- 2017-11-18 06:13:00
- ព័ត៌មាន
សិស្សក្រីក្រ ១០ នាក់បានចូលរៀនបច្ចេកទេសយានយន្តនៅសាលា JVCមិនអស់លុយ!
- 2017-11-18 06:13:00
- ចំនួនមតិ 0 | ចំនួនចែករំលែក 0
សិស្សក្រីក្រ ១០ នាក់បានចូលរៀនបច្ចេកទេសយានយន្តនៅសាលា JVCមិនអស់លុយ!
ចន្លោះមិនឃើញ
យ៉ាងតិចមានសិស្សក្រីក្រចំនួន ១០ នាក់បន្ថែមទៀតដែលទទួលបានអាហារូបករណ៍រយៈពេល ២ ឆ្នាំពីក្រុមហ៊ុនរថយន្ត Toyota ដើម្បីរៀនជំនាញបច្ចេកទេសយានយន្តនៅក្នុងសាលាបច្ចេកទេស JVC ដ៏ល្បីមួយក្នុងប្រទេសកម្ពុជា។
នេះជាឆ្នាំទី ៦ ហើយដែល Toyota បានផ្ដល់ផ្ដល់អាហារូបករណ៍ជូនដល់សិស្សក្រីក្រទើបបញ្ចប់បាក់ឌុបគ្រប់ខេត្ត-ក្រុង ដែលគ្មានលទ្ធភាពបង់ថ្លៃសិក្សារៀនបន្តថ្នាក់បរិញ្ញាប័ត្ររង ឬបរិញ្ញាប័ត្រ ដើម្បីឲ្យពួកគេមានឱកាសទទួលបានចំណេះដឹង ចំណេះធ្វើ និងជំនាញពាក់ព័ន្ធនឹងបច្ចេកទេសយានយន្ត ក្នុងការអភិវឌ្ឍន៍ធនធានមនុស្សផ្នែកបច្ចេកទេសឲ្យកាន់តែសំបូរបែប។ លោកឧកញ៉ា គង់ នួនប្រធានក្រុមហ៊ុន Toyota ថ្លែងក្នុងពិធីប្រគល់អាហារូបករណ៍ដល់សិស្សក្រីក្រជំនាន់ទី ៦ និងអបអរការបញ្ចប់ថ្នាក់អាហារូបករណ៍ជំនាញបច្ចេកទេសជួសជុលរថយន្ត សិស្សជំនាន់ទី ៤។
នាយកសាលាបច្ចេកទេស JVC លោក ស៊ឹម សារិន្ទ ក៏បានលើកឡើងពីចំណុចគួរឲ្យចាប់អារម្មណ៍ក្នុងពិធីប្រគល់អាហារូបករណ៍នេះដែរថា៖ តាំងពីសង្គ្រាមបានបញ្ចប់ទៅ កម្ពុជាសឹងតែរកអ្នកជំនាញផ្នែកបច្ចេកទេសជួសជុលរថយន្តម្នាក់មិនបានទេ ទើបតែខាងជប៉ុនផ្ដល់ជំនួយនិងអ្នកជំនាញពីរនាក់ផ្នែកបច្ចេកទេសបង្រៀននៅសាលារដ្ឋ ទើបចេះតែបន្តដុះដាលអ្នកជំនាញផ្នែកនេះតរហូតមក។
គិតមកដល់ឆ្នាំសិក្សាជំនាន់ទី ៦ នេះ Toyota បានផ្ដល់អាហារូបករណ៍ដល់សិស្សសរុបចំនួន ៦៧ នាក់ហើយដែលក្នុងនោះមានសិស្សជំនាន់ទី១ ចំនួន ១៦ នាក់ ជំនាន់ទី ២ ចំនួន ១០ នាក់ ជំនាន់ទី៣ ចំនួន ១០ នាក់ ជំនាន់ទី ៤ ចំនួន ១០ នាក់ ជំនាន់ទី ៥ កំពុងសិក្សានៅសល់មួយឆ្នាំទៀតទើបចប់ និងជំនាន់ទី ៦ ចំនួន ១០ នាក់ទើបទទួលបានអាហារូបករណ៍។
ចំពោះលក្ខខណ្ឌទទួលសិស្សក្រីក្រ លោក លី ប៊ុនហៃ នាយកផ្នែកគ្រប់គ្រងផ្នែកលក់ និងទីផ្សារ បានឲ្យដឹងថា សិស្សទាំងអស់ត្រូវជាប់ឬធ្លាក់បាក់ឌុប ជាសិស្សក្រីក្រមានការបញ្ជាក់ពីភូមិ-ឃុំ និងការចុះមើលផ្ទាល់ពីក្រុមការងារអាហារូបករណ៍ Toyota ទទួលត្រឹម ១០ នាក់ប៉ុណ្ណោះក្នុងមួយឆ្នាំ និងជាសិស្សស្រលាញ់ការសិក្សាជាពិសេសជំនាញបច្ចេកទេសជួសជុលរថយន្តជាដើម។
អាហារូបករណ៍របស់ Toyota រៀនជំនាញបច្ចេកទេសជួសជុលរថយន្តនេះ សម្រាប់សិក្សារយៈពេលពីរឆ្នាំ មានរួមបញ្ចូលទាំងថ្លៃសិក្សា ថ្លៃស្នាក់នៅ ប្រាក់ឧបត្ថម្ភ និងឧកាសការងារក្នុងក្រុមហ៊ុនតូយ៉ូតាផងដែរ៕
ចុចអានបន្ត៖
