ក្រុមហ៊ុន Yamaha ទើបតែបានបញ្ចេញម៉ូតូម៉ូដែលថ្មីមួយទៀត ហៅថា Yamaha 135LC Fi ស៊េរីឆ្នាំ២០២២ ដែលមានការឌីហ្សាញរូបរាងដូចទៅនឹង Yamaha Exciter បេះបិតតែម្តង។

ម៉ូតូ Yamaha 135LC Fi ថ្មីនេះ ត្រូវបានដាក់លក់តម្លៃប្រហែល ១ ៨៦៥ដុល្លារ សម្រាប់ម៉ូដែលស្តង់ដារ និង តម្លៃ ១ ៩៦០ដុល្លារ សម្រាប់ម៉ូដែល 135LC Fi SE។ គួរឲ្យដឹងដែរថា ម៉ូតូនេះត្រូវបានដាក់លក់ផ្តាច់មុខតែសម្រាប់ទីផ្សារប្រទេសម៉ាឡេស៊ីប៉ុណ្ណោះ។

Yamaha 135LC Fi បំពាក់ម៉ាស៊ីនចំណុះ ១៣៥សេសេ ទំហំ ១ស៊ីឡាំង ជាមួយនឹងប្រព័ន្ធស្អំម៉ាស៊ីន liquid-cooled ហើយប្រើប៊ិចសាំង Fi បង្កើតកម្លាំងបាន ១២,៤សេះ និងកម្លាំងរមួល ១២,២ញ៉ូតុនម៉ែត្រ។ វាមានបំពាក់ធុងសាំងចំណុះ ៤,៦លីត្រ ហើយមានទម្ងន់ខ្លួនសរុប ១០៩គីឡូក្រាម។

ម៉ូតូនេះប្រើប្រព័ន្ធហ្វ្រាំងឌីស (hydraulic disc) ទាំងខាងមុខ និងខាងក្រោយ ជាមួយនឹងកាំកង់ទំហំ ១៧អ៊ីញ។ ក្រៅពីនោះ វាក៏មានបំពាក់កុងទ័រ LCD digital សខ្មៅ, ចង្កៀងមុខ LED និង រន្ធ USB សម្រាប់សាកថ្មទូរសព្ទ ទៀតផង៕