- 2020-02-13 10:11:02
- ផលិតផលថ្មី
ចេញមកភ្លាម ឈរលេខមួយលើតារាងកាមេរ៉ា DxOMark ភ្លែត!
- 2020-02-13 10:11:02
- ចំនួនមតិ 0 | ចំនួនចែករំលែក 0
ចេញមកភ្លាម ឈរលេខមួយលើតារាងកាមេរ៉ា DxOMark ភ្លែត!
ចន្លោះមិនឃើញ
ទីបំផុត Xiaomi បានប្រកាសចេញ Xiaomi Mi 10 និង Mi 10 Pro ជាផ្លូវការ ដែលសុទ្ធសឹងតែមានកាមេរ៉ា ៤ គ្រាប់ និងមានប្រើបន្ទះឈីប Snapdragon 865។ គួរឲ្យចាប់អារម្មណ៍នោះគឺ Mi 10 Pro ទទួលបានពិន្ទុវាយតម្លៃពី DxOMark រហូតដល់ ១២៤ ពិន្ទុ លើផ្នែកកាមេរ៉ា អាចឲ្យវាឈរលើតំណែងកំពូលផុតលេខ។
Xiaomi Mi 10 Pro
Mi 10 Pro មានប្រើអេក្រង់ AMOLED ទំហំ ៦,៦៧ អ៊ីញ កម្រិត FullHD+ ជាមួយអេក្រង់រាងកោង ដែលមាន Refresh Rate 90Hz។ អេក្រង់នេះគឺមានកម្រិតពន្លឺដល់ទៅ ១២០០ Nit ដែលជាអ្វីក្រុមហ៊ុនមានមោទនភាពលើវាបំផុត។
ទាក់ទាញជាងគេគឺកាមេរ៉ា Mi 10 Pro ដែលមានកាមេរ៉ាមេកម្រិត ១០៨MP ជាឡេន 8P អមដោយកាមេរ៉ាបីទៀត មានកាមេរ៉ា Telephoto ដែលអាច Zoom បែប Hybrid បាន ១០ដង, កាមេរ៉ា Telephoto មួយទៀតអាច Zoom បានពីរដងសម្រាប់ការថតរូប Portrait និងកាមេរ៉ា Ultrawide ទំហំ ២០MP។
កាមេរ៉ាមេរបស់ Mi 10 Pro ទំហំ ១០៨MP គឺមានបច្ចេកវិទ្យារក្សាលំនឹង OIS និង EIS, មាន AI ជំនួយដល់ការថតរូបសន្លឹកនិងវីដេអូ ហើយអាចថតវីដេអូបានដល់កម្រិត 8K។
វាមានជម្រើស ៣ ប្រភេទគឺ RAM 8GB/ROM 256GB, RAM 12GB/ROM 256GB និង RAM 12GB/ROM 512GB។ RAM គឺជាប្រភេទ LPDDR5 ចំណែកអង្គផ្ទុកគឺជាប្រភេទ UFS 3.0។
នៅផ្នែកខាងក្នុងគឺមានថ្មទំហំ ៤៥០០ mAh ដែលអាចសាកដោយល្បឿន ៥០ វ៉ាត់ និងសាកដោយមិនប្រើខ្សែជាមួយល្បឿន ៣០ វ៉ាត់ ហើយអាចសាកឲ្យឧបករណ៍ដទៃទៀតបានល្បឿន ១០ វ៉ាត់ផងដែរ។
តម្លៃនៅទីផ្សារប្រទេសចិនគឺមានប្រមាណ ៧១៥ ដុល្លារ, ៧៨៧ ដុល្លារ និងប្រមាណ ៨៦០ ដុល្លារ ដែលនឹងចេញលក់នៅថ្ងៃទី ១៨ ខែកុម្ភៈ។
Xiaomi Mi 10
Mi 10 នៅរក្សាអេក្រង់ AMOLED ទំហំ ៦,៦៧ អ៊ីញ និងកាមេរ៉ាមេ ១០៨ MP ដដែល។ យ៉ាងណាក្ដីវាបាត់បង់កាមេរ៉ា Telephoto ទាំងពីរ ដោយជំនួសមកវិញនូវកាមេរ៉ាវាស់ជម្រៅ ២MP និងកាមេរ៉ា Macro កម្រិត ២MP។ កាមេរ៉ា Ultrawide ក៏ធ្លាក់ចុះទំហំនៅត្រឹម ១៣ MP ផងដែរ។
ចំណែកថាមពលថ្មបែរជាធំជាងប្រភេទ Pro ដោយមានថ្ម ៤៧៨០ mAh ប៉ុន្តែអាចសាកត្រឹមល្បឿន ៣០ វ៉ាត់ ហើយអាចសាកថ្មឥតខ្សែល្បឿន ៣០ វ៉ាត់ដូចគ្នា និងសាកឲ្យឧបករណ៍ផ្សេងបាន ១០ វ៉ាត់។
ប្រភេទមួយនេះនឹងចេញលក់ចាប់ពីថ្ងៃស្អែកនៅប្រទេសចិន ជាមួយតម្លៃប្រមាណ ៥៧២ដុល្លារ សម្រាប់ប្រភេទ RAM 8GB/ROM 128GB, តម្លៃ ៦១៥ ដុល្លារ សម្រាប់ប្រភេទ RAM 8GB/ROM 256GB និងតម្លៃ ៦៧៣ ដុល្លារ សម្រាប់ប្រភេទ RAM 12GB/ROM 256GB៕