ក្រសួង​ឧស្សាហកម្ម​ថៃ គ្រោងនឹង​រុករករ៉ែ​ Lepidolite ដែល​ប្រើ​សម្រាប់​ផលិត​អាគុយលីចូមបំពាក់​លើ​រថយន្តអគ្គិសនី នៅភាគខាងត្បូង​ប្រទេស។ គម្រោង​នេះ ធ្វើឡើង​បន្ទាប់ពី​បាន​អង្កេត​ឃើញ​ថា តំបន់​មួយចំនួន នៅស្រុក Takua Thung ខេត្ត​មាត់​សមុទ្រ Phangnga គឺ​មានបង្កប់​ដោយ​រ៉ែប្រភេទនេះ។

ក្រសួង​បាន​ផ្តល់​អាជ្ញាបណ្ណពិសេស​ក្នុងការរុករក​រ៉ែ​នេះ នៅតំបន់​ចំនួន៣ ក្នុងស្រុកនេះ ក្នុងនោះ​រួមមានតំបន់ Ruangkiet និង Bang E-Thum ខណៈ​មាន​ក្រុមហ៊ុនអូស្ត្រាលី​២ ដែល​សកម្ម​នៅក្នុងប្រទេសថៃ គឺ​ក្រុមហ៊ុន Pan Asia Metals និង Matsa Resources។

ក្រុមមន្រ្តី កំពុង​ធ្វើការអង្កេតលម្អិត​នៅ​តំបន់ Bang E-Thum ដើម្បីស្វែងរកតម្រុយនៃរ៉ែ។ ចំណែក​តំបន់ Ruangkiet ត្រូវបានរំពឹងថា ​នឹងមាន​រ៉ែ​គ្រប់គ្រាន់​សម្រាប់​ផលិត​អាគុយ​ ៥០គីឡូវ៉ាត់ម៉ោង បម្រើ​ឱ្យរថយន្តអគ្គិសនី​ ១លានគ្រឿង។

រដ្ឋាភិបាល​ថៃ សង្ឃឹមថា នឹង​ប្រើប្រាស់​រ៉ែ​នេះ​គាំទ្រ​ដល់​ឧស្សាហកម្ម​រថយន្តអគ្គិសនី និងធ្វើឱ្យប្រទេសថៃ កាន់​តែក្លាយគោលដៅ​ទាក់ទាញ​វិនិយោគ​កាន់តែច្រើន​សម្រាប់​ការផលិត​រថយន្តអគ្គិសនី៕