Google Pixel 5 អាចប្រើបានរហូតដល់ ៤៨ម៉ោង ព្រោះមុខងារមួយ

2020-10-01 02:12:09
ផលិតផលថ្មី

2020-10-01 02:12:09
ចំនួនមតិ 0 | ចំនួនចែករំលែក 0

ចន្លោះមិនឃើញ

Google បានបង្ហាញចេញជាផ្លូវការនូវស្មាតហ្វូន Pixel 5 ដែលជា Flagship ស៊េរីចុងក្រោយបំផុត។ លើកនេះ Google មិនសូវផ្ដោតលើបច្ចេកវិទ្យាថ្មី ដូចជាមុខងារ Motion Sense ដែលមានលើ Pixel 4 ឆ្នាំមុន ដោយប្ដូរមកកែសម្រួលលើកាមេរ៉ា ជាផ្នែកដែល Pixel លេចធ្លោជាងគូប្រជែង។

Google បានបង្អួតលើមុខងារមួយចំនួនដែលធ្វើឲ្យ Pixel 5 លេចធ្លោលើស Pixel 4a ក្នុងនោះមានសមត្ថភាពការពារទឹកនិងធូលី IP68, ទ្រាំទ្រការសាកថ្ម Reverse Wireless, មាន RAM ធំជាង និងមានអេក្រង់ការពារដោយកញ្ចក់ Gorilla Glass 6 ប៉ុន្តែមិនមានរន្ធកាស 3.5mm ដូចជា Pixel 4a ឡើយ។

អេក្រង់របស់ Pixel 5 មានទំហំ ៦អ៊ីញ ជាប្រភេទ OLED អាចបង្ហាញរូបភាពកម្រិត 2340 x 1080 ភីកសែល និងមាន Refresh Rate 90Hz ហើយលើអេក្រង់មានចោះរន្ធដាក់កាមេរ៉ា Selfie។ តាមរយៈការដកចេញនូវប្រព័ន្ធកាមេរ៉ា Motion Sense ពេលនេះគេទទួលបាននូវអេក្រង់លាតពេញផ្ទៃ មិនដូចជា Pixel 4 ឡើយ។

Pixel 5 មានបំពាក់ដោយបន្ទះឈីប Snapdragon 765G គួបផ្សំនឹង Modem X52 សម្រាប់គាំទ្រសេវា 5G, មាន RAM ទំហំ ៨GB, អង្គផ្ទុកទំហំ ១២៨GB, ថ្មទំហំ ៤០៨០ mAh សាកថ្មកម្លាំង 18W, និងមានសមត្ថភាពការពារទឹកនិងធូលី IP68។

ចូលដល់កាមេរ៉ាដែលតួឯកសំខាន់នៃ Pixel 5 គឺវាមានបំពាក់កាមេរ៉ាក្រោយចំនួនពីរគ្រាប់ មានកាមេរ៉ាមេទំហំ ១២,២MP មានទាំងមុខងារទប់លំនឹង OIS និង EIS ហើយមួយទៀតជាកាមេរ៉ា Ultrawide ទំហំ ១៦MP ដែលថតរូបភាពទំហំ ១០៧ដឺក្រេ។ ចំណែកកាមេរ៉ាមុខមានទំហំ ៨MP ដែលអាចថតរូបភាព Portrait បាន។

មុខងារមួយចំនួនដែល Google បានបន្ថែមលើ Pixel 5 មានដូចជាមុខងារ Portrait Light ដែលអាចឲ្យអ្នកកែសម្រួលពន្លឺពេលថតរូបភាព Portrait, មុខងារ Cinematic Pan សម្រាប់ការថតវីដេអូ Panning និងមុខងាររក្សាលំនឹងថ្មីចំនួនបីសម្រាប់ការថតវីដេអូ។

មុខងារគួរឲ្យចាប់អារម្មណ៍មួយទៀតគឺ Extreme Battery Power ដែលសន្យាថាអាចឲ្យថាមពលថ្ម Pixel 5 ទ្រាំទ្រនឹងការប្រើប្រាស់បានរហូតដល់ ៤៨ម៉ោង។ ពេលដំណើរការមុខងារនេះ Android នឹងផ្អាកដំណើរការកម្មវិធីភាគច្រើន (និង Notification កម្មវិធី), បន្ថយល្បឿន Processor, បិទការចាប់ទីតាំង, បន្ថយរយៈពេលបិទអេក្រង់មកត្រឹម ៣០វិនាទី ហើយអ្នកអាចធ្វើការផ្លាស់ប្ដូរផ្សេងៗទៀតបានផងដែរ។

Google Pixel 5 មានតម្លៃចាប់ពី ៦៩៩ដុល្លារ នៅសហរដ្ឋអាមេរិក ហើយវានឹងចាប់ផ្ដើមលក់នៅប្រទេសចំនួន ៨ចាប់ពីថ្ងៃទី១៥ ខែតុលា ហើយនៅសហរដ្ឋអាមេរិកមានលក់ចាប់ពីថ្ងៃទី២៩ ខែតុលា៕

ប្រភព៖ The Verge | Androidauthority ប្រែសម្រួល៖ សុខហេង