រថយន្ត​ Suzuki XL7 ឆ្នាំ​២០២២ បាន​បន្ថែម​គ្រឿងលេងបែបស្ព័រ​ និង​បន្ថែម​ជម្រើសពណ៌ ទឹកក្រូច-ខ្មៅ និង​ ស-ខ្មៅ ត្រូវបាន​ដាក់​លក់​ក្នុងប្រទេសថៃ ដែលមានតម្លៃ​ចាប់ពី ៧៨៩ ០០០បាត ឬជាង ២៣ ០០០ដុល្លារ។

រថយន្ត​ប្រភេទ SUV នេះ បំពាក់​ចង្កៀង​ LED និង​អំពូល daytime running light អំពូលកាត់អ័ព្ទ កញ្ចក់ចំហៀងមើលក្រោយអាចបត់បាន ដៃទ្វារក្រូមេ កង់ alloy ទំហំ១៦អ៊ីញ និង​ជាពិសេស​បំពាក់បន្ថែម​កាងដំបូល។

ផ្នែក​កាប៊ីន រថយន្ត​នេះ​មានកៅអី៣ជួរ ឬ ៧កៅអី ដោយ​កៅអីជួរទី២ អាចបត់ ឬរុញ​មកមុខបាន​ ដើម្បីឱ្យ​អ្នកដំណើរ​អាចទៅអង្គុយនៅកៅអីជួរទី៣ ហៅ​កៅអីជួរទី៣នេះទៀតសោត ក៏អាចបត់បានដើម្បីដាក់ឥវ៉ាន់បាន​ច្រើន។ វាបំពាក់​ប្រព័ន្ធកម្សាន្ត Touchscreen ដែល​អាចភ្ជាប់​ជាមួយ​ Apple Carplay និង Android Auto ដោយមានឌុយ USB និង HDMI ហើយកុងទ័រ​ជាប្រភេទឌីជីថល​ LCD ព្រមទាំងមានម៉ាស៊ីនត្រជាក់​ក្រោយ និងស្វ័យប្រវត្តិ​ទៀតផង។

រថយន្ត​នេះ ប្រើ​ម៉ាស៊ីនសាំងស៊ីឡាំង៤ ចំណុះ ១,៥លីត្រ ផលិតបាន​កម្លាំង ១០៥សេះ និង​កម្លាំងរមួល ១៣៨ញ៉ូតុនម៉ែត្រ ជាមួយប្រអប់លេខអូតូ៤វគ្គ៕

ចំពោះ​ប្រព័ន្ធ​សុវត្ថិភាព​វិញ រថយន្ត Suzuki XL7 បំពាក់​ប្រព័ន្ធ​គ្រប់គ្រង​លំនឹង​អេឡិចត្រូនិច (ESP), ប្រព័ន្ធ​ជំនួយ​ពេល​ឡើងចំណោត, ប្រព័ន្ធហ្វ្រាំង ABS/EBD, កាម៉េរាមើលក្រោយ និង​សេនស័ររ៉ឺយែរជាមួយ​សំឡេងរោទិ៍​ជាដើម៕