CX-50 មិនខុសពី​រថយន្ត​ Mazda ទូទៅ​នោះទេ ដូចជា ដៃចង្កូត​ កុងទ័រឌីជីថល និង​មាន​អេក្រង់​ដាក់ជាប់​នៅលើតាប្លូ​ នៅចំកណ្តាល និង​មានដៃទ្វាស្បែក និងពូក​ស្បែក​ ព្រមទាំង​មានជម្រើស​ដំបូលកញ្ចក់ (sunroof) បា៉រ៉ាណូមិក​ផងដែរ។

Mazda គ្រោង​នឹង​ផលិត​រថយន្ត​នេះ​ និង​ចេញ​លក់​នៅឆ្នាំ​២០២២ ដោយតម្លៃ​គេប៉ាន់ស្មានថា នឹងខ្ពស់ជាង CX-5 ដែលមានតម្លៃប្រមាណ ២៧ ០០០ដុល្លារ ដូច្នេះ CX-50 អាចនឹងចូលខ្ទង់ ៣ម៉ឺនដុល្លារ៕