Honda នឹងប្រមូលរថយន្តដែលមានបញ្ហាពោងសុវត្ថិភាពជិត៥៧ ម៉ឺនគ្រឿងនៅចិន

2014-12-18 18:31:19
ព័ត៌មាន

2014-12-18 18:31:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Honda នៅចិននឹងប្រមូលរថយន្តជិត ៥៧ ម៉ឺនគ្រឿងចូលក្រុមហ៊ុនវិញដោយសារបញ្ហាពោងសុវត្ថិភាព។ នេះបើតាមភ្នាក់ងារឃ្លាំមើលគុណភាពរបស់ចិន។ ក្រុមហ៊ុនដៃគូ Honda ក្នុងប្រទេសចិនបានសហការជាមួយនាយកដ្ឋានរដ្ឋបាលគ្រប់គ្រងគុណភាព ត្រួតពិនិត្យចរាចរណ៍ផ្លូវគោក (AQSIQ) ដើម្បីប្រមូលរថយន្តប្រមាណជា ៥៥៣ ២៦៤ គ្រឿងចាប់ពីថ្ងៃទី ២៨ ខែកុម្ភៈឆ្នាំ ២០១៥ខាងមុខតទៅ។ នេះបើតាមសេចក្ដីថ្លែងការណ៍របស់ស្ថាប័នរដ្ឋាភិបាលខាងលើ។

ប្រភេទរថយន្តដែលនឹងត្រូវប្រមូលទៅវិញនោះរួមមានម៉ូដែល Accord sedans ចំនួន ៥២៧ ១៣៦ គ្រឿង ដែលផលិតដោយក្រុមហ៊ុន GAC-Honda (ក្រុមហ៊ុន Guangzhou Automobile Group សហការជាមួយ Honda) ដែលផលិតក្នុងចន្លោះឧសភាឆ្នាំ ២០០២ ដល់ខែធ្នូ ឆ្នាំ ២០០៧ និង ម៉ូដែល(MPVs) ចំនួន២៦ ១២៨ គ្រឿងផលិតដោយក្រុមហ៊ុន Dongfeng-Honda (ក្រុមហ៊ុន Dongfeng Motor Group សហការជាមួយ Honda) ដែលបានផលិតក្រោមឈ្មោះ Brand Elysion ចន្លោះពីខែ មិថុនា ឆ្នាំ ២០១២ ដល់ ខែមិថុនា ឆ្នាំ ២០១៤ ។

ស្ថាប័នដដែលបានបន្ថែមនៅក្នុងរបាយការណ៍ទៀតថា រថយន្តទាំងនេះគឺមានកំហុសបច្ចេកទេសនៅលើពោងសុវត្ថិភាពនៅកន្លែងអ្នកបើកបរដែលអាចផ្ទុះបំបែកបំណែកតូចៗបង្កគ្រោះថ្នាក់ដល់អ្នកបើកបរ។

លើសពីនេះ GAC-Honda ក៏នឹងប្រមូលរថយន្តម៉ូដែល Fit Saloons ចំនួន ១៦ ៥០៥ គ្រឿងដែលផលិតក្នុងចន្លោះខែតុលាឆ្នាំ ២០០២ ដល់ខែធ្នូឆ្នាំ២០០៣ ដែលមានបច្ចេកទេសដូចគ្នាផងដែរ។

របាយការណ៍មិនបានបញ្ជាក់ឈ្មោះក្រុមហ៊ុនផលិត ពោងសុវត្ថិភាពទេ ប៉ុន្តែកាសែត Nikkei របស់ជប៉ុនបានចុះផ្សាយកាលពីសប្ដាហ៍មុនថា ក្រុមហ៊ុន Honda នឹងបន្តប្រមូលរថយន្តដែលបំពាក់ពោងសុវត្ថិភាពផលិតដោយក្រុមហ៊ុន Takata ទូទាំងពិភពលោក ១៣ លានគ្រឿង ក្រោយមាន៥ នាក់ស្លាប់ដោយសារពោងសុវត្ថិភាពនេះ។ ម្នាក់ក្នុងចំណោមអ្នកស្លាប់គឺស្ត្រីជនជាតិម៉ាឡេស៊ីដែលប្រើប្រាស់រថយន្ត Honda City ខណៈរាប់សិបនាក់ផ្សេងទៀតរងរបួស៕

អាន៖ ស្រោមទូរសព្ទការពារ iPhone 6/6 Plus ធ្លាក់មិនបែក ប៉ះទឹកមិនជ្រាប

ប្រែសម្រួល៖ សំនៀង ប្រភព៖ transport.asiaone