បានទៅគេទៀតហើយ! ក្រុមហ៊ុនបច្ចេកវិទ្យា Xiaomi សង់រោងចក្រផលិតទូរសព្ទទំនើបៗនៅវៀតណាម

2022-06-02 05:02:20
ព័ត៌មាន

2022-06-02 05:02:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតស្មាតហ្វូនទំនើបៗ Xiaomi បានចុះផ្សាយជាផ្លូវការថា រោងចក្រថ្មីសន្លាងមួយទៀត បានចាប់ផ្ដើមដំណើរការសង្វាក់ផលិតកម្មរបស់ខ្លួនរួចរាល់ហើយ និងបានចេញលក់ជាលើកដំបូងស្មាតហ្វូនផលិតនៅប្រទេសវៀតណាម។

សកម្មភាពកម្មករជំនាញកំពុងពិនិត្យគុណភាពក្នុងរោងចក្រ Xiaomi

យោងតាមប្រភពព័ត៌មានបានឲ្យដឹងថា រោងចក្រនោះមានទីតាំងនៅភាគខាងជើងខេត្ត Thai Nguyen ។ ចំពោះផលិតផលស្មាតហ្វូនដែលវេចខ្ចប់ដោយអក្សរ “Xiaomi-Made in Vietnam” នឹងត្រូវគ្រប់គ្រងដោយ DBG Technology ស្ថិតនៅក្រោមក្រុមហ៊ុនវិនិយោគឈ្មោះ Hong Kong's DBG Electronics Investment Limited ។

លើសពីនេះស្មាតហ្វូនទំនើបៗរបស់ Xiaomi ដែលផលិតបាន នឹងត្រូវចែកចាយទៅតាមបណ្ដាប្រទេសតំបន់អាស៊ីអាគ្នេយ៍មានដូចជា ថៃ និងម៉ាឡេស៊ី ជាទីផ្សារគោលដៅធំ ព្រមទាំងសម្រាប់ផ្គត់ផ្គង់តម្រូវការទីផ្សារក្នុងស្រុកនៅទូទាំងប្រទេសវៀតណាម។

លោក Nguyen Duc Trong នៃក្រុមហ៊ុន DigiWorld ដែលជាក្រុមហ៊ុនទទួលសិទ្ធិលក់ស្មាតហ្វូន Xiaomi នៅប្រទេសវៀតណាមយល់ឃើញថា៖ «នេះគឺជាឱកាសដ៏ល្អប្រសើរក្នុងការចាប់ផ្ដើមជំហានថ្មី ទោះបីយើងស្ថិតក្នុងបរិបទជំងឺកូវីដ-១៩ ដែលបន្តជះផលប៉ះពាល់ដល់ក្រុមហ៊ុនផលិតស្មាតហ្វូនទាំងអស់ រួមទាំង Xiaomi នៅវៀតណាមផងដែរ។ បើមើលលើតួលេខជាទិន្នន័យចេញផ្សាយដោយស្ថាប័នជំនាញ Counterpoint ក្រុមហ៊ុន Xiaomi មានចំណែកទីផ្សារធំបំផុតលំដាប់ទីពីរនៅវៀតណាមក្នុងឆ្នាំ ២០២១ និងកំពុងបន្តឈរលេខពីរដដែលនៅឆ្នាំនេះ។ »

ស្មាតហ្វូន Xiaomi ភាគច្រើនត្រូវបានផលិតនៅក្នុងប្រទេសចិន និងឥណ្ឌា ដោយដៃគូផលិតរបស់ខ្លួនរួមមាន Foxconn, DBG, BYD និង Flex ។ ដោយឡែកសម្រាប់ទីផ្សារប្រទេសកម្ពុជានៅមិនទាន់មានប្រភពណាមួយបញ្ជាក់ពី Xaiomi ថាតើកម្ពុជានឹងក្លាយជាទីផ្សារគោលដៅបន្ទាប់ដែលនឹងនាំចូលស្មាតហ្វូន “Xiaomi-Made in Vietnam” ឬក៏អត់នោះឡើយ សូមរង់ចាំភាគបន្ត៕