រាង​និង​តម្លៃ Nokiad 8 ដែល​ល្បី​ថា​នឹង​លេច​មុខ​ឆាប់ៗ បាន​ធ្លាយ​លើ​វិបសាយ​លក់​ទំនិញ​អនឡាញ​ធំ​របស់​ចិន។

JD.com វិបសាយ​លក់​ទំនិញ​អនឡាញ​និង​ជា​អ្នក​ចែកចាយ Nokia 6 បាន​ដាក់​លក់ Nokia 8 មុន​ពេល​ប្រកាស​ផ្លូវការ ក្នុង​តម្លៃ ៣ ១៨៨ យន់ ស្មើ​នឹង​ប្រហែល ៤៦០ ដុល្លារ។

Nokia 8 ដែល​បាន​បង្ហាញ​ខ្លួន​នេះ មាន​រាង​ដូច​គ្នា​ទៅ​នឹង​ព័ត៌មាន​ចចាមអារ៉ាម​លេចឮ​កន្លង​មក​អ៊ីចឹង តែ​ពុំ​មាន​ប្រភព​ណាមួយ​អាច​បញ្ជាក់​ថា រូបភាព​នេះ​ពិត​ជា​អាវុធ​សំងាត់​របស់ Nokia មែន​ឬ​យ៉ាង​ណា​ឡើយ។

ស្មាតហ្វូនេះ ល្បី​ថា​នឹង​បំពាក់​ឈីប​ជំនាន់​ចុង​ក្រោយ​របស់ Qualcomm ប្រភេទ Snapdragon 835 ឯ​ទំហំ​អេក្រង់​ដល់​ទៅ ៥,៧អ៊ីញ​ប្រភេទ Super AMOLED QHD និង​មាន Resolution 2560x1440pixels។ ចំពោះ​កាមេរ៉ា​ក្រោយ​របស់ Nokia 8 ទំហំ​ដល់​ទៅ 24MP និង​បច្ចេកវិទ្យា​ទប់​លំនឹង OIS អាច​ប្រជែង​នឹង iPhone 7/7 Plus។

ក្រុមហ៊ុន Nokia នឹង​បង្ហាញ​វត្តមាន​ស្មាតហ្វូន​កំពូលៗ​នៅសមាជទូរសព្ទ​ពិភពលោក​ MWC ថ្ងៃ​ទី ២៦ កុម្ភៈ​នេះ ហើយ​ក្នុង​នោះ​ក៏​នឹង​មាន​វត្តមាន Nokia 8 ល្បី​ឈ្មោះ​នេះ​ដែរ៕