- 2015-04-21 22:00:12
- ព័ត៌មាន
មិនមែនជារឿងថ្មី ម្ចាស់ហាងអ៊ីនធឺណិតនិយាយពីអាជីវកម្មប្រឈមការដួលរលំ
- 2015-04-21 22:00:12
- ចំនួនមតិ 0 | ចំនួនចែករំលែក 0
មិនមែនជារឿងថ្មី ម្ចាស់ហាងអ៊ីនធឺណិតនិយាយពីអាជីវកម្មប្រឈមការដួលរលំ
ចន្លោះមិនឃើញ
នៅក្នុងកំឡុងឆ្នាំ ២០០៥ ហាងផ្គត់ផ្គង់សេវាអ៊ីនធឺណិតមានការពេញនិយមនិងបើករីកស្គុសស្គាយ។ ទើបតែប៉ុន្មានឆ្នាំចុងក្រោយនេះទេ ដែលសង្កេតឃើញថាហាងប្រភេទនេះហាក់មានសភាពស្ងប់ស្ងាត់ជាងពីមុន ដែលហាងមួយចំនួនក៏បានឈានដល់បិទទ្វារជាបណ្តើរៗដោយសារគ្មានអតិថិជន។
មានមូលហេតុជាច្រើនដែលធ្វើឲ្យអាជីវកម្មមួយនេះមិនអាចបន្តទៅមុខទៀតបាន ដែលមូលហេតុទាំងនោះមានដូចជា ការប្រកួតប្រជែងពីសំណាក់ក្រុមហ៊ុនផ្គត់ផ្គង់សេវាកម្មអ៊ីនធឺណិតតាមផ្ទះ និងក្រុមហ៊ុនទូរសព្ទចល័ត។ នេះបើតាមសម្ដីរបស់លោកសាម ឌី ដែលជាម្ចាស់ហាងអ៊ីនធឺណិតមួយកន្លែង។
លោកបានបន្តថា ក្រុមហ៊ុនផ្គត់ផ្គង់សេវាអ៊ីនធឺណិតតាមផ្ទះមានការកើនឡើងជាលំដាប់ពីមួយថ្ងៃទៅមួយថ្ងៃ ហើយវាមានតម្លៃទាបចំណែកឯគុណភាពក៏អាចទទួលយកបានផងដែរ ដោយចំណាយត្រឹម១២ដុល្លារប៉ុណ្ណោះអាចទទួលបានការប្រើប្រាស់អ៊ីនធឺណិតឥតកំណត់ ហើយល្បឿនលឿនទៀតផង។ ដោយឡែកក្រុមហ៊ុនទូរសព្ទចល័តវិញក៏មានការប្រើប្រាស់យ៉ាងកកកុញពីស្រទាប់យុវវ័យដោយសារតែវាមានភាពងាយស្រួល និងរហ័សសម្រាប់សិស្សានុសិស្សធ្វើការសិក្សាស្រាវជ្រាវមេរៀនរបស់ពួកគេ ជាពិសេសនោះគឺការប្រើប្រាស់បណ្ដាញសង្គម Facebook។
ម្ចាស់ហាងរូបនេះក៏បានបញ្ជាក់ផងដែរថា អាជីវកម្មរបស់លោកសព្វថ្ងៃគឺស្ទើរតែឈានដល់ការបិទទ្វារទៅហើយ ប៉ុន្តែចេះតែបន្តបើកដោយត្រដាបត្រដួស ដោយសារមិនដឹងប្រកបរបរអ្វីផ្សេងពីនោះ។
បើក្រឡេកទៅមើលរយៈពេលដប់ឆ្នាំមុនការប្រើប្រាស់អ៊ីនធឺណិតតាមហាងមានការពេញនិយមពីអ្នកប្រើប្រាស់គ្រប់ស្រទាប់ ដោយហាងនីមួយៗស្ទើរតែគ្មានសល់ចន្លោះទំនេរទៅហើយ អ្នកខ្លះមានលុយហើយនៅមិនអាចប្រើប្រាស់បានទៀត។ ហើយភាគច្រើនគឺពួកគេនិយមលេងChat MIRC Yahoo Messengerនិងការទូរសព្ទទៅក្រៅប្រទេសជាដើម។
អត្ថបទ៖ ហៃ សុខហេង
