ឧទ័យ ថេកណឡជី ត្រៀមខ្លួនចាប់យកវិស័យ «បច្ចេកវិទ្យាបដិសណ្ឋារកិច្ច»ថ្មីមួយទៀត

2023-03-10 09:19:58
ព័ត៌មាន

2023-03-10 09:19:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន ឧទ័យ ថេកណឡជី បានចុះកិច្ចព្រមព្រៀងសហការគ្នាមួយជាមួយរមណីយដ្ឋាន ចំការធ្នុង (KinoFarm Resort)ដើម្បីបង្កើតសាកល្បងនូវមជ្ឈមណ្ឌលស្រាវជ្រាវនិងអភិវឌ្ឍន៍មួយ ដែលផ្ដោតទៅលើការស្រាវជ្រាវនិងអភិវឌ្ឍបច្ចេកវិទ្យាបដិសណ្ឋារកិច្ចដើម្បីជំរុញឌីជីថលូបនីយកម្មវិស័យទេសចរណ៍និងបដិសណ្ឋារកិច្ចនៅកម្ពុជា។

ស្រុកសំឡូត ខេត្តបាត់ដំបង – ក្រុមហ៊ុន ឧទ័យ ថេកណឡជី ដែលជាក្រុមហ៊ុនផ្ដល់ដំណោះស្រាបច្ចេកវិទ្យាឧស្សាហកម្មនិងឌីជីថលនៅកម្ពុជា ថ្មីៗនេះ បានប្រារព្ធខួប១៣ឆ្នាំរបស់ខ្លួនជាមួយនឹងការចុះហត្ថលេខាលើកិច្ចព្រមព្រៀងភាពជាដៃគូមួយជាមួយរមណីយដ្ឋាន ចំការធ្នុង ដែលស្ថិតនៅស្រុកសំឡុត ខេត្តបាត់ដំបង ដើម្បីបង្កើតមជ្ឈមណ្ឌលស្រាវជ្រាវនិងអភិវឌ្ឍន៍ មួយសម្រាប់វិស័យបច្ចេកវិទ្យាបដិសណ្ឋារកិច្ចដែលកំពុងមានសក្ដានុពលខ្ពស់ ។

ការប្រារព្ធខួបអនុស្សាវរីយ៍ធ្វើឡើងជាកិច្ចប្រជុំចង្អៀតរយៈពេលមួយសប្ដាហ៍ដែលទាំងថ្នាក់ដឹកនាំនិងបុគ្គលិកប្រមាណ ៧០នាក់ បានជួបជុំគ្នារីករាយនឹងការសម្រាកលំហែកម្សាន្តផង និងឆ្លុះបញ្ចាំងរៀនសូត្របន្ថែមផង នៅឯមជ្ឈមណ្ឌលស្រាវជ្រាវនិងអភិវឌ្ឍន៍ (R&D) ស្ថិតក្នុងរមណីយដ្ឋានធម្មជាតិ ចំការធ្នុង ដែលមានទីតាំងនៅក្នុងស្រុកសំឡូត ខេត្តបាត់ដំបង ចម្ងាយប្រហែល ៤០០គីឡូម៉ែត្រ ពីរាជធានីភ្នំពេញ ។

លោក កែវ រស្មី នាយកគ្រប់គ្រងក្រុមហ៊ុន ឧទ័យ ថេកណឡជី បានមានប្រសាសន៍ថា នៅពេលដែលសហស្ថាបនិកបានបង្កើតក្រុមហ៊ុនដំបូងកាលពី១៣ឆ្នាំមុន ប្រទេសកម្ពុជាស្ថិតនៅក្នុងដំណាក់កាលដំបូងៗនៃការធ្វើឌីជីថលូបនីយកម្ម ឬនិយាយជាសាមញ្ញថា ការចាប់ផ្ដើមប្រើប្រាស់បច្ចេកវិទ្យាឌីជីថលដើម្បីជំរុញសេដ្ឋកិច្ចជាតិ ។ ប្រការនេះបានផ្ដល់ឱកាសច្រើនដល់ក្រុមហ៊ុន ឧទ័យ ដើម្បីរៀនសូត្រនិងអភិវឌ្ឍខ្លួននៅខណៈដែលទីផ្សារមានទំហំធំទូលាយនៅឡើយ ។

លោក កែវ រស្មី មានប្រសាសន៍ដូច្នេះថា «កាលណោះ ការប្រកួតប្រជែងវានៅមិនទាន់ខ្លាំងក្លានៅឡើយ ចំណែកឯការរំពឹងចង់បានរបស់អតិថិជនក៏មិនទាន់ខ្ពស់ដែរ នៅពេលនោះ ។ ដូច្នេះ គ្រានោះក្រុមហ៊ុនយើងមានឱកាសច្រើនណាស់ ដើម្បីរៀនធ្វើផង អភិវឌ្ឍសមត្ថភាពខ្លួនឯងនិងសមត្ថភាពរបស់បុគ្គលិកផង ។»

លោកបន្ថែមថា «ខ្ញុំរីករាយនិងមានមោទនភាពដែលមនុស្សជាច្រើនបានប្រើប្រាស់ប្រព័ន្ធរបស់ យើង ហើយយើងបានចូលរួមចំណែកច្រើនគួរឱ្យកត់សម្គាល់ក្នុងការកសាងសង្គមឌីជីថលមួយ និងការធ្វើទំនើបកម្មបច្ចេកវិទ្យា ។» ចំការធ្នុង ជារមណីយដ្ឋានបែបធម្មជាតិមួយដែលមានទំហំផ្ទៃដី ៥ហិកតា ស្ថិត នៅក្នុងដីព្រៃធម្មជាតិតូចៗទំហំ ២០ហិកតា ដែលរួមមានស្ទឹងធម្មជាតិមួយនៅក្នុងនោះដែរ ។ ប្រព័ន្ធទឹកភ្លើងបំពាក់ដោយថាមពលពន្លឺព្រះអាទិត្យ បន្ថែមពីលើអគ្គិសនីដែលផ្គត់ផ្គង់ដោយអាជ្ញាធររដ្ឋ។

គីណូ ហ្វាម មានបន្ទប់ប្រជុំនិងលំហធ្វើការដ៏ធំទូលាយមួយ មានផ្ទះបឹងហ្គាឡូសម្រាប់ស្នាក់នៅចំនួន ៥ និងទីវាលនៅជាប់មាត់ស្ទឹងសម្រាប់ការបោះតង់ដ៏ស្អាត ។ ប្រព័ន្ធទឹកនិងអគ្គិសនីនៅលើមជ្ឈមណ្ឌលនេះរៀបចំឡើងដោយវិស្វករបច្ចេកទេសពីក្រុមហ៊ុន ឧទ័យ ហើយមជ្ឈមណ្ឌលនេះដើរតួនាទីប្រៀបដូចជាមន្ទីរពិសោធន៍មួយសម្រាប់បម្រើដល់ការសិក្សា ស្រាវជ្រាវ និងអភិវឌ្ឍផលិតផល«បច្ចេកវិទ្យាបដិសណ្ឋារកិច្ច ឬHospitaliTech» ថ្មីៗ ដែលអាចជួយសម្រួលនិងជំរុញការរីកចម្រើនលូតលាស់របស់វិស័យទេសចរណ៍និងបដិសណ្ឋារកិច្ច នៅកម្ពុជា។

អ្វីដែលក្រុមហ៊ុនសម្រេចបានក្នុងអំឡុងពេលជាងមួយទសវត្សរ៍កន្លងមកនេះ បានជួយឱ្យក្រុមហ៊ុនអាចមានលទ្ធភាពគិតគូរ អភិវឌ្ឍ និងធ្វើនវានុវត្តន៍ផលិតផលបច្ចេកវិទ្យាច្រើនថែមទៀត ដើម្បីគាំទ្រដល់ឧស្សាហកម្មសក្ដានុពលនានារបស់កម្ពុជា ដូចជា អចលនទ្រព្យ ទេសចរណ៍ និងបច្ចេកវិទ្យា ជាដើម ។

«បច្ចេកវិទ្យាបដិសណ្ឋារកិច្ច»សម្រាប់វិស័យទេសចរណ៍នៅកម្ពុជា នៅពេលសួរថាតើអ្វីបន្ទាប់ទៀតដែល ឧទ័យ ថេកណឡជី លោកនាយកគ្រប់គ្រងបានមានប្រសាសន៍ថា ឥឡូវនេះ ក្រុមហ៊ុនកំពុងផ្ដោតលើការស្រាវជ្រាវអភិវឌ្ឍន៍ផលិតផលថ្មីៗទៀត សម្រាប់វិស័យ«បច្ចេកវិទ្យាបដិសណ្ឋារកិច្ច» ដែលកំពុងមានសក្ដានុពលខ្ពស់ ដូចជា ប្រព័ន្ធគ្រប់គ្រងសណ្ឋាគារ ផ្ទះសំណាក់ ឬបឹងហ្គាឡូ ម៉ាស៊ីនទិញទំនិញដោយស្វ័យប្រវត្តិ និងផ្សេងៗទៀត។

ក្រុមហ៊ុនក៏បានធ្វើការងារជាមួយដៃគូមកពីវិស័យនានា ដូចជា សុខាភិបាល ដឹកជញ្ជូន និង ឡូជីស្ទិក ផងដែរ ដើម្បីជួយសម្រួលដល់ប្រព័ន្ធអេកូឡូស៊ីមួយសម្រាប់វិស័យបច្ចេកវិទ្យាបដិសណ្ឋារកិច្ច ដែលផ្ដល់ប្រយោជន៍ដល់មនុស្សជំនាន់ថ្មី ឬគេហៅថា Gen Z ។

លោកមានប្រសាសន៍ដូច្នេះថា «ការប្រើប្រាស់បច្ចេកវិទ្យានៅក្នុងវិស័យឧស្សាហកម្ម ស្ដាប់ទៅវាមិនចម្លែកទេ ប៉ុន្តែ វាចម្លែកបន្តិចនៅពេលយើងនិយាយថា យើងប្រើប្រាស់បច្ចេកវិទ្យាសម្រាប់វិស័យបដិសណ្ឋារកិច្ច ។ មនុស្សម្នាចង់ចំណាយពេលវេលាលំហែកម្សាន្តជាមួយធម្មជាតិ និងមិនចង់ឃើញបច្ចេកវិទ្យាទេ ។»

លោកបន្ថែមថា «ដូច្នេះ វាជាការលំបាកខ្លាំងដែរ សម្រាប់យើងក្នុងការព្យាយាមប្រើប្រាស់បច្ចេកវិទ្យានៅក្នុងវិស័យបដិសណ្ឋារកិច្ច និងធ្វើឱ្យមានភាពសុខដុមរវាងបច្ចេកវិទ្យានិងបដិសណ្ឋារកិច្ច ។ ប៉ុន្តែ វិស័យនេះពិតជាមានសក្ដានុពលខ្ពស់មែន ។»លោកបានបន្តថា ការប្រើប្រាស់បច្ចេកវិទ្យា កន្លងមក ឃើញថា មានត្រឹមតែការកក់បន្ទប់ តាមអនឡាញនៅក្នុងវិស័យទេសចរណ៍ ហើយក្រុមហ៊ុន ឧទ័យ ថេកណឡជី ចង់ធ្វើឱ្យច្រើនជាងនេះទៀត ដើម្បីជួយជំរុញវិស័យនេះ ។

សម្រាប់ម្ចាស់សណ្ឋាគារ ឬប្រតិបត្តិករទេសចរណ៍ ជាឧទាហរណ៍ គេត្រូវការចាំបាច់នូវអ្វីដែលគេហៅថា adaptive technology គឺបច្ចេកវិទ្យាដែលសម្របទៅតាមភាពជាក់ស្ដែង ពោលគឺ វាមិនមែនជាបច្ចេកវិទ្យាដែលទំនើបខ្លាំងពេក ប៉ុន្តែ ក៏មិនមែនជាបច្ចេកវិទ្យាដែលយឺតពេកនោះដែរ ។ ហើយទាំងអស់នេះ នឹងត្រូវដោះស្រាយតាមរយៈការងារស្រាវជ្រាវនិងអភិវឌ្ឍន៍ដែលក្រុមហ៊ុន ឧទ័យ បាននិងកំពុងផ្ដោតទៅលើ ។

លោក កែវ រស្មី មានប្រសាសន៍បែបនេះថា «ដូច្នេះ នៅ ឧទ័យ ថេកណឡជី យើងបានសហការ ជាមួយ រមណីយដ្ឋានចំការធ្នុង បង្កើតនូវមជ្ឈមណ្ឌលមួយសម្រាប់ឱ្យក្រុមការងារ R&D របស់យើងប្រើប្រាស់ ក្នុងការសិក្សាស្រាវជ្រាវនិងអភិវឌ្ឍផលិតផលបច្ចេកវិទ្យាបដិសណ្ឋារកិច្ចដែលមានសក្ដានុពល។»

លោកបន្ថែមថា «ខ្ញុំជឿជាក់ថា បច្ចេកវិទ្យាបដិសណ្ឋារកិច្ចនេះ នៅពេលយើងអភិវឌ្ឍវាត្រូវ និងប្រើប្រាស់វាត្រូវ នឹងរួមចំណែកដល់ការជំរុញប្រសិទ្ធភាព និងប្រសិទ្ធផលនៃវិស័យទេសចរណ៍ នៅកម្ពុជា ។» ក្រុមហ៊ុន ឧទ័យ ថេកណឡជី បានបង្កើតឡើងនៅឆ្នាំ២០១០ ដោយចាប់ផ្ដើមជាមួយនឹងបុគ្គលិកតែ ១២នាក់ប៉ុណ្ណោះ ។ ក្រុមហ៊ុនផ្ដល់នូវសេវានានា ដូចជា ប្រព័ន្ធគ្រប់គ្រងឌីជីថលទំនើប ដល់ក្រុមហ៊ុនអាជីវកម្មទាំងឡាយ នៅក្នុងវិស័យសុខាភិបាល ឡូជីស្ទិក គណនេយ្យ អប់រំ បដិសណ្ឋារកិច្ច ព្រមទាំងប្រព័ន្ធស្វ័យប្រវត្តិកម្មឧស្សាហកម្ម ផងដែរ ។

បច្ចុប្បន្ន ឧទ័យ ថេកណឡជី បានពង្រីកប្រតិបត្តិការរបស់ខ្លួនជាច្រើនវិស័យ និងមានបុគ្គលិកសរុបជាង ៧០នាក់ ដែលបម្រើការងារនៅក្នុងការិយាល័យទំហំមធ្យមមួយ ស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ៕