- 2019-07-16 03:28:33
- ព័ត៌មាន
សរុបដំណឹងជុំវិញ Pocophone F2 អាចប្រកាសចេញខែសីហា
- 2019-07-16 03:28:33
- ចំនួនមតិ 0 | ចំនួនចែករំលែក 0
សរុបដំណឹងជុំវិញ Pocophone F2 អាចប្រកាសចេញខែសីហា
ចន្លោះមិនឃើញ
Xiaomi Pocophone F1 បានប្រកាសចេញនៅខែសីហា ឆ្នាំ ២០១៨ ដែលទទួលបានការគាំទ្រជាខ្លាំង។ មិនត្រឹមតែមានប្រើបន្ទះឈីប Snapdragon 845 និងលក្ខណៈសម្បត្តិកប់ជាច្រើនទៀតនោះទេ ប៉ុន្តែថែមមានតម្លៃថោកទៀតផង។ ពេលនេះជាពេលដែលត្រូវគិតដល់ស្មាតហ្វូនស្នងតំណែង ដែលអាចមានឈ្មោះថា Pocophone F2។
ទាក់ទងនឹង Pocophone ជំនាន់ថ្មី មានដំណឹងតិចតួចបំផុតអំពីវា ហើយវារាងចម្លែកបន្តិចព្រោះថាជិតដល់ខែសីហា ឆ្នាំ ២០១៩ ដែលជាពេលគេរំពឹងថា Xiaomi ប្រកាសចេញស្មាតហ្វូនថ្មី។ ត្បិតថាដឹងមិនសូវច្រើន ប៉ុន្តែគេអាចធ្វើការប៉ាន់ស្មានជុំវិញ Pocophone F2 បាន។
Pocophone F1 មានឈ្មោះមួយទៀតថា Poco F1 ហើយវាគឺជាត្រកូលដំបូងនៃ Pocophone។ ហេតុនេះមិនពិបាកស្មាននោះទេថាជំនាន់ថ្មីនឹងមានឈ្មោះថា Pocophone F2 ឬ Poco F2 នោះ។ ចំពោះកាលបរិច្ឆេទប្រកាសចេញវិញ បើត្រឡប់ទៅមើល Poco F1 បានប្រកាសចេញថ្ងៃទី ២២ ខែសីហា ឆ្នាំមុន។ ដូចនេះអាចសន្និដ្ឋានបានថា Xiaomi នឹងជ្រើសរើសកាលបរិច្ឆេទស្រដៀងគ្នាសម្រាប់ឆ្នាំ ២០១៩។
ដើម្បីរក្សាតម្លៃឲ្យទាប Xiaomi បានកាត់បន្ថយផ្នែកមួយចំនួនទាក់ទងការឌីហ្សាញ តួយ៉ាងគឺប្រើប្រាស់តួខ្លួនប្រភេទប្លាស្ទិក ជាជាងការប្រើកញ្ចក់ដូចស្មាតហ្វូនដទៃ។ បន្ថែមពីនេះវាមានគែមផ្នែកខាងក្រោមទំហំធំ ប្រើអេក្រង់ LCD ជំនួសឲ្យ OLED និងមានក្បាលឆកធំផងដែរ។
គេអាចប៉ាន់ស្មានថា Xiaomi អាចបន្តការកាត់បន្ថយនេះ ដើម្បីរក្សាតម្លៃឲ្យទាប។ យ៉ាងណាក្ដីក៏អាចមានការផ្លាស់ប្ដូរល្អៗមួយចំនួន ស្របពេលដែលបច្ចេកវិទ្យាកាន់តែរីកចម្រើន។ ឧទាហរណ៍ដូចជាការប្រើរចនាបថក្បាលឆកតំណក់ទឹក ជាជាងការប្រើរចនាបថក្បាលឆកទំហំធំ, បន្ថែមកាមេរ៉ាដល់ ៣ គ្រាប់, ប្រើទ្រនាប់ស្កេនលើអេក្រង់។
ទាក់ទងនឹងរូបរាងនេះដែរ មានចចាមអារ៉ាមជាច្រើនបាននិយាយថាការឌីហ្សាញរបស់ Poco F2 បានលេចចេញរួចមកហើយ ដោយវាត្រូវបានគេហៅថា Xiaomi Redmi K20។ Xiaomi អាចនឹងប្ដូរឈ្មោះ K20 ឬ K20 Pro ដែលលក់ក្នុងស្រុក ទៅជា Poco F2 ហើយបើដូច្នោះមែន ខាងក្រោមអាចជាមុខមាត់របស់ Pocophone F2 ៖
មានចំណុចខ្លាំងបី បូករួមនឹងតម្លៃថោក ដែលធ្វើឲ្យ Poco F1 លេចធ្លោ។ បីនោះគឺបន្ទះឈីប ទំហំថ្ម និងកាមេរ៉ា។ ហើយ Poco F2 អាចនឹងមានលក្ខណៈសម្បត្តិស្រដៀងគ្នា។
Poco F2 អាចប្រើបន្ទះឈីប Snapdragon 855, ថ្មទំហំយ៉ាងតូច ៤០០០ mAh, កាមេរ៉ាខាងក្រោយអាចមានកាមេរ៉ាមេកម្រិត ៤៨ MP ហើយអាចទៅរួចដែលវាមានដល់ ៣ គ្រាប់។ បន្ថែមពីនេះអាចមាន RAM ទំហំយ៉ាងតិចចាប់ពី ៦ GB អង្គផ្ទុក ៦៤ GB។
Poco F1 មានរន្ធដោតមេមូរីកាត, រន្ធកាស 3.5 mm និងរន្ធសាកថ្មប្រភេទ USB-C។ ច្បាស់ណាស់ថា USB-C នឹងលេចមុខលើ Poco F2 ម្ដងទៀត ប៉ុន្តែរន្ធកាស និងរន្ធមេមូរីកាតអាចត្រូវដកចេញ។
Poco F1 មានចំណុចខ្លាំងបី ហើយមានតម្លៃចាប់ពី ៣០០ ដុល្លារ ដល់ជាង ៤០០ ដុល្លារ។ សម្រាប់ Poco F2 តម្លៃអាចនឹងរក្សានៅទាបដដែល ឬ អាចឡើងថ្លៃ ៥០ ដុល្លារ លើសពីឆ្នាំមុន។ ទោះបីជាឡើងថ្លៃ ក៏ Poco F2 នៅតែស្មាតហ្វូនកម្លាំងថ្លៃដែលធូរថ្លៃបំផុតផងដែរ៕
ចុចអាន៖