អស់រយៈពេល​ ១៤ឆ្នាំហើយ ទីបំផុត​ ក្រុមហ៊ុន Apple បានប្រកាស​ដំឡើង​កម្មវិធីម៉ាស៊ីនគិតលេខ (Calculator App) នៅលើ​ iPad ហើយ ដែល​កម្មវិធីនេះ​នឹងភ្ជាប់មកស្រាប់​តាមរយៈប្រព័ន្ធប្រតិបត្តិការ​ជំនាន់ថ្មី iPadOS 18 ជំនាន់ថ្មី។

កម្មវិធីម៉ាស៊ីនគិតលេខនេះ ជួយឱ្យអ្នកប្រើប្រាស់​តាម​ដាន​ប្រវត្តិនៃការគិតលេខលើកមុន និងមានលេខបំលែងយ៉ាងរហ័សដូចជា ប្រវែង និងរូបិយបណ្ណជាដើម។

ស្របជាមួយនឹងកម្មវិធីម៉ាស៊ីនគិតលេខនេះដែរ ប្រសិនបើអ្នកប្រើប្រាស់មាន ប៊ិច Apple ទៀតនោះ នឹងជួយដោះស្រាយ​លំហាត់​គណិតវិទ្យាទៀតផង ហៅថា Mate Notes ដោយអាចសរសេរផ្ទាល់ដៃ ឬចុចក៏បាន ពោលគឺ​វានឹងចេញចម្លើយអូតូតែម្តង។ ឧទាហរណ៍ដូចក្នុងរូបខាងក្រោមនេះ ប្រសិន​បើអ្នកសរសេរលេខ 57-18 គឺ​វានឹងចេញលេខចម្លើយ 39 តែម្តង ឬការដោះស្រាយ​លំហាត់សមីកាផ្សេងៗទៀត។

សូមជម្រាបថា យប់មិញនេះ Apple បានប្រកាស​ចេញ iPadOS 18 ក្នុងព្រឹត្តិការណ៍ WWDC ដែល​តែងតែធ្វើឡើង​ជារៀងរាល់ឆ្នាំ។ ក្រៅពីកម្មវិធីម៉ាស៊ីនគិតលេខខាងលើនេះ Apple ក៏បាន​បញ្ចេញ​ជម្រើស​ Customization ថ្មី​សម្រាប់ Home Screen និង Control Center ព្រមទាំងមុខងារ Apple Intelligence ថ្មីផងដែរ។

iPad ដែលអាច​ដំឡើងប្រព័ន្ធប្រតិបត្តិការជំនាន់ថ្មីនេះ រួមមាន៖ iPad Pro (M4), iPad Pro 12.9 inch (ចាប់ពីជំនាន់ទី៣), iPad Pro 11 inch (ចាប់ពីជំនាន់ទី១), iPad Air (M2), iPad Air (ចាប់ពីជំនាន់ទី៣), iPad (ចាប់ពីជំនាន់ទី៧) និង iPad mini (ចាប់ពីជំនាន់ទី៥)៕