ក្រុមហ៊ុន Huawei Technologies បាន​ដាក់ឱ្យប្រើប្រាស់​ចំណតសាកភ្លើង​ដ៏លឿន​បំផុតសម្រាប់​រថយន្តអគ្គិសនី​ ពោលគឺ​ប្រើរយៈពេលមិនចាញ់ការចាក់សាំង​រថយន្ត​ចំហេះក្នុងនោះទេ។

ក្រុមហ៊ុនបច្ចេកវិទ្យាយក្សរបស់​ចិន​មួយ​នេះ បាន​បើកសម្ពោធ​ដាក់ឱ្យប្រើប្រាស់​​ចំណតសាកភ្លើងល្បឿនលឿន​ ដែលស្ថិតក្រោម​ការអភិវឌ្ឍរបស់​ក្រុមហ៊ុន Huawei Digital Power ​អាចសាកដល់ ៦០០គីឡូវ៉ាត់។

អ្វីដែល​គួរឱ្យចាប់អារម្មណ៍​បំផុតនោះ គឺរាល់ការសាក ១វិនាទី នឹងជួយឱ្យ​រថយន្តអគ្គិសនី អាច​ធ្វើដំណើរបាន ១គីឡូម៉ែត្រ។ អ៊ីចឹង​ប្រសិន​បើសាកតែ១០នាទី គឺ​អាចបើកដល់ចម្ងាយ ៦០០គីឡូម៉ែត្រដែលលឿនជាង Supercharger Station របស់ Tesla ២ដង។

គួរដឹងថា Huawei គ្រោង​ពង្រីកចំណត​សាកភ្លើង​ល្បឿនលឿន​នេះ​ដល់ចំនួន ១០ម៉ឺនទីតាំង​ឯណោះ នៅទូទាំងប្រទេសចិន ត្រឹមឆ្នាំ​២០២៤ តាមរយៈកិច្ចសហការ​ជាមួយ​ម្ចាស់ដី និងតាមបណ្តាហាង​នានា ដោយ​វាគាំទ្រ​ការសាក​ជាមួយគ្រប់ម៉ូឌែល​រថយន្តអគ្គិសនី៕