មនុស្សអាចអស់ជីវិត ចុះគណនី (account) អេឡិចត្រូនិករបស់អ្នក តើវានឹងអស់ជីវិតដែរទេ? តើគណនីទាំងនោះនឹងមានអ្វីកើតឡើងក្រោយម្ចាស់លាចាកលោកទៅ? ដើម្បីស្រាយចម្ងល់ទាំងនេះ ចម្លើយគេក៏រកឃើញតាមរយៈម្ចាស់ក្រុមហ៊ុនបច្ចេកវិទ្យាធំៗមានសេវាកម្មបង្កើតនិងរក្សាទុកគណនីអេឡិចត្រូនិករបស់អ្នក ដូចរៀបរាប់ខាងក្រោម ៖

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

១. គណនីរបស់ Facebook ក្រោយអ្នកប្រើស្លាប់ទៅ នឹងមានការលុបគណនីពីក្រុមហ៊ុននោះទេ នៅតែរក្សាទុកការបង្ហោះនានា រួមទាំងឆាតផងដែរ។

ប៉ុន្ដែ Facebook ក៏មានមុខងារ Legacy Contact ដើម្បីផ្ទេរមរតកឌីជីថលទៅកាន់មនុស្សដែលទុកចិត្ត ដើម្បីសម្រេចចិត្តលុបគណនី ឬទុកនៅលើ Facebook បន្ត ដើម្បីជាការចងចាំដល់សមាជិកគ្រួសារផងដែរ។

២. គណនីរបស់ Apple បន្ទាប់ពីអ្នកប្រើប្រាស់ស្លាប់ទៅ ក្រុមហ៊ុននឹងមិនលុបគណនី iCloud ឬ Apple ID របស់អ្នកប្រើនោះទេ លុះត្រាតែមានលិខិតមរណៈភាព ឬករណីលើកលែងដែលច្បាប់ទាមទារប៉ុណ្ណោះ។

ក្រៅពីនេះ Apple ក៏មានមុខងារ Digital Legacy ទើបមានលើ iOS 15 ដើម្បីផ្ទេរមរតកឌីជីថល ឬផ្ទេរគណនី ទៅកាន់មនុស្សដែលទុកចិត្តបំផុត ដែលបានកំណត់រួចរាល់កាលពីអ្នកស្លាប់នៅរស់ផងដែរ។

៣. គណនីរបស់ Telegram ក្រុមហ៊ុននឹងលុបគណនីអ្នកប្រើរួមទាំងសារទាំងអស់ និងបញ្ជីឈ្មោះ Contact បើអ្នកប្រើមិនបានអនឡាញយូរបំផុតក្នុងរយៈពេល១ឆ្នាំ។

ត្រង់នេះជាគោលការណ៍លុបគណនីដោយស្វ័យប្រវត្តិរបស់ Telegram ចំពោះអ្នកមិនបានអនឡាញ ប៉ុន្ដែវាក៏អាចរាប់បញ្ចូលចំពោះការលុបគណនីមនុស្សដែលស្លាប់ផងដែរ ព្រោះគណនីទាំងនោះនឹងមិនអនឡាញទៀតឡើយ។

៤. គណនីរបស់ Gmail ក្រុមហ៊ុន Google នឹងមិនលុបគណនីអ៊ីមែល សារនានា ឬទិន្នន័យ Google Drive របស់អ្នកដែលស្លាប់ទៅនោះទេ។

ប៉ុន្ដែមុខងារ Inactive Account Manager របស់ Google អាចកំណត់ឱ្យនរណាម្នាក់បន្តគ្រប់គ្រងគណនីអ្នកស្លាប់បាន ឬកំណត់ឱ្យលុបដោយស្វ័យប្រវត្តិបើមិនមានការប្រើប្រាស់នោះទេ៕