ថ្ងៃចូលឆ្នាំខ្មែរប្រពៃណីជាតិកាន់តែខិតចូលមកដល់ ប្រជាជនខ្មែរទាំងប្រុសស្រីតែងតែត្រៀមខ្លួនក្នុងការធ្វើដំណើរកំសាន្តទៅកាន់ទីជិតឆ្ងាយជាដើម។ ហើយដូចដែលដឹងស្រាប់ខែចេត្រចូលឆ្នាំ កម្តៅព្រះអាទិត្យគឺមិនធម្មតាឡើយ ដូច្នេះហើយបើមានវែនតាខ្មៅមួយសម្រាប់ពាក់ ប្រហែលជាជួយសុខភាពភ្នែកបានច្រើន ហើយទន្ទឹមនឹងនោះ បើអាចប្រើស្តាប់ចម្រៀង ឬលើកទូរសព្ទពេលបើកបរទៀតនោះគឺកាន់តែល្អ។

ថ្ងៃនេះ Sabay នឹងបង្ហាញពីវែនតាខ្មៅវៃឆ្លាត ៣ម៉ូឌែល ដែលមានសមត្ថភាពទប់ពន្លឺ UV ផង និងអាចប្រើជំនួសកាសសម្រាប់និយាយទូរសព្ទ ឬអាចស្តាប់បទចំរៀងបាន ដោយមិនខ្លាចប៉ូលិសហៅ។ អញ្ចឹងយើងទៅតាមដានទាំងអស់គ្នា៖

១. SoundPeats Frames S

SoundPeats Frames S ជាវែនតាឆ្លាតវៃពាក់ការពារពន្លឺថ្ងៃ ហើយអាចកំដរអារម្មណ៍ ជាមួយតន្ត្រី បានយ៉ាងពិរោះ និងអាចសន្ទនាទូរសព្ទបានទៀតផង។ លក្ខណៈសម្បត្តិរបស់វាគឺ ជាវែនតាខ្មៅ បំពាក់មកដោយ Speaker និង Mic មិនជ្រាបទឹកកម្រិត IPx5 អាចយកទៅលេងជះទឹកបានថែមទៀត។ ប្រព័ន្ធ Bluetooth 5.0 ភ្ជាប់ជាមួយទូរសព្ទច្រើនក្នុងពេលតែមួយ និងបានទាំង Android និង iPhone ហើយនៅលើខ្លួនវែនតាមានប៊ូតុង Touch ស្គាល់សម្ពាធសម្រាប់ការបញ្ជាមកទូរសព្ទ មិនខ្លាចការប៉ះច្រលំដោយចៃដន្យនោះទេ។ ចំពោះកម្លាំងថ្មអាចប្រើប្រាស់ស្តាប់ចម្រៀងជាប់ ៥ម៉ោង។ SoundPeats Frames S ដាក់លក់ក្នុងស្រុកយើងតម្លៃ ៥៩ដុល្លារ។

២. RAZER Anzu Smart Glasses

RAZER Anzu Smart Glasses ក៏មិនខុសពីវែនតាខាងលើដែរ ប៉ុន្តែកញ្ចក់របស់វាពិសេសជាងបន្តិចដោយមានសមត្ថភាពកាត់បន្ថយពន្លឺពណ៌ខៀវបាន ៣០ភាគរយ និងមានកញ្ជក់ជាប្រភេទ Polarized កាត់បន្ថយចំណាំងបានល្អ សមនឹងប្រើនាខែចេត្រចូលឆ្នាំមែនទែន។ វែនតានេះ មានល្បឿនតបមកវិញលឿនជាងគេ ពោលគឺយឺតជាងជាក់ស្តែងតែ 60ms ប៉ុណ្នោះ។ ការបញ្ជានៅលើវែនតា មានពីរជម្រើសដោយទី១បញ្ជាដោយការប៉ះ និងទីពីរបញ្ជាដោយសំឡេង។ ចំណែកកម្លាំងថ្មវិញអាចប្រើបានជាប់ ៥ម៉ោង ហើយវែនតាទាំងមូលក៏មានអាវក្រោះការពារទឹកកម្រិត IPx4 ផងដែរ។ RAZER Anzu Smart Glasses ដាក់លក់ក្នុងស្រុកយើងតម្លៃ ១៩៩ដុល្លារ។

៣. Bose Frame Alto / Rondo

Bose Frame Alto / Rondo ជាវែនតាដែលមានតម្លៃថ្លៃជាងគេក្នុងអត្ថបទនេះ។ លក្ខណៈពិសេសរបស់វាគឺកញ្ចក់វែនតា មានសមត្ថភាពអាច កាត់បន្ថយកាំរស្មី UVA/UVB ដល់ទៅ ៩៩ភាគរយ។ ប្រព័ន្ធសំឡេងរបស់វាក៏ល្អជាងអាពីរខាងលើ ព្រោះជាក់ស្តែង Bose គឺជំនាញក្នុងការផលិតឧបករណ៍សំឡេងស្រាប់តែម្តង។ ចំពោះកម្លាំងថ្មរបស់វាវិញ អាចប្រើជាប់បាន ៣ម៉ោងកន្លះ និងអាចបើកទុកចោលដល់ ១២ម៉ោង។ Bose Frame Alto / Rondo ដាក់លក់ក្នុងស្រុកយើងតម្លៃ ២៦០ដុល្លារ៕