ក្រុមហ៊ុន Nissan បាន​បញ្ចេញ​រថយន្ត​ម៉ូដែល​ពិសេស​ថ្មី គឺ Juke Kiiro Special Edition ដែល​វាជាផ្នែក​មួយ​នៃកិច្ចសហការ​ជាមួយ​ភាពយន្ត The Batman ដោយភាពយន្តនេះ​នឹង​ចាក់បញ្ចាំង​នៅអំឡុងខែមីនាខាងមុខ។

រថយន្តនេះ​ត្រូវបាន​ឌីហ្សាញ​ជាពណ៌ប្រផេះ​ដូចមនុស្សប្រជៀវ មាន​ឆ្នូតហាយឡាយពណ៌លឿងនៅកាងមុខក្រោយ​ និង​ចំហៀងទ្វារ​ខាងក្រោម ដែលតួខ្លួនវា​ជាសេរ៉ាមិច ជាមួយនឹង​កង់​ទំហំ ១៩អ៊ីញ។

ចំណែក​ផ្នែកខាងក្នុង​ មាន​កៅអី​ពូកស្បែកពិសេសពណ៌ខ្មៅ ដែលមានថ្នេរប្រផេះ និងលឿង។ ប្រព័ន្ធកម្សាន្ត Touchscreen ទំហំ ៨អ៊ីញ ដែលប្រើប្រាស់​ NissanConnect និង​អាចភ្ជាប់​ជាមួយ Android Auto និង​ Apple Carplay ព្រមទាំង​មុខងារ Google Assistant/Amazon Alexa compatibilty, plus TomTom Maps & Live Traffic។

Nissan Juke នេះ ត្រូវបានអភិវឌ្ឍ​លើគ្រោងឆ្អឹង CMF-B។ វា​ប្រើម៉ាស៊ីនទាក់បូចំណុះ ១,០លីត្រ ផលិតបាន​កម្លាំង ១១២សេះ និងកម្លាំងរមួល ២០០ញ៉ូតុនម៉ែត្រ រត់ប៉ុងមុខ ជាមួយប្រអប់លេខដៃ​៦វគ្គ។

Nissan នឹង​ចេញលក់​រថយន្ត Juke Kiiro Special Edition តែ៥ពាន់គ្រឿងប៉ុណ្ណោះ ក្នុងនោះ ៥០០គ្រឿង​សម្រាប់​ទីផ្សារអង់គ្លេស ដោយគ្រោង​ដាក់នៅ​ចុងខែកុម្ភៈខាងមុខ ប៉ុន្តែមិនទាន់បាន​បញ្ជាក់តម្លៃនៅឡើយ។ រថយន្ត Nissan Juke ដែល​ដាក់លក់នៅអង់គ្លេសបច្ចុប្បន្ននេះ គឺមាន​តម្លៃចាប់ពី ២៥ ៩៨០ ដល់ ៣៤ ៧៧៥ដុល្លារ៕