Porsche Adventure Drive 2016 នាំអ្នកចូលរួម ទស្សនាភាពអស្ចារ្យប្រាសាទបុរាណខ្មែរ

2016-05-10 17:23:01
ព័ត៌មាន

2016-05-10 17:23:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណើរផ្សងព្រេង Porsche Adventure Drive 2016 រយៈពេល ៣ថ្ងៃ នៅទឹកដីអង្គរខេត្តសៀមរាប បានធ្វើឲ្យបណ្ដាអ្នកចូលរួមជនជាតិខ្មែរ ពិសេសបរទេស ស្ងើចសរសើរពីអច្ឆរិយភាពនៃប្រាង្គប្រាសាទបុរាណខ្មែរ បន្សល់ទុកអស់រយៈកាលពាន់ឆ្នាំ។

លោក Michael Vetter នាយកប្រតិបត្តិក្រុមហ៊ុននាំចូល រថយន្តម៉ាក Porsche នៅកម្ពុជា បានឲ្យដឹងថាមូលហេតុដែល Porsche ជ្រើសរើសខេត្តសៀមរាប ដើម្បីប្រារព្ធព្រឹត្តិការណ៍ Porsche Adventure Drive 2016 ប្រចាំតំបន់អាស៊ីប៉ាស៊ីហ្វិកនេះ គឺដើម្បីឲ្យបណ្ដាអ្នកចូលរួមមកពីតំបន់អាស៊ីនិងប៉ែកអឺរ៉ុប បានទស្សនាប្រាសាទបុរាណខ្មែរ។ លើសពីនេះអ្នកចូលរួមទាំងអស់ក៏អាចស្វែងយល់ពីសមត្ថភាពបើកបររបស់ រថយន្ត Porsche Macan និង Porsche Cayenne លើផ្លូវ Off Road (ផ្លូវរដិបរដុបនិងចំណោទ) នៅតាមតំបន់ព្រៃដាច់ស្រយាលចម្ងាយប្រមាណ ៣០គីឡូម៉ែត្រពីក្រុងសៀមរាបផងដែរ។

ដំណើរព្រេងមួយនេះ អ្នកចូលរួមទាំងខ្មែរនិងបរទេសប្រហែល ៤០នាក់ត្រូវបែងចែកជាក្រុមៗ ហើយត្រូវធ្វើដំណើរដោយរថយន្ត Porsche ប្រភេទ SUV មានម៉ូដែល Porsche Macan និង Porsche Cayenne ដើម្បីបំពេញបេសកកម្ម និងទៅរុករកកំណប់កប់ចំនួន ២ ដែលក្រុមការងារ Porsche លាក់ទុកនៅក្នុងប្រាសាទបុរាណ។ កំណប់ទាំងនោះ ត្រូវពឹងលើភាពឆ្លាតវៃនិងចំណេះដឹងផ្សេងៗទាក់ទងនឹងប្រាសាទបុរាណខ្មែរទើបអាចស្វែងរកឃើញ។ ពីរក្រុមដែលអាចរកឃើញកំណប់មុនគេ នឹងបានរង្វាន់។

អ្នកចូលរួមមួយរូបឈ្មោះ Vincent Hwang មកពីតៃវ៉ាន់ និយាយថា លោកធ្លាប់បានចូលរួមការបើកបររថយន្តលក្ខណៈផ្សងព្រេងជាច្រើនលើកមកហើយ តែសម្រាប់ការមកចូលរួមក្នុងកម្មវិធី Porsche Adventure Drive 2016 ជាលើកទីមួយ ហើយពិតជាធ្វើឲ្យលោករីករាយនិងរំភើបជាខ្លាំងពេលបានឃើញប្រាសាទបុរាណខ្មែរ មានប្រាសាទតាព្រហ្ម និងអង្គរវត្ត។

Porsche Adventure Drive 2016 ធ្វើឡើងនៅខេត្តសៀមរាបរយៈពេល៣ថ្ងៃ ហើយត្រូវបានរៀបចំឡើងដោយ ក្រុមហ៊ុន Porsche ប្រចាំតំបន់អាស៊ីប៉ាស៊ីហ្វិក និង ក្រុមហ៊ុនព្រីស៊ីហ្សិនខាស៍ខេមបូឌា លីមីតធីត ដែលជាក្រុមហ៊ុននាំចូល និងចែកចាយផ្លូវការរថយន្ត Porsche នៅកម្ពុជា។ ព្រឹត្តិការណ៍នេះមានការចូលរួមពីបណ្ដាអ្នកសារព័ត៌មាន អតិថិជនជាតិនិងអន្តរជាតិមាន កម្ពុជា តៃវ៉ាន់ ថៃ វៀតណាម ម៉ាឡេស៊ី ឥណ្ឌូណេស៊ី ហ្វីលីពីន សិង្ហបុរី អង់គ្លេស អាមេរិក នូវែលហ្សេឡង់ និងអូស្ត្រាលីជាដើម៕

អត្ថបទ៖ ប៉ែត ផាន់និត

រូបភាព៖ ផ្តល់ឲ្យដោយ Porsche Center Phnom Penh