កាលពីថ្មីៗនេះកម្មវិធីផ្ញើសារលើស្មាតហ្វូនមួយឈ្មោះថា Signal មានសន្ទុះទាញយកយ៉ាងគំហុក ដោយមានអ្នកទាញយកដល់ទៅ ៧,៥ លានដង កើនឡើងពីសប្ដាហ៍មុនដល់ទៅ ៤ ២០០% រីឯកម្មវិធី Telegram វិញមានអ្នកទាញយកដល់ទៅ ៩ លានដង កើនឡើងពីសប្ដាហ៍មុន ៩១%។

ចំពោះចំនួនទាញយកច្រើនបំផុតនៃកម្មវិធីទាំងពីរ គឺចេញមកពី ប្រទេសឥណ្ឌា ក្នុងនោះកម្មវិធី Signal មានអ្នកទាញយក ២,៣ លានដង និងកម្មវិធី Telegram មានអ្នកទាញយក ១,៥ លានដង។ ចំពោះកម្មវិធី Signal ប្រភពទីផ្សារទាញយកធំបំផុតទី២ គឺមកពី សហរដ្ឋអាមេរិក ដោយមានអ្នកទាញយកប្រមាណ ១ លានដង។

គួរបញ្ជាក់ផងដែរថា ចំនួនទាញយកដ៏ច្រើនសន្ធឹកសន្ធាប់នៃកម្មវិធីទាំងពីរ លើ App Store និង Play Store កើតឡើងបន្ទាប់ពីការប្រកាសចេញនូវ គោលការណ៍ថ្មីរបស់កម្មវិធីផ្ញើសារ WhatsApp ស្ដីពីការចែករំលែកទិន្នន័យរបស់អ្នកប្រើប្រាស់ ទៅកាន់កម្មវិធីបណ្ដាញសង្គម Facebook។

Use Signal

— Elon Musk (@elonmusk) January 7, 2021

រីឯហេតុផលនៃការទាញយកកម្មវិធី Signal យ៉ាងច្រើនមួយទៀតនោះ ព្រោះតែមហាសេដ្ឋី Elon Musk បានសរសេរថាយ៉ាងខ្លីថា "use Signal” ក្នុងន័យឱ្យប្រើប្រាស់កម្មវិធី Signal នៅលើគណនី Twitter របស់លោក ដែលមានអ្នក follower ជាង ៤២ លាននាក់។