អាជីវកម្មនៅកម្ពុជា ងាកមកប្រើប្រាស់បច្ចេកវិទ្យា រាប់តាំងពីអ្នករត់កង់បី

2017-12-20 02:27:13
ព័ត៌មាន

2017-12-20 02:27:13
ចំនួនមតិ 0 | ចំនួនចែករំលែក 0

ចន្លោះមិនឃើញ

សហគ្រិនតូចធំនៅក្នុងប្រទេសកម្ពុជា បានចាប់យកការប្រើប្រាស់ប្រព័ន្ធបច្ចេកវិទ្យាក្នុងដំណើរការអភិវឌ្ឍអាជីវកម្ម ក្នុងពេលដែលវិស័យនេះក៏កំពុងមានការរីកចម្រើនពីមួយថ្ងៃទៅមួយថ្ងៃ។

លោក សេង សុភាព នាយកគ្របគ្រងវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន ហៅកាត់ នីបតិច (NIPTICT) បានលើកឡើងពីការផ្លាស់ប្តូរការធ្វើអាជីវកម្មក្នុងប្រទេសកម្ពុជា រាប់តាំងពីអ្នកប្រកបរបររត់កង់បីឡើង។

ថ្លែងក្នុងកម្មវិធី Tech Startup and MSMEs Forum 2017 ដែលរៀបចំឡើងកាលពីម្សិលមិញ លោក សេង សុភាព បានលើកឡើងថា ប្រទេសកម្ពុជាបានចាប់ផ្តើមផ្លាស់ប្តូរការធ្វើអាជីវកម្ម មកប្រើប្រាស់ប្រព័ន្ធបច្ចេកវិទ្យាដើម្បីជំរុញការអភិវឌ្ឍអាជីវកម្ម។

"អាជីវកម្មតូចធំរាប់តាំងពីអ្នករត់ម៉ូតូកង់បី បច្ចុប្បន្នងាកមកប្រើប្រាស់បច្ចេកវិទ្យា ដែលនេះបង្ហាញការផ្លាស់ប្តូរដ៏ធំមួយក្នុងរយៈពេលប៉ុន្មានឆ្នាំចុងក្រោយនេះ"។

លោកប្រមើលមើលថា នៅថ្ងៃអនាគត បច្ចេកវិទ្យានឹងអាចធ្វើឲ្យបន្ថយការប្រើប្រាស់កម្លាំងសម្រាប់ការងារប្រចាំថ្ងៃ ដោយធ្វើការប្រើប្រាស់ប្រព័ន្ធឌីជីថលជំនួសវិញ។ ទាំងនេះហើយដែលធ្វើឲ្យ បច្ចេកវិទ្យាអាចជួយសម្រួល ដល់ដំណើរការងារក្រុមហ៊ុនអាជីវកម្ម ជំនួសដោយបច្ចេកវិទ្យារហូតដល់ ៤០% នៃចំនួនបុគ្គលិកនេះ។

លោក Thomas Hundt អគ្គនាយកក្រុមហ៊ុន Smart បានថ្លែងថា Smart បានចូលរួមយ៉ាងសកម្មដើម្បីជំរុញអាជីវកម្មខ្នាតតូចនិងមធ្យម (SME) ឆ្ពោះមកការប្រើប្រាស់បច្ចេកវិទ្យាឌីជីថល។

លោកថា នៅដើមឆ្នាំនេះក្រុមហ៊ុនបានប្រកាសមូលនិធិថ្មីឈ្មោះ Smart Digital Innovation មានទុនវិនិយោគគិតជាទឹកប្រាក់ចំនួន ៥ លានដុល្លារ ដើម្បីជួយគាំទ្រដល់អាជីវកម្មទាក់ទងនឹងឌីជីថល ដែលជាអនាគតម៉ាស៊ីនជួយពន្លឿនកំណើនសេដ្ឋកិច្ចប្រទេសកម្ពុជា។

លោក ត្រាំ អ៊ីវតឹក រដ្ឋមន្រ្តីក្រសួងប្រៃសនីយនិងទូរគមនគមន៍បានថ្លែងក្នុងឱកាសនោះដែរថា ការទទួលយកបច្ចេកវិទ្យាដោយ SME នឹងជួយលើកកម្ពស់ដល់ការជំរុញកំណើនអភីវឌ្ឍអាជីវកម្មបង្កើតថ្មីក្នុងស្រុក។

លោកលើកឡើងពីការរីកចម្រើនបច្ចេកវិទ្យាឌីជីថលដូចជាសេវារទូទាត់ប្រាក់ ផ្ទេរប្រាក់តាមទូរសព្ទដៃ ហៅរថយន្តតាក់ស៊ី ការកម្សាន្ត គ្រប់គ្រងបុគ្គលិក និងប្ដូររបៀបរបបនៃដំណើរការក្រុមហ៊ុនជាច្រើនទៀត។

នៅថ្ងៃអនាគតវិស័យបច្ចេកវិទ្យាមានការរីកចំរើនស្របពេលការប្រកបអាជីវកម្ម បែបប្រព័ន្ធអេឡិចត្រូនិក នឹងមានការកើនឡើងដែលតម្រូវឲ្យអ្នកមានចំណេះដឹងធនធានមនុស្សផ្នែកនេះកាន់តែច្រើន។

លោកបន្តថា ការប្រើប្រាស់បច្ចេកវិទ្យាអនុញ្ញាតឲ្យសហគ្រាសទាំងអស់ មានការផ្លាស់ប្ដូរស្វ័យប្រវត្តិកម្មពង្រឹងគោលដៅរបស់ខ្លួន ឲ្យកាន់តែមានប្រសិទ្ធភាពជាងមុនចាប់យកអតិថិជនបានកាន់តែច្រើន ដើម្បីបង្កើនប្រាក់ចំណូលបានយ៉ាងឆាប់រហ័ស និងធ្វើអាជីវកម្មនាំមុខគេ។

លោកក៏មើលឃើញបញ្ហាដែលសហគ្រាសធុនតូច និងមធ្យមនៅកម្ពុជា បានកំពុងប្រឈមទាក់ទងនឹងការទទួលបានហិរញ្ញប្បទាន ការប្រកួតប្រជែងក្នុងទីផ្សារ ខណៈផលិតផលជាច្រើនត្រូវបាននាំចូលពីប្រទេសជិតខាង។

ពេញមួយថ្ងៃកាលពីម្សិលមិញនេះ សហគ្រាសធុនតូច និងធម្យម (SME) ជាង ២០០ បានចូលរួមវេទិកា Tech Startup និង SME ដែលបានរៀបចំឡើងជាលើកដំបូង។

វេទិកានេះមានបំណងជំរុញអាជីវកម្មក្នុងស្រុកឆ្ពោះទៅសេដ្ឋកិច្ចឌីជីថល ដើម្បីប្រកួតប្រជែងជាមួយកម្រិតក្នុងស្រុក និងក្នុងតំបន់។

វេទិកា Tech Startup និង SME គឺជាគំនិតផ្ដួចផ្ដើមរួមរបស់ក្រសួងប្រៃសណីយ៍ និងទូរគមនាគមន៍ និងក្រសួងឧស្សាហកម្ម និងសិប្បកម្ម សហការជាមួយដៃគូសមាគមសហគ្រិនវ័យក្មេងកម្ពុជា JCI និង Unido និងការចូលរួមឧបត្ថម្ភធំដោយក្រុមហ៊ុន Smart៕