Huawei P9 ពិតជាមានបំពាក់កាមេរ៉ាភ្លោះ អាចនឹងស៊ីដាច់ iPhone 6s

2016-04-07 14:12:15
ព័ត៌មាន

2016-04-07 14:12:15
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទីបំផុតពាក្យចចាមអារ៉ាមអំពីទូរសព្ទជំនាន់ថ្មីរបស់ Huawei ដែលនឹងមានបំពាក់កាមេរ៉ាភ្លោះបានក្លាយជាការពិតក្រោយពីក្រុមហ៊ុនបានបង្ហាញជាផ្លូវការពី P9 និង P9 Plus។

និយាយពីលក្ខណៈសម្បត្តិរបស់ Huawei P9 គឺមានបំពាក់ដោយអេក្រង់ទំហំ៥,២អ៊ីញ ប្រភេទ LCD និងមានកម្រិត Resolution 1080x1920។ ទូរសព្ទទាំងមូលដំណើរការបានដោយបន្ទះ Chip Kirin 955 SoC និង RAM ដែលមានធំឬតូចអាស្រ័យលើទំហំអង្គផ្ទុកទិន្នន័យដោយ ៣GB/៣២GB និង ៤GB/៦៤GB។

អង្គផ្ទុកទិន្នន័យអាចបន្ថែមទំហំឲ្យធំបានតាមរយៈរន្ធសម្រាប់ដោតកាត microSD។ P9 ប្រតិបត្តិការបានដោយមានថ្មទំហំ ៣០០០mAhដែលថ្មរបស់វាសាកបញ្ចូលថាមពលតាមរយៈរន្ធ USB Type-C។ ចំពោះមុខងារស្កេនក្រយៅដៃវិញគឺបានបំពាក់នៅផ្នែកខាងក្រោយនៃទូរសព្ទ។

ក្រឡេកទៅមើលលក្ខណៈសម្បត្តិរបស់ Huawei P9 Plus ឯណោះវិញគឺមានអេក្រង់ទំហំ៥,៥អ៊ីញ ប្រភេទ AMOLED ហើយអ្វីដែលធ្វើឲ្យវាពិសេសលើស P9 នោះគឺអេក្រង់មានបំពាក់មុខងារ Press Touch ដោយដំណើរការស្រដៀងនឹង 3D Touch លើ iPhone ដែរ។

P9 Plus មានបំពាក់ដោយ RAM ទំហំ៤GB, អង្គផ្ទុកទិន្នន័យទំហំ ៦៤GB អាចបន្ថែមពីក្រៅបាន និងមានបំពាក់បន្ទះ Chip ដូចជា P9 ដែរ។ ចំពោះថ្មវិញមានទំហំ ៣៤០០mAh ដោយជាមួយមុខងារ Dual-IC Rapid Charge គឺសាកតែ១០នាទី អាចប្រើបាន៦ម៉ោងសម្រាប់ការនិយាយទូរសព្ទ។

ទាំង P9 និង P9 Plus មានបំពាក់កាមេរ៉ាប្រភេទដូចគ្នាគឺ កាមេរ៉ាភ្លោះរបស់ក្រុមហ៊ុន Leica ដែលមានទំហំ១២MP ដោយកាមេរ៉ាមួយអាចចាប់យករូបភាពពណ៌ និងមួយទៀតអាចត្រឹមចាប់រូបភាព ស-ខ្មៅប៉ុណ្ណោះ។ កាមេរ៉ាទាំងពីរដំណើរការជាមួយគ្នាដើម្បីជួយឲ្យរូបភាពកាន់តែច្បាស់ មានពន្លឺគ្រប់គ្រាន់ និងជួយកាត់បន្ថយ Noise ពេលថតក្នុងទីងងឹត។

ចំណុចពិសេសមួយទៀតរបស់កាមេរ៉ាទូរសព្ទនេះគឺវាមិនមានសភាពលានចេញមកក្រៅដូចស្មាតហ្វូនដទៃឡើយ។ យ៉ាងណាក្ដីគេមិនសង្កេតឃើញពីបច្ចេកវិទ្យា OIS ដែលជាបច្ចេកវិទ្យាជួយទប់លំនឹងរូបភាពនៅលើកាមេរ៉ាភ្លោះនៃទូរសព្ទទាំងពីរម៉ូដែលនេះទេ។

គួរបញ្ជាក់ថា Huawei P9 ប្រភេទ RAM៣GB/អង្គផ្ទុកទិន្នន័យ៣២GB មានតម្លៃ ៦៨០ដុល្លារ និងប្រភេទ RAM៤GB/អង្គផ្ទុកទិន្នន័យ៦៤GB មានតម្លៃ ៧៤០ដុល្លារ ដោយនឹងចេញលក់លើកដំបូងនាថ្ងៃទី១៦ខែមេសា ក្នុងសហភាពអឺរ៉ុប និងមជ្ឈិមបូព៌ា។ ចំណែកឯ P9 Plus ឯណោះវិញគឺមានតម្លៃ ៨៥០ដុល្លារ ដោយនឹងដាក់លក់លើទីផ្សារបរទេសចាប់ពីថ្ងៃទី ២០ ខែឧសភា៕

ចុចអាន៖ យប់នេះ Huawei P9 នឹងចេញជាផ្លូវការ

ប្រែសម្រួល៖ ហៃ សុខហេង ប្រភព៖ GSMArena