ក្រុមហ៊ុន Apple ទើបតែបាន​ប្រកាស​ចេញ​សែស្រឡាយ​ស្មាតហ្វូន​ថ្មី​គឺ iPhone 14 និង iPhone 14 Plus ពណ៌លឿង ដែល​ផ្តល់នូវជម្រើស​បន្ថែមសម្រាប់​អតិថិជនខ្លួន ហើយ​មកជាមួយ​លក្ខណៈសម្បត្តិ​ពិសេសជាច្រើន ក្នុងនោះ​អ្វីដែលគួរឱ្យកត់សម្គាល់​បំផុតគឺ Apple អួតអាងថា ថ្ម​របស់​ iPhone 14 Plus នេះ គឺ​បំពាក់​ថ្ម​ដែល​អាច​ប្រើប្រាស់​បានយូរ​ជាង iPhone ណាៗទាំងអស់។ តែយ៉ាងណា Apple មិនបានបញ្ជាក់ពីទំហំថ្មវាឡើយ។

​iPhone 14 មាន​អេក្រង់​ទំហំ ៦,១អ៊ីញ និង iPhone 14 Plus ទំហំ ៦,៧អ៊ីញ ភ្ជាប់មក​ជាមួយកញ្ចក់ការពារ​ដ៏រឹងមាំ​ផងដែរ​ជាប្រភេទ Ceramic Shield ជាមួយ​កម្រិតបង្ហាញ​រូបភាពភ្លឹហ្មត់ច្បាស់ Super Retina XDR ជាមួយបច្ចេកវិទ្យា OLED។

ម៉ូឌែល​ស្មាតហ្វូនទាំងពីរ បំពាក់ប្រព័ន្ធ​កាមេរ៉ាភ្លោះ ក្នុងនោះកាមេរ៉ាមេ មានសេនស័រ​កាន់តែធំ​ដែល​ថតចាប់យករូបភាព​ បានរហ័ស​ និងច្បាស់។ ឯកាមេរ៉ាខាងមុខត្រូវបានអភិវឌ្ឍថ្មី TrueDepth ដែល​វា​នឹង​ Focus អូតូ ទៅលើ​វត្ថុ​ចម្រុះ​ដែល​ស្ថិតនៅគម្លាតពីគ្នាបានយ៉ាងល្អទៀតផង។ ចំពោះការថតវីដេអូ អាចជ្រើសរើស​ការថត​បែប Action និង Cinematic ដែល​គាំទ្រ​ដល់ការ​ថត​ក្នុងកម្រិត 4K30fps និង 4K24fps។

ជាមួយគ្នានេះ iPhone 14 និង 14 Plus ពណ៌លឿង នៅតែមានមុខងារភ្ជាប់​ផ្កាយរណបដែល​អាច​ខល និងផ្ញើសារក្នុង​ពេល​ស្ថិតនៅតំបន់​គ្មានសេវា (Emergency SOS via satellite)។ បន្ថែមលើសនេះ Apple ប្រកាសថា ខ្លួនបានពង្រីកដល់ ៦ប្រទេសហើយ ដែល​អាចប្រើមុខងារ​នេះបាន រួមមាន អាមេរិក កាណាដា បារាំង អាល្លឺម៉ង់ អៀរឡង់ និង​អង់គ្លេស៕