លោក Mykhailo Fedorov រដ្ឋមន្រ្តីក្រសួងបច្ចេកវិទ្យាអ៊ុយក្រែន បាន​សរសេលិខិតស្នើសុំទៅកាន់​ក្រុមហ៊ុន ICANN ឲ្យជួយផ្ដាច់សេវាអ៊ីនធឺណិតនៅ រុស្ស៊ី ដោយលើក​ហេតុផល​ថា ពលរដ្ឋទាំងក្មេងនិងចាស់រងទុក្ខសោកដោយសារ ការវាយប្រហារនៃកងទ័ពរុស្ស៊ី ក៏ដូចជា ការវាយប្រហារតាមអ៉ឺនធើណិតដោយក្រុម Hacker យ៉ាងដំណំមកលើហេដ្ឋារចនាសម្ព័ន្ធទូរគមនាគមន៍នៅក្នុងប្រទេសរបស់លោក។ ICANN ឬពាក្យពេញ Internet Corporation for Assigned Names and Numbers បង្កើតឡើងតាំងពីឆ្នាំ​១៩៩៨ មានទីស្នាក់ការកណ្ដាលនៅក្នុងទីក្រុង Los Angeles រដ្ឋកាលីហ្វរញ៉ា សហរដ្ឋអាមេរិក។

សំណើររបស់រដ្ឋមន្រ្តីវ័យ ៣១ ឆ្នាំរូបនោះមានចំនួនបី ខ គឺទីមួយ៖ ស្នើបិទជាបណ្ដោះអាសន្ននូវ domain គេហទំព័រណាដែលបញ្ចប់ដោយ “.ru”, “.рф”និង “.su” ជាប្រភេទគេហទំព័ររដ្ឋសហព័ន្ធ រុស្ស៊ី។ ទីពីរ៖ ស្នើផ្អាក SSL Certificates ទាំងអស់នៃគេហទំព័ររបស់រដ្ឋសហព័ន្ធ រុស្ស៊ី និងទីបី៖ ស្នើសុំបិទចោល DNS root Server ជាស្ពានភ្ជាប់អ៊ឺនធើណិតនៅសហព័ន្ធរុស្ស៊ី ដែលមាន Address ដូចជា៖ Saint Petersburg, RU(IPv4 199.7.83.42) និង Moscow, RU(199.7.83.42,3) ។

ជាការឆ្លើយតបភាគីក្រុមហ៊ុន ICANN បាន​បដិសេធនូវសំណើរទាំងបី ខ ដោយប្រាប់មូលហេតុថា មិនអាចធ្វើទៅរូចទេ ព្រោះអ្វីដែលភាគី អ៊ុយក្រែនបានស្នើឡើងនោះគឺជាប្រភេទ SSL Certificate បង្កើតដោយ Third Party ដោយក្រុម​អ្នកជំនាញរុស្ស៊ី ហើយ ICANN មិនបានចូលរួមឡើយ។ រីឯលក្ខខណ្ឌទី៣ រឹតតែមិនអាចធ្វើទៅបានព្រោះ Root Server System ទាំងនោះជាលក្ខណៈបច្ចេកទេស វាដំណើការដោយប្រព័ន្ធឯករាជ្យ និងមានស្ថាប័នពាក់ព័ន្ធជាច្រើនផ្សេងៗទៀត។

លើសពីនេះនៅមានករណីអាចមួយទៀតគឺថា បើសិនជា​ផ្ដាច់សេវាអ៊ីនធើណិតពីរុស្ស៊ីធ្វើឲ្យស្ថាប័ន ICANN ខ្លួនឯងក៏ជួបហានិភ័យដោយពាក្យបច្ចេកទេស​ជាភាសាអង់គ្លេសថា «Splinternet» សំដៅដល់ក្រុម Cyber-balkanization ដែលវានឹងជះឥទ្ធិពលអាក្រក់ទៅលើវិស័យផ្សេងរួមមាន៖ វិស័យបច្ចេកវិទ្យា វិស័យពាណិជ្ជកម្មតាមអ៉ឺនធើណិត, វិស័យនយោបាយ, ជាតិ និងសាសនា ជាដើម។

ឈ្មោះ ICANN គឺជាសម្ព័ន្ធក្រុមហ៊ុនដ៏ធំមួយដើរតួនាទីស្ថាប័នមេអ្នកចែកចាយ IP Address គ្រប់គ្រងប្រព័ន្ធការផ្ដល់ Domain Name និងសេវាអឺនធើណិតទាំង Software និង Hardware ធំជាងគេនៅរុស្ស៊ី និងអឺរ៉ុប។ រៀបរាប់ឲ្យងាយយល់ បើសិនចង់ផ្ដាច់សេវាអ៉ឺនធើណិតខ្សែមេ នៅក្នុងប្រទេសរុស្ស៊ី និងប្រទេសតំបន់ អឺរ៉ុបដទៃផ្សេង ត្រូវស្នើសុំនិងឆ្លងកាត់ស្ថាប័នបងធំមួយនេះជាមុនសិន។

ទោះបីជា ICANN មានឥទ្ធិពលអាចបិទ Address “.ru” ជាបណ្ដោះអាសន្នក៏ដោយ ប៉ុន្តែពួក​គេ​មិនអាច ផ្ដាច់អ៉ឺនធើណិតនៅរុស្ស៊ី ទាំងស្រុងតាមការស្នើសុំបានឡើយ។ រីឯប្រទេស រុស្ស៊ី ក៏មានបណ្ដាញអ៊ឹនធើណិតផ្ទាល់ខ្លួន មិនពឹងនរណាដែរតាំងពីដើមមក។

ក្រោយចាកចេញនិងបិទសេវាកម្មជាបន្តបន្ទាប់យ៉ាងតិចណាស់មានក្រុមហ៊ុនចំនួន ២៥០ សម្រេចផ្អាកសេវាកម្ម និងមានខ្លះដកខ្លួនឈប់ធ្វើអាជីវកម្មនៅ រុស្ស៊ី មានទាំងក្រុមហ៊ុនផលិត​រថយន្ត ក្រុមហ៊ុនផ្ដល់សេវាកម្មអ៉ឺនធើណិត និយាយរួមស្ទើរតែគ្រប់វិស័យទាំងអស់៕

ប្រែសម្រួលដោយ៖ រក្សា | ប្រភព៖ Tectonic