ប្រទេស​កម្ពុជា បាន​ក្លាយទៅជា​មេដែក​ទាក់ទាញ​អ្នក​វិនិយោគ​មក​បោះ​ទុន​​សាងសង់​រោងចក្រ​ជា​ច្រើន ក្នុង​នោះ​គេ​ឃើញ​ថា វិនិយោគិន​ ចាប់អារម្មណ៍​លើ​វិស័យ​យាន​យន្ត​បាន​ធ្វើ​ឲ្យ​វិស័យឧស្សាហកម្មយានយន្ដក្នុងប្រទេសបច្ចុប្បន្ន កំពុងតែរីកដុះដាលជាលំដាប់ ខណៈដែល​ថ្មីៗនេះ​ គណៈកម្មាធិការវិនិយោគកម្ពុជា បានសម្រេចចេញវិញ្ញាបនបត្រចុះបញ្ជីជូនដល់ ក្រុមហ៊ុន GTV MOTOR CO., LTD. លើគម្រោងបង្កើតរោងចក្រដំឡើងរថយន្តថ្មីមួយទៀត​ ដែល​នេះគឺជារោងចក្រផ្គុំនិងដំឡើងរថយន្ដទី​ ៥ ឈានជើងមកវិនិយោគលើទឹកដីកម្ពុជា។

យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយ​កាល​ពីថ្ងៃ​ទី១៧ ខែ​មិថុនា ឆ្នាំ​២០២២​ បានឱ្យដឹងថា ក្រុមហ៊ុន GTV MOTOR CO., LTD. នឹងដំណើរការដំឡើងរថយន្តចំនួន ៣ ស្លាកយីហោ រួមមានរថយន្តចិន​ម៉ាក​ DONGFENG ចំនួន១០ប្រភេទ, រថយន្ត SOUEST ចំនួន៤ប្រភេទ និងរថយន្ត FAW ចំនួន៥ប្រភេទ។​

រោងចក្រនោះ នឹង​បោះទីតាំងវិនិយោគស្ថិតនៅអគារលេខ ៦A និង ៦B ផ្លូវជាតិលេ៣ ភូមិអង្រ្គង ឃុំអង្គពពេល ស្រុកគងពិសី ខេត្តកំពង់ស្ពឺ ដោយមានទុនវិនិយោគប្រមាណ ១៥,៦លានដុល្លារអាមេរិកនិងអាចបង្កើតការងារបានចំនួន ៧៣៨ កន្លែង។

រំឮកដែរថា ក្រុមហ៊ុន​រថយន្ត​លំដាប់​អន្តរជាតិ​ចំនួន​ ៤ ផ្សេងទៀតមានដូចជា ក្រុមហ៊ុន HGB Motor, ក្រុមហ៊ុន EM Automobile Co., Ltd., ផ្ដោតលើ រថយន្ដធុនធ្ងន់, ក្រុមហ៊ុន K (CAMBODIA) CO., LTD បោះទុនវិនិយោគប្រមាណ ៧,៣ លានដុល្លារអាមេរិកលើ គម្រោងបង្កើតរោងចក្រផ្គុំដំឡើងរថយន្ត អ៊ីស៊ូហ្ស៊ុ (ISUZU) លើ​​ទីតាំងស្ថិតនៅភូមិសង្គ្រោះជាតិ ឃុំត្រពាំងគង ស្រុកសំរោងទង ខេត្ត​កំពង់ស្ពឺ និងក្រុមហ៊ុន RMA Cambodia បានចាប់ផ្តើមដំណើរការផលិតកម្មរថយន្ត Ford ដែលជាក្រុមហ៊ុនដំឡើងរថយន្តទី១នៅក្នុងប្រទេសកម្ពុជា មានទីតាំងស្ថិតនៅភូមិសាវ័ន ឃុំស្នាអន្យា ស្រុកក្រគរ ខេត្តពោធិ៍សាត់ លេច​ចេញ​ជា​រូប​រាង​ហើយ​កាលពីថ្ងៃទី១៦ ខែមិថុនា ឆ្នាំ២០២២៕

អត្ថបទ៖ រក្សា