ក្រុមហ៊ុន OpenAI និង Softbank កំពុងចាប់ផ្តើមវិនិយោគទៅលើ ការសាងសង់ មណ្ឌលរក្សាទិន្នន័យ AI ដែលមានតម្លៃរហូតដល់ទៅ ៥០០ ពាន់លានដុល្លារ។ គម្រោងដែលមានតម្លៃរហូតដល់ទៅ ៥០០ ពាន់លានដុល្លារនេះ មានឈ្មោះថា “The Stargate Project” ដែលនឹងមានការចូលរួមពីក្រុមបច្ចេកវិទ្យាធំៗ រួមមាន Oracle, MGX, Microsoft, Nvidia និង Arm។

គម្រោងសាងសង់ មណ្ឌលរក្សាទិន្នន័យ AI ថ្មីមួយ ត្រូវបានប្រកាសឱ្យដឹងនៅក្នុងសេតវិមាន សហរដ្ឋអាមេរិក។ ក្នុងនោះ លោក Masayoshi Son, Sam Altman និង Larry Ellison រួមទាំងប្រធានាធិបតីអាមេរិក Donald Trump បានប្រកាសរួមគ្នា នូវគម្រោង The Stargate Project។ ក្រុមហ៊ុនរបស់ពួកគេ Softbank, OpenAI, Oracle និង MGX ត្រូវបានចាត់ជាអ្នកផ្គត់ផ្គង់ផ្នែកហិរញ្ញវត្ថុ ក្នុងរង្វង់ទឹកប្រាក់ ៥០០ ពាន់លានដុល្លារ សម្រាប់ការវិនិយោគរយៈពេល ៤ ឆ្នាំ ទៅលើការសាងសង់ ហេដ្ឋារចនាសម្ព័ន្ធ មណ្ឌលរក្សាទិន្នន័យ AI ថ្មី នៅក្នុងសហរដ្ឋអាមេរិក។

បើយោងទៅតាមសេចក្តីប្រកាសរបស់ OpenAI ក្រុមហ៊ុន Arm, Microsoft, NVIDIA, Oracle និង OpenAI ផ្ទាល់ គឺជាដៃគូគាំទ្រផ្នែកបច្ចេកវិទ្យា សម្រាប់គម្រោង AI Data Centre ថ្មីនេះ។ ការសាងសង់ ហេដ្ឋារចនាសម្ព័ន្ធ នឹង ចាប់ផ្តើមមុនគេ នៅក្នុងទីក្រុង Texas។ នៅក្នុងការប្រកាសជាផ្លូវការ នៃការបោះទុនវិនិយោគ ៥០០ ពាន់លានដុល្លារលើផ្នែកបច្ចេកវិទ្យា អ្នកដឹកនាំក្រុមហ៊ុនចូលរួមក្នុងគម្រោងនេះ បាននិយាយចំៗ ទៅកាន់ លោក Donald Trump ថា គម្រោងនេះ លេចចេញជារូបរាងដោយសារ តែ ត្រាំ បានឈ្នះឆ្នោតក្លាយជាប្រធានាធិបតី អាមេរិក ជាថ្មី៕