• 2019-03-19 04:08:22
  • ផលិតផលថ្មី

ស្មាតហ្វូន​តម្លៃ ១០៤ ដុល្លារ ប៉ុន្តែ​សមត្ថភាព​មិន​លំ​ៗ

  • 2019-03-19 04:08:22
  • ចំនួនមតិ 0 | ចំនួនចែករំលែក 5

ចន្លោះមិនឃើញ

Xiaomi Redmi 7 បាន​លេច​វត្តមាន​ជា​ផ្លូវ​ការ ក្រោយ​ពី​បាន​លេច​ធ្លាយ​ព័ត៌មាន​ជា​ច្រើន​ហូរហែ​នា​ពេល​កន្លង​មក។ Redmi 7 ជា​ស្មាតហ្វូន​កម្រិត​ធូរ​ថ្លៃ ដែល​មាន​តម្លៃ​ចាប់​ពី​ប្រមាណ ១០៤ ដុល្លារ នៅ​ទីផ្សារ​ប្រទេស​ចិន។

Redmi 7 មាន​បំពាក់​បន្ទះ​ឈីប​ Snapdragon 632 (មាន​ CPU បួន​គ្រាប់​កម្លាំង​ខ្លាំង និង បួន​គ្រាប់​សន្សំសំចៃ​ថាមពល), មាន RAM ទំហំ ២ GB ឬ ៤ GB, អង្គ​ផ្ទុក​ទំហំ ១៦ GB ដល់ ៦៤ GB អាច​បន្ថែម​ទំហំ​តាម​មេមូរី​កាត។ វា​ក៏​មាន​ថ្ម​ទំហំ ៤០០០ mAh, អេក្រង់​ទំហំ ៦,២៦ អ៊ីញ​ កម្រិត HD+ និង​អាច​ធន់​នឹង​ទឹកភ្លៀង ឬ ទឹក​សាច​បាន​ផង​ដែរ។

ស្មាតហ្វូន Xiaomi ថ្មី​នេះ​មាន​បំពាក់​កាមេរ៉ា​ពីរ​គ្រាប់​នៅ​ខាង​ក្រោយ ដែល​កាមេរ៉ា​មេ​មាន​កម្រិត ១២ MP ហើយ​កាមេរ៉ា​មួយ​ទៀត​សម្រាប់​វាស់​ជម្រៅ​រូបភាព​មាន​កម្រិត ២ MP។ ចំណែក​កាមេរ៉ា​ Selfie មាន​កម្រិត ៨ MP ដែល​ស្ថិត​នៅ​ទីតាំង​ក្បាល​ឆក​តំណក់​ទឹក ហើយ​កាមេរ៉ា​នេះ​ក៏​អាច​ប្រើ​សម្រាប់​ស្កេន​មុខ​ដើម្បី​ដោះ​សោ​បាន​​ផង​ដែរ។

​​​មុខងារ​ផ្សេង​ទៀត​លើ Redmi 7 មាន​ដូច​ជា​រន្ធ​ដោត​កាស​ 3.5 mm និង​មាន​ទ្រនាប់​ស្កេន​ម្រាម​ដៃ​នៅ​ផ្នែក​ខាង​ក្រោយ។ Redmi 7 នេះ​មាន​តម្លៃ​ចាប់​ពី​ប្រមាណ​ ១០៤ ដុល្លារ (RAM ២ GB/ROM ១៦ GB), ១១៩ ដុល្លារ (RAM ៣ GB/ROM ៣២ GB) និង​ ១៤៩ ដុល្លារ (RAM ៤ GB/ROM ៦៤ GB) ជា​តម្លៃ​លើ​ទីផ្សារ​ក្នុង​ស្រុក៕

ចុចអាន៖

ប្រភព៖ Androidauthority ប្រែ​សម្រួល៖ សុខហេង

មតិយោបល់