ក្រុមហ៊ុន Toyota បាន​បញ្ចេញ​រថយន្ត​ដ៏មហាល្បីល្បាញគឺ Prius 2024 សម្រាប់ទីផ្សារអាមេរិក ដែល​រក្សា​រូបរាង​ដដែល​ដូចស៊េរីមុនដែរ ប៉ុន្តែ​វាបាន​បន្ថែម​បច្ចេកវិទ្យា​ថ្មី​ចំនួន៣ គឺ​អេក្រង់ Head up display, មុខងារ integrated streaming ដែលអ្នកប្រើប្រាស់​អាចភ្ជាប់​គណនី Apple ឬ Amazon Music របស់ពួកគេ​ជាមួយរថយន្ត និង​សំឡេង​បិទបើកសោថ្មី (lock/unlock chime) គួរឱ្យទាក់ទាញ។

Toyota Prius 2024 នៅតែមានជម្រើស option SE, XSE និង XSE Premium ប៉ុន្តែមានតម្លៃថ្លៃជាងមុនបន្តិច ក៏ដោយសារតែការបំពាក់​បច្ចេកវិទ្យាថ្មីៗ។ ក្នុងនោះ option SE តម្លៃ ៣៣ ៧៧០ដុល្លារ (ឡើងថ្លៃ ៣២៥ដុល្លារ), XSE តម្លៃ ៣៧ ០២០ដុល្លារ (ឡើងថ្លៃ ៣២៥ដុល្លារ) និង XSE Premium តម្លៃ ៤០ ៤៦៥ដុល្លារ (ឡើងថ្លៃ ២០០ដុល្លារ)។

រថយន្ត​នេះ ប្រើម៉ាស៊ីន Plug-in Hybrid ចំណុះ ២,០លីត្រ ផលិតបាន​កម្លាំង ១៥០សេះ និង​បំពាក់ម៉ូទ័រអគ្គិសនីមួយ​ផលិតបានកម្លាំង ១៦១សេះ។ បើសរុបចូលគ្នាគឺវាផលិតបានកម្លាំងរហូតដល់ ២២០សេះ និងកម្លាំងរមួល ១៨៨ញូតុនម៉ែត្រ។ ជាមួយ​គ្នានេះ វាបំពាក់​អាគុយ​ទំហំ ១៣,៦គីឡូវ៉ាត់ម៉ោង ដែល​ផ្តល់ចម្ងាយបើកបរបាន ៧០គីឡូម៉ែត្រ រាល់ពេលសាកពេញម្តង ប៉ុន្តសម្រាប់ option XSE និង XSE Premium បើកបាន ៦៣គីឡូម៉ែត្រ៕