Apple នឹង​បន្ត​ចេញ​ស៊េរី iPhone 15 ចំនួន ៤ម៉ូឌែល​ក្នុង​ឆ្នាំ​២០២៣នេះ ដូចស៊េរី iPhone 14 ដែរ គឺមានដូចជា iPhone 15, iPhone 15 Plus, iPhone 15 Pro និង iPhone 15 Pro Max។

ចំពោះអេក្រង់​របស់ iPhone 15 pro និង Pro Max នឹង​មាន​អេក្រង់ ដូច​ iPhone ឆ្នាំ​២០២២ដែរ ដោយមាន​ទំហំ ៦,១អ៊ីញ និង ៦,៧អ៊ីញ ប៉ុន្តែវា​នឹង​មាន​ការ​អាប់ដេត​លើ​ការឌីហ្សាញ​ថ្មីដូចជា កាន់តែស្តើងជាងមុន គែម bezel រាងកោង និង​​តួទូរសព្ទ​ជា​ប្រភេទ​ទីតានីម ដែល​មាន​ទម្ងន់ស្រាល​ជាងមុន តែរឹងមាំជាង ហើយ​ក៏ថ្លៃ​ជាងមុនដែរ។

ក្រៅពីនេះ Apple អាច​នឹងដាក់​ប៊ូតុងថាច់ (solid state button) ជំនួស​ប៊ូតុង​ចុច​ធម្មតា (physical button) សម្រាប់​ iPhone 15 Pro ស៊េរីឆ្នាំ​២០២៣នេះផងដែរ។ ការ​បំពាក់​ប៊ូតុង​ប្រភេទនេះ គឺនឹង​ជួយ​ការពារ​ដីធូលី និងការជ្រាបទឹក កាន់តែប្រសើរឡើង។

ឈីបថ្មីគឺ A17 នឹង​ត្រូវបំពាក់​ក្នុង​ខ្លួន iPhone 15 Pro និង Pro Max។ ដោយឡែក iPhone 15 និង 15 Plus នឹង​បន្ត​ប្រើឈីប A16 ដូច iPhone 14 Pro និង Pro Max ដដែល។ តែយ៉ាងណាក៏ដោយ គ្រប់​ iPhone 15 ទាំងអស់ នឹង​មាន Dynamic Island ដូចគ្នា ហើយ​ទំនង​ជាប្តូរពីរន្ធ Lightning ទៅជារន្ធ USB-C វិញ។

ជាមួយគ្នានេះ វា​ក៏​បំពាក់​លេន​ telephoto ប៉ុន្តែ iPhone 15 Pro Max នឹង​មាន​ លេន periscope ដែលអាចហ្ស៊ូមអុបទិក 6x ពោលគឺ​ប្រសើរជាង iPhone 14 Pro ដែលហ្ស៊ូមបាន 3x ប៉ុណ្ណោះ៕