ក្រុមហ៊ុន Toyota Motor China Investment, GAC Toyota Motor Co. (GTMC) និង Pony-ai បាន​ប្រកាស​ថា ពួកគេ​នឹង​ដាក់​ទុនវិនិយោគរួមគ្នា​ដើម្បី​ផលិត​រថយន្តតាក់ស៊ី​បើកបរ​ស្វ័យ​ប្រវត្តិ​កម្រិត៤ ជាទ្រង់ទ្រាយធំតែម្តង។

គួរដឹងថា ក្រុមហ៊ុន Pony.ai បានក្លាយ​ជាក្រុមហ៊ុនទីមួយ​ដែល​ទទួលអាជ្ញាបណ្ណ​សម្រាប់​ប្រតិបត្តិការ​រថយន្តតាក់ស៊ីបើកបរស្វ័យ​ប្រវត្តិ​ក្នុងប្រទេសចិន ដោយ​បាន​ដាក់ឱ្យចរាចរណ៍​​លើផ្លូវសាធារណៈ​រួចមកហើយ​នៅ ក្វាងចូវ ប៉េកាំង សៀងហៃ និងស៊ីនជិន។

ទុនវិនិយោគ​របស់​ក្រុមហ៊ុន​ទាំង៣ គឺ​សរុបមានចំនួន ១៣៩,២លានដុល្លារ។ ក្នុងកិច្ចសហប្រតិបត្តិការនេះគឺត្រូវប្រើ​រថយន្តអគ្គិសនីដែលមានប្រេន Toyota របស់​ GAC Toyota Motor ប៉ុន្តែ​រត់នៅលើ​ platform របស់ក្រុមហ៊ុន Pony.ai គឺ PonyPilot+។

គួរ​រំលឹកថា កាលពីឆ្នាំ​២០១៩ កិច្ចសហការរវាង​ Pony.ai និង Toyota បាន​ចាប់ផ្តើម​កើតឡើង​នៅពេល​ដែល​ក្រុមហ៊ុនទាំងពីរប្រកាស​រួមគ្នា​ថា នឹង​ចាប់ផ្តើម​អភិវឌ្ឍរថយន្ត​បើកបរស្វ័យប្រវត្តិ​នៅក្នុងប្រទេសចិន។ ជាលទ្ធផល​ រថយន្តទីមួយគឺ Lexus RX450h ដែលបំពាក់​បច្ចេកវិទ្យា​បើកបរអូតូនោះ ត្រូវបានដាក់​ឱ្យចរាចរណ៍​ក្នុងប្រទេសនេះ៕