ក្រុមហ៊ុនចិន Zeekr ដែល​ជាក្រុមហ៊ុន​បុត្រសម្ព័ន្ធរបស់​ក្រុមហ៊ុន Geely បាន​ចាប់ផ្តើម​ផលិត​រថយន្ត​អគ្គិសនី Zeekr 007 ហើយ ដែល​វា​ជាប្រភេទ​រថយន្តប្រណីត តែមាន​តម្លៃ​ធូរថ្លៃចាប់ពី ៣ម៉ឺន ២ពាន់ដុល្លារ ហើយ​អ្វី​ដែល​គួរឱ្យចាប់អារម្មណ៍​បំផុត​នោះ​គឺ​អាគុយ​ដ៏ពិសេស​របស់​វាតែម្តង។

ប៉ុន្មាន​ឆ្នាំ​ចុងក្រោយ​នេះ ក្រុមហ៊ុន Zeekr បាន​បញ្ចេញ​រថយន្ត​ស៊ីដែនម៉ូឌែល 001, ប្រភេទ MPV 009 និង X SUV ហើយ​សម្រាប់​ម៉ូឌែល 007 ត្រូវបាន​ឌីហ្សាញ​រូបរាងដ៏គួរឱ្យទាក់ទាញ​ ជាពិសេស​គឺ​ចង្កៀង​ LED ដែល​រំលេចដោយ​អក្សរ The 1st ZEEKR 007។ គួរដឹង​ថា ប្រធាន​ផ្នែក​ឌីហ្សាញ​រថយន្ត​នេះ គឺ​ធ្លាប់​ធ្វើការ​នៅក្រុមហ៊ុន Audi និង Bentley។

រថយន្ត Zeekr 007 មក​ជាមួយ​ជម្រើស​ប៉ុង១ (RWD) និង​ប៉ុង២ (AWD)។ សម្រាប់ប៉ុង១ដែលរត់កង់ក្រោយ បំពាក់​ម៉ូទ័រអគ្គិសនី​កម្លាំង​ ៤១៥សេះ និងប៉ុង២ ​បំពាក់​ម៉ូទ័រអគ្គិសនីកម្លាំង ៦៣៧សេះ។ យ៉ាងណាមិញ option ទាំង២ គឺ​បំពាក់​អាគុយ​​ដ៏ធំ​និង​មានលក្ខណៈពិសេស ដែល​ក្រុមហ៊ុន​នេះ​បានហៅថា ជាអាគុយមាស ឬ Golden Battery។

អាគុយ​នេះ ​គឺ​ជា​ប្រភេទ lithium iron phospate ដែល​ជួយ​ដល់ការសាកលឿន​បំផុត​ ពោលគឺ​ចំណាយ​ពេល​សាក​តែ​ ១៥នាទី អាចធ្វើដំណើរបាន​ដល់ជាង ៥០០គីឡូម៉ែត្រ។ ជារួម​សម្រាប់​ ប៉ុង១ វាបំពាក់​អាគុយ​ទំហំ ៧៥,៦គីឡូវ៉ាត់ម៉ោង ធ្វើដំណើរបានដល់ចម្ងាយ ៦៨៨គីឡូម៉ែត្រ និង​ប៉ុង២ បំពាក់​អាគុយទំហំ ១០០គីឡូវ៉ាត់ម៉ោង អាចធ្វើដំណើរបានដល់ចម្ងាយ ៧៧០គីឡូម៉ែត្រ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB