ប្រទេសចិន បានឈានមុខគេក្នុងវិស័យបច្ចេកវិទ្យាជាមួយនឹងការបង្ហាញ រថយន្តហោះអគ្គិសនី ដំបូងគេរបស់ខ្លួនដែលមានឈ្មោះថា "Southeast University Kunpeng No. 1"។ រថយន្តហោះនេះត្រូវបានបង្ហាញជាផ្លូវការ ដោយក្រុមអ្នកស្រាវជ្រាវនៃសាកលវិទ្យាល័យ Southeast University នៅខេត្ត Jiangsu ភាគខាងកើតប្រទេសចិន កាលពីថ្ងៃទី ១ ខែមករា ឆ្នាំ២០២៥។

យោងតាមសេចក្តីប្រកាសពីសាកលវិទ្យាល័យ រថយន្តហោះ "Kunpeng No. 1" គឺជារថយន្តហោះអគ្គិសនីដំបូងគេរបស់ប្រទេសចិនដែលប្រើប្រាស់បច្ចេកវិទ្យា "distributed electric drive" ដោយមានសមត្ថភាពធ្វើចលនាទាំងនៅលើដី និងក្នុងអាកាស។ លោកសាស្ត្រាចារ្យ Yin Guodong ដែលជាអ្នកដឹកនាំគម្រោងនេះបាននិយាយថា "នេះគឺជារថយន្តហោះដំបូងគេរបស់ចិនដែលប្រើរថយន្តជាយានជំនិះចម្បង មិនមែនជាយន្តហោះតូច (drone) នោះទេ ដែលអនុញ្ញាតឱ្យវាផ្លាស់ប្តូររវាងការបើកបរនៅលើដី និងការហោះហើរក្នុងអាកាសបានយ៉ាងរលូន"។

រថយន្តហោះនេះ មានទម្ងន់អតិបរមា ៥០០ គីឡូក្រាម អាចហោះបានយ៉ាងហោចណាស់ ២០ នាទី និងឡើងដល់កម្ពស់អតិបរមាជាង ៣០០ ម៉ែត្រ។ នៅពេលបើកបរលើដី វាអាចសម្រេចបានល្បឿនអតិបរមា ៦០ គីឡូម៉ែត្រក្នុងមួយម៉ោង។ បច្ចុប្បន្ន វាដំណើរការដោយថ្មដែលមានសមត្ថភាពខ្ពស់ ហើយក្រុមអ្នកស្រាវជ្រាវកំពុងធ្វើការលើបច្ចេកវិទ្យាថ្មីដើម្បីបង្កើនរយៈពេលហោះហើរឱ្យលើសពី ២ ម៉ោងសម្រាប់ជំនាន់ក្រោយ។

រថយន្តហោះ "Kunpeng No. 1" ត្រូវបានរចនាឡើងជាមួយនឹងប្រព័ន្ធ all-wheel steering និងប្រព័ន្ធជំរុញអគ្គិសនីចែកចាយ ដែលមានបួនកង់ និងបួនរ៉ូទ័រ។ វាត្រូវបានគេមើលឃើញថាជាជំហានដ៏សំខាន់មួយក្នុងការអភិវឌ្ឍរបៀបដឹកជញ្ជូនថ្មីសម្រាប់អនាគត និងរួមចំណែកដល់ សេដ្ឋកិច្ចដែលជាផ្នែកមួយនៃគោលដៅជាតិឆ្នាំ២០២៥ របស់ចិន។ ការបង្ហាញរថយន្តហោះនេះ បានទាក់ទាញការចាប់អារម្មណ៍ជាសកល ដោយបង្ហាញពីសមត្ថភាពបច្ចេកវិទ្យារបស់ចិន ក្នុងការប្រកួតប្រជែងជាមួយបណ្តាប្រទេសធំៗដទៃទៀត។ អ្នកជំនាញជឿជាក់ថា វាអាចជួយផ្លាស់ប្តូរវិធីធ្វើដំណើរ និងជំរុញការអភិវឌ្ឍឧស្សាហកម្មអាកាសចរណ៍អគ្គិសនី នាពេលអនាគត៕