- 2019-12-11 03:59:21
- ព័ត៌មាន
ក្រោយខកខាន ២៨ ឆ្នាំ Apple ប្រកាសចូលរួមពិព័រណ៍ CES សារជាថ្មីនៅឆ្នាំ ២០២០
- 2019-12-11 03:59:21
- ចំនួនមតិ 0 | ចំនួនចែករំលែក 0
ក្រោយខកខាន ២៨ ឆ្នាំ Apple ប្រកាសចូលរួមពិព័រណ៍ CES សារជាថ្មីនៅឆ្នាំ ២០២០
ចន្លោះមិនឃើញ
នៅឆ្នាំ ១៩៩២ គឺជាពេលវេលាចុងក្រោយបង្អស់របស់ក្រុមហ៊ុន Apple ដែលបានលេចមុខនៅក្នុងពិព័រណ៍ CES។ វិលមកទល់ឆ្នាំ ២០២០ ខាងមុខនេះ ក្រុមហ៊ុនអាមេរិកបានប្រកាសចូលខ្លួនសារជាថ្មីក្រោយខកខានអស់រយៈពេលជិត ៣ ទសវត្សរ៍។
ផលិតផលចុងក្រោយបង្អស់ដែល Apple ប្រកាសនៅ CES គឺ Newton ដែលវាជាប្រភេទឧបករណ៍ម្យ៉ាងមានប្រើប្រាស់ប៊ិច ប៉ុន្តែបានបញ្ឈប់ការលក់នៅអំឡុងប៉ុន្មានឆ្នាំបន្ទាប់នោះ។
ផ្អែកតាមរបាយការណ៍ពីគេហទំព័រផ្លូវការរបស់ CES បានបង្ហាញឈ្មោះនាយកជាន់ខ្ពស់នៃប្រព័ន្ធសុវត្ថិភាពអ្នកស្រី Jane Horvath ដែលនឹងមានវត្តមាននៅឆាក CES ប៉ុន្មានខែខាងមុខនេះ ដើម្បីធ្វើការពិភាក្សាក្នុងគោលដៅរិះរកវិធីពង្រឹងបន្ថែមនូវប្រព័ន្ធសន្តិសុខសុវត្ថិភាពដើម្បីបំពេញនូវតម្រូវការរបស់អតិថិជននិងផ្នែកច្បាប់ដែលពាក់ព័ន្ធ។ ចំណុចនេះមានន័យថា Apple នឹងចូលរួម ប៉ុន្តែពុំមានត្រៀមប្រកាសនូវផលិតផលអ្វីថ្មីនោះឡើយ។
គួររំឭកថា CES គឺជាពិព័រណ៍ពាណិជ្ជកម្មខ្នាតធំមួយដែលរៀបចំឡើងដោយសមាគម CTA។ វាប្រព្រឹត្តិឡើងជារៀងរាល់ឆ្នាំនៅអំឡុងខែមករា នៅឯទីក្រុង Las Vegas រដ្ឋ Nevada សហរដ្ឋអាមេរិក ដើម្បីធ្វើការប្រកាសបង្ហាញនូវផលិតផលនិងបច្ចេកវិទ្យាថ្មីក្នុងឧស្សាហកម្មបច្ចេកវិទ្យា។
សម្រាប់ឆ្នាំ ២០២០ នឹងធ្វើឡើង ៣ ថ្ងៃនាថ្ងៃទី ៧ មករា ដល់ថ្ងៃទី ១០ មករា។ ត្បិត Apple ពុំបានប្រកាសផលិតផលអ្វីថ្មីក៏ដោយ ប៉ុន្តែសម្រាប់ក្រុមហ៊ុនដទៃទំនងនឹងមានស្មាតហ្វូន ទូរទស្សន៍ ឬបច្ចេកវិទ្យាទំនើបណាមួយត្រៀមបង្ហាញនាថ្ងៃនោះ៕
អានអត្ថបទ: