ថ្មីៗនេះក្នុងព្រឹត្តិការណ៍ MWC ក្រុមហ៊ុនយក្សរបស់ចិនមួយឈ្មោះថា TCL បានបញ្ចេញថេប្លេតរបស់ខ្លួនជាច្រើនម៉ូឌែលមកដាក់លក់នៅលើទីផ្សារ។ ថេប្លេតទាំងនោះមានម៉ូឌែលខ្លះបំពាក់ដោយឈីប 5G ហើយតម្លៃរបស់វាគឺថោកសមរម្យតែម្តង។ ថេប្លេតទាំងនោះមានដូចជា៖

១. TCL NxtPaper Max 10

ថេប្លេត TCL NxtPaper Max មានអេក្រង់ទំហំ ១០,៣៦អ៊ីញ មានកម្រិតភាពច្បាស់ FHD ក្រាលដោយប្រភេទកញ្ចក់កាត់ចំណាំងផ្លាត។ អេក្រង់ត្រូវបានរចនាឡើងពិសេសដើម្បីឱ្យការមើលមានអារម្មណ៍ដូចជាកំពុងអានក្រដាស ផ្តល់នូវបទពិសោធន៍នៃការអាន និងការសរសេរកាន់តែប្រសើរ ហើយវាក៏អាចប្រើជាមួយប៊ិកបានផងដែរ។

NxtPaper MAX 10 នឹងមានក្នុងពេលឆាប់ៗនេះក្នុងជម្រើស Wi-Fi សុទ្ធ និងម៉ូឌែល 4G LTE ប៉ុណ្ណោះ ជាមួយនឹងតម្លៃខ្លួនប្រហែល ៣០០ដុល្លារ។

២. TCL Tab 10s 5G

ថេប្លេត TCL Tab 10s 5G គឺដូចទៅនឹង TCL NxtPaper Max 10 ខាងលើនេះដែរ ប៉ុន្តែត្រូវបានកែប្រែបន្ថែមដូចជាមានកម្លាំងម៉ាស៊ីនល្អជាង មានមុខងារ 5G និងមានទំហំផ្ទុកធំជាងមុន។ ចំពោះតម្លៃ និងកាលបរិច្ឆេទវិញ វានឹងដាក់លក់ក្នុងពាក់កណ្តាលឆ្នាំនេះ ជាមួយនឹងតម្លៃ ៣៩០ដុល្លារ។

៣. TCL Tab 10 FHD 4G

ថេប្លេត TCL Tab 10 FHD 4G ជាកុំព្យូទ័រដែលមានតម្លៃសមរម្យជាងបងៗទាំងពីរខាងលើ។ វាបំពាក់ដោយអេក្រង់ ទំហំ១០,១អ៊ីញ ដំណើរការដោយ android 11 ភ្ជាប់ដោយមុខងារតាមដានកុមារផងដែរ។ ចំណែកឯការប្រើអ៊ិនធើណែតវិញ វាអាចប្រើស៊ីម 4G បាន និងដាក់លក់ក្នុងតម្លៃប្រហែល ២០០ដុល្លារ។

៤. TCL Tab 10 HD

ថេប្លេតនេះ TCL Tab 10 HD មានលក្ខណៈដូចគ្នាសឹងទាំងស្រុងនឹង TCL Tab 10 FHD 4G គ្រាន់តែនៅលើនេះវាត្រូវបានកាត់បន្ថយកម្រិតភាពច្បាស់នៅលើអេក្រង់ មកនៅត្រឹម HD។ ចំណែកប្រព័ន្ធប្រតិបត្តិការវិញ វានឹងមានជម្រើស២គឺ Android 11 និង Android 11 Go។ ថេប្លេតនេះនឹងដាក់លក់ក្នុងតម្លៃក្រោម ២០០ដុល្លារ៕