ក្រុមហ៊ុន Kia បាន​បញ្ចេញ​រថយន្ត​ថ្មីគឺម៉ូដែល Soul ឆ្នាំ២០២៣ ដែល​មានការកែប្រែរូបរាង​ខាងក្រៅ​ខុសពីស៊េរីមុន និងបន្ថែម​ពណ៌ថ្មីផងដែរ ប៉ុន្តែគួរឱ្យសោកស្តាយ​វាមិនមានជម្រើស​ម៉ាស៊ីនទាក់បូ​ទៀតឡើយ។

រថយន្តនេះ មានការ​ឌីហ្សាញ​ផ្នែក​ខាងមុខ​ដ៏គួរទាក់ទាញ​ពិសេសផ្នែកប៉ាណា ហើយចង្កៀង​ជាប្រភេទ LED ប៉ុន្តែវាមិនមាន​ចង្កៀង​ផ្នែកខាងក្រោមមួយទៀត​ដូចស៊េរីមុននោះទេ កាងខាងមុខក៏កែថ្មី​រំលេច​ដោយ​អំពូល Daytime running light រាងស្លីម។ ក្រៅពីនោះ វាបំពាក់​យ៉ាន់កង់ alloy ទំហំ ១៧ និង ១៨អ៊ីញ ដែល​ជាការផ្លាស់ប្តូរថ្មីផងដែរ។ ចង្កៀងក្រោយ​ គឺមាន​រាង​ស្លីម​វែងក្នុងទម្រង់​ជាអក្សរ L ដ៏ស្រស់ស្អាត។ វាមានជម្រើសពណ៌២ គឺ ស និង ខៀវ។

ផ្នែក​ខាងក្នុងវិញ វា​បំពាក់​ប្រព័ន្ធកម្សាន្ត Touchscreen ទំហំ ១០,២៥អ៊ីញ ប្រព័ន្ធ​សំឡេង Harman/Kardon ជាមួយភ្លើង Speaker LED និងមានមុខងារ​កម្តៅពូកខាងមុខ។ វាក៏ភ្ជាប់​មកជាមួយប្រព័ន្ធសុវត្ថិភាព​ស្តង់ដា ADAS ផងដែរ។

Kia Soul 2023 មានជម្រើស option ដូចជា LX, S, EX, GT-Line និង GT-Line Tech។ ចំណែក option X-Line និង Turbo មិនមាន​សម្រាប់​រថយន្តស៊េរី​ថ្មីនេះឡើយ។ ជាមួយវា​ប្រើម៉ាស៊ីនធម្មតា គឺម៉ាស៊ីនស៊ីឡាំង៤ ចំណុះ ២,០លីត្រ ផលិតបាន​កម្លាំង ១៤៧សេះ និង​កម្លាំង​រមួល ១៧៨ញ៉ូតុនម៉ែត្រ ដំណើរការ​ជាមួយប្រអប់​លេខ CVT រត់ប៉ុងមុខ។

យ៉ាងណាមិញ ចំពោះ​តម្លៃវាគឺ​ក្រុមហ៊ុន Kia មិនទាន់​បាន​ទម្លាយឱ្យដឹង​នៅឡើយទេ៕