- 2021-01-12 02:25:46
- ព័ត៌មាន
ប្រើសុទ្ធតែក្បាច់បង្ខំ ឥឡូវមនុស្សរាប់លាននាក់នាំគ្នាប្ដូរទៅប្រើ Telegram!
- 2021-01-12 02:25:46
- ចំនួនមតិ 0 | ចំនួនចែករំលែក 0
ប្រើសុទ្ធតែក្បាច់បង្ខំ ឥឡូវមនុស្សរាប់លាននាក់នាំគ្នាប្ដូរទៅប្រើ Telegram!
ចន្លោះមិនឃើញ
អ្នកប្រើប្រាស់ WhatsApp ជាច្រើនលាននាក់បានធ្វើការបោះបង់ចោលកម្មវិធីផ្ញើសារនេះ មុនការអាប់ដេតគោលការណ៍ថ្មីដែលបង្ខំឲ្យអ្នកប្រើប្រាស់ចែករំលែកព័ត៌មានរបស់ពួកគេជាមួយ Facebook។
ការអាប់ដេតរបស់ WhatsApp ដែលនឹងមកដល់នៅថ្ងៃទី៨ ខែកុម្ភៈខាងមុខនេះ នឹងប៉ះពាល់ដល់អ្នកប្រើប្រាស់ទាំងអស់ដែលមិនមែនរស់នៅក្នុងតំបន់អឺរ៉ុប និងចក្រភពអង់គ្លេស ដែលតំបន់ពីរនេះមានច្បាប់តឹងរ៉ឹងការពារព័ត៌មានរបស់អ្នកប្រើ។
អ្នកប្រើប្រាស់នៅក្រៅពីតំបន់ពីរខាងលើនឹងតម្រូវផ្ដល់សិទ្ធសម្រាប់ឲ្យ Facebook ចូលយកព័ត៌មានរបស់ពួកគេ មានរួមបញ្ចូលលេខទូរសព្ទ និងព័ត៌មានអំពីការទំនាក់ទំនងរបស់ពួកគេជាមួយអ្នកដទៃ។ ទាល់តែព្រមផ្ដល់សិទ្ធទើបពួកគេអាចបន្តប្រើប្រាស់ WhatsApp បានតទៀត។
ការទាមទារនេះនឹងត្រូវអនុវត្តន៍លើគ្រប់អ្នកប្រើប្រាស់ទាំងអស់ ទោះបីជាពួកគេមិនមានគណនី Facebook ក្ដី។
ពេល WhatsApp បានប្រកាសអំពីផែនការនៃការផ្លាស់ប្ដូរនេះ បានធ្វើឲ្យ Telegram មានកំណើនចំនួនទាញយកជិត ១,៧លានដងភ្លាមៗ ហើយកម្មវិធី Signal (ជាកម្មវិធីផ្ញើសារដែលលោក Elon Musk ណែនាំឲ្យប្រើប្រាស់) មានកំណើនចំនួនទាញយក ១,២លានដង។
ដោយឡែកចំនួនទាញយកកម្មវិធី WhatsApp ក្នុងរយៈពេល៧ថ្ងៃដំបូងនៃឆ្នាំ ២០២១ មានការធ្លាក់ចុះចំនួន ១៣% មកនៅត្រឹម ១០,៣លានដង ប្រសិនបើធៀបនឹងអំឡុងពេល៧ថ្ងៃមុន។
ការសម្រេចចិត្តរបស់ WhatsApp នាពេលនេះគឺខុសគ្នាទាំងស្រុង ប្រៀបនឹងពេលដែល Facebook ទើបទិញ WhatsApp ដំបូងក្នុងឆ្នាំ ២០១៤ ក្នុងទំហំទឹកប្រាក់ ១៩ពាន់លានដុល្លារ។ ពេលនោះ WhatsApp បានធានាថាទិន្នន័យរបស់អ្នកប្រើនឹងបន្តនៅជាឯកជន ហើយមិនចែករំលែកជាមួយ Facebook នោះទេ។ ការផ្លាស់ប្ដូរគោលការណ៍នេះ បានចាប់ផ្ដើមលេចចេញដំបូងកាលពីឆ្នាំ ២០១៦ ពេលដែល WhatsApp ចាប់ផ្ដើមចែករំលែកទិន្នន័យជា Facebook ជាលក្ខណៈ Default ដែលពេលនោះអ្នកប្រើប្រាស់អាចមានសិទ្ធបិទមិនឲ្យមានការចែករំលែកបាន។
យ៉ាងណាក្ដីនៅថ្ងៃទី៨ ខែកុម្ភៈ ខាងមុខនេះ អ្នកប្រើប្រាស់ WhatsApp នឹងមិនមានជម្រើសអ្វីនោះឡើយ គឺត្រូវតែទទួលយកការផ្លាស់ប្ដូរដែលតម្រូវឲ្យមានការចែករំលែកទិន្នន័យរបស់ខ្លួនជាមួយ Facebook ប្រសិនបើពួកគេចង់ប្រើប្រាស់ WhatsApp ជាបន្ត៕