- 2014-12-04 01:46:27
- ព័ត៌មាន
យុវវ័យជិះម៉ូតូធំ ច្រើនតែរងការរិះគន់ថាមានឥរិយាបទមិនល្អ?
- 2014-12-04 01:46:27
- ចំនួនមតិ 0 | ចំនួនចែករំលែក 0
យុវវ័យជិះម៉ូតូធំ ច្រើនតែរងការរិះគន់ថាមានឥរិយាបទមិនល្អ?
ចន្លោះមិនឃើញ
ទំនោរថ្មីក្នុងចំណោមយុវវ័យខ្មែរសព្វថ្ងៃ ហាក់ដូចជាកំពុងតែមានការចាប់អារម្មណ៍ខ្លាំងនឹងការប្រើប្រាប់ម៉ូតូធំៗ ហើយកន្លងមក ក៏ឃើញមានការបង្កើតជាក្រុមម៉ូតូធំ ផ្សេងៗជាច្រើន។ ទន្ទឹមនឹងការប្រមូលផ្ដុំជាក្រុមម៉ូតូធំ ក្រុមយុវវ័យជិះម៉ូតូធំទាំងនោះ ហាក់ទទួលរងនូវព្យុះរិះគន់ពីសំណាក់សាធារណៈជនថា មានឥរិយាបថមិនល្អ ក្នុងការបើកបរ ខ្លះទៀតថា ភាគច្រើនជាក្រុមក្មេងទំនើងជាដើម។
តើរាល់ការលើកឡើងទាំងនោះ ជាការពិតដែរ ឬទេ? ចុះប្រិយមិត្តវិញ ដឹងអ្វីខ្លះពីក្រុមម៉ូតធំរបស់យុវវ័យខ្មែរយើង?
តាមការលើកឡើងរបស់យុវជន ប៉ាងយួង ថាមពល អាយុ២៨ឆ្នាំ ជាសមាជិកម៉ូតូធំម្នាក់នៅក្នុងក្រុមខ្មែរម៉ូតូស្ព័រ (KSB) បានលើកឡើងថា៖ បើតាមការប៉ាន់ស្មានរបស់ខ្ញុំ សព្វថ្ងៃនេះ ចំនួនម៉ូតូធំដែលកំពុងប្រើប្រាស់នៅក្នុងទីក្រុងភ្នំពេញមានមិនតិចជាង១ពាន់គ្រឿងនោះទេ ហើយម៉ូតូធំភាគច្រើនសុទ្ធតែមានកម្លាំងម៉ាស៊ីនចាប់ពី៦០០សេសេឡើងទៅ។
មតិសាធារណៈជនមួយចំនួន នៅមានផ្នត់គំនិតមួយថា ឲ្យតែក្រុមយុវជនដែលចូលចិត្តជិះម៉ូតូធំ ភាគច្រើនជាក្រុមក្មេងទំនើង ជើងកាង មិនចូលសាលា តែធាតុពិតមិនដូចអ្វីដែលរិះគន់នេះទេ។
ការលើកឡើងនេះត្រូវបានយុវជនថាមពល ពន្យល់ថា៖ "ខ្ញុំថា មិនមែនបែបហ្នឹងទេ ជាក់ស្ដែងសមាជិកក្នុងក្រុមម៉ូតូខ្មែរស្ព័រ(KSB) របស់ពួកយើងខ្ញុំ សុទ្ធតែជាពាណិជ្ជករ អ្នកជំនួញ អ្នកធ្វើការងារ និងអ្នកដែលចូលចិត្តជិះម៉ូតូធំ។ ក្រៅពីនេះ កន្លងមកក្រុមម៉ូតូរបស់ពួកខ្ញុំ ក៏បានចុះជួយក្នុងសកម្មភាពសង្គម និងមនុស្សធម៌ជាច្រើនដូចជា ការបង្កើតមូលនិធិរៃអង្គាសថវិកាជួយដល់មន្ទីរពេទ្យគន្ធបុប្ផា ជួយដល់កុមារកំព្រា សាលាបឋមសិក្សានៅតាមបណ្ដាខេត្តឆ្ងាយៗទៀតផង"។
សកម្មភាពមនុស្សធម៌របស់ក្រុមម៉ូតូធំ KSB
"ខ្ញុំក៏មិនបដិសេធទាំងអស់ដែរ ព្រោះអី ក្នុងចំណោមយុវវ័យជិះម៉ូតូធំមួយចំនួន ដែលពួកគាត់ ជិះមិនមានក្រុមត្រឹមត្រូវ បញ្ចេញឥរិយាបថមិនសូវសមរម្យ នៅពេលបើកបរដែរ នេះហើយជាមូលហេតុដែលមានការរិះគន់មិនល្អ"។ ថាមពល បញ្ជាក់ដូច្នេះ។
យុវជនក្នុងក្រុមម៉ូតូធំដដែលរូបនេះ ប្រាប់ទៀតថា៖ "មូលហេតុចម្បងដែលពួកខ្ញុំ បង្កើតឲ្យមានជាក្រុមម៉ូតូធំនេះឡើង គឺដោយសារតែពួកយើងសុទ្ធតែជាអ្នកស្រលាញ់ចូលចិត្តជិះម៉ូតូធំ និងដើម្បីដកបទពិសោធន៍ ក៏ដូចជាស្វែងយល់ពីវា។ មួយវិញទៀត ពួកយើងចង់ឲ្យការជិះម៉ូតូធំនេះប្រកបដោយសុវត្ថិភាព ព្រោះកាលណាយើងមានក្រុមត្រឹមត្រូវ យើងនឹងមានវិន័យ និងសណ្ដាប់ធ្នាប់ល្អក្នុងការជិះ"។
"មួយវិញទៀត ពួកយើងក៏ចង់បញ្ជាក់ប្រាប់ផងដែរថាការជិះម៉ូតូធំ គឺជាកីឡាមួយប្រភេទ ហើយប្រទេសជឿនលឿនមួយចំនួន ក៏គេមានការបង្កើតជាក្រុមម៉ូតូធំអញ្ចឹងដែរ"។ យុវជនថាមពល បន្ថែមដូច្នេះ។
ក្រុមម៉ូតូធំ KSB បង្កើតឡើងនៅថ្ងៃទី ៨ ខែមីនា ឆ្នាំ២០១២ ដោយមានការសមាជិកចូលរួមដំបូងចំនួន៨ នាក់ប៉ុណ្ណោះ តែគិតមកទល់ពេលនេះកើនដល់ ៥០នាក់ហើយ ដោយមានលោក ធី ខេមរិន ជាប្រធានក្លឹប៕
សមាជិកក្រុម KSB បង្កើតមូលនិធិជួយដល់មន្ទីរពេទ្យគន្ធបុប្ផា
ចុះប្រិយមិត្តវិញ យល់យ៉ាងណាដែរ?
អត្ថបទ៖ យិន សំបូរ រូបភាព៖ ផ្ដល់ដោយក្រុមម៉ូតូធំ KSB
