RAM បានប្រកាស​ថា រថយន្ត​ភីកអាប់​អគ្គិសនី​ទីមួយរបស់​ខ្លួន​មានឈ្មោះថា 1500 REV ដែលគ្រោង​នឹងផលិត​នៅឆ្នាំ​ក្រោយ។ ការដាក់​ឈ្មោះរថយន្ត​នេះ គឺជាជំហាន​ចុងក្រោយបំផុតរបស់ RAM ក្នុងការ​ឆ្ពោះទៅរក​រថយន្តប្រភេទអគ្គិសនី ដែល​ចាប់ផ្តើម​មានការពេញនិយមកាន់តែខ្លាំង​ក្នុងទីផ្សារ។

លោក Mike Koval Jr. នាយកប្រតិបត្តិ​ Ram បញ្ជាក់ថា ក្រុមហ៊ុន​នឹង​បញ្ជូន​រថយន្តភីកអាប់​អគ្គិសនី​ទីមួយ​ RAM 1500 REV នេះ ទៅឱ្យ​អតិថិជន​ក្នុងឆ្នាំ​២០២៤។ «យើងមាន​ទំនុកចិត្តថា RAM 1500 REV នឹង​ជំរុញ​ដល់ការប្រកួតប្រជែង ផ្តល់នូវអ្វី​​ដែលជាភាព​ឈានមុខ​ក្នុងការយកចិត្តទុកដាក់​ចំពោះ​អតិថិជន​ ដូចជា ចម្ងាយបើកបរ ការផ្ទុកទំនិញ ការអូសសណ្តោង និង​ការសាកលឿនជាដើម»។

បើតាម​ការអះអាងរបស់ RAM កាលពីពេលកន្លងមក បង្ហាញ​ថា ភីកអាប់​អគ្គិសនីទីមួយរបស់ខ្លួន នឹង​មាន​ចំណុចលេចធ្លោលើសគេ បើប្រៀបធៀបនឹងគូប្រជែងធំៗ ដូចជា Ford F-150 Lightning និង Chevrolet Silverado ទៅលើចម្ងាយ​នៃការបើកបរ​រាល់ពេល​សាកភ្លើងពេញ​ម្តងៗ។ ប៉ុន្តែយ៉ាងណាមិញរហូតមកដល់ពេលនេះ RAM នៅ​មិនទាន់បាន​បញ្ជាក់​ពីទំហំអាគុយ​ និង​ម៉ាស៊ីន​របស់វា​នៅឡើយទេ។

បន្ថែមលើសនេះ RAM 1500 REV នឹង​បំពាក់​បច្ចេកវិទ្យា​ដែល​មិនងាយ​ឱ្យអាគុយ​ឆាប់ខូចនៅពេល​ដឹកធ្ងន់ ឬអូសសណ្តោងធ្ងន់ឡើយ។ រថយន្ត​នេះ នឹង​ត្រូវអភិវឌ្ឍ​លើគ្រោងឆ្អឹង STLA៕