RAM បាន​បង្ហាញ​ចេញ​នូវ​រថយន្តវ៉ែន​ថ្មីរបស់ខ្លួន គឺម៉ូដែល ProMaster ឆ្នាំ​២០២៣ ដែល​មកជាមួយនឹង​រូបរាងថ្មី បច្ចេកវិទ្យាថ្មី ត្រៀមចូល​ប្រកួត​ក្នុងទីផ្សារ​ នៅ​អំឡុងត្រីមាសទី៣ ឆ្នាំ​២០២២​ខាងមុខ។

រថយន្ត​វ៉ែន​នេះ បំពាក់​ចង្កៀងប្រភេទ Halogen ដែល​ជះពន្លឺបានឆ្ងាយ និង​មាន​អំពូលកាត់អ័ព្ទផងដែរ។ វាមាន​បំពាក់​បន្ថែម​នូវធ្នើ​លើដំបូលរថយន្ត។ ចំណែក​ផ្នែក​ខាងក្នុងវិញ រថយន្ត RAM នេះ បំពាក់​ប្រព័ន្ធ​កម្សាន្ត Touchscreen ទំហំ ៧ ដល់ ១០អ៊ិញ និង​កុងទ័រ​ឌីជីថល។

រថយន្ត RAM ProMaster ឆ្នាំ​២០២៣ ប្រើម៉ាស៊ីន Pentastar V6 ចំណុះ ៣,៦លីត្រ ផលិត​បាន​កម្លាំង ២៧៦សេះ និង​កម្លាំង​រមួល ៣៣៩ញ៉ូតុនម៉ែត្រ ជាមួយ​នឹង​ប្រអប់លេខអូតូ ៩វគ្គ។ កម្លាំងម៉ាស៊ីនប៉ុណ្ណេះ វា​អាច​អូសសណ្តោងបាន ៣តោន និង​ដឹកឥវ៉ាន់បាន ២តោន។

រថយន្ត​វ៉ែន​ខាងលើ​នេះ បាន​បំពាក់​ជាមួយ​ប្រព័ន្ធ​សុវត្ថិភាព​ដូចជា ​ប្រព័ន្ធឱ្យសញ្ញាពេល​មាន​ឧបសគ្គខាងមុខ, កាមេរ៉ាក្រោយ​មាន​ខ្សែ gridline, ហ្វ្រាំងស្វ័យ​ប្រវត្តិ​ក្រោយប៉ះទង្គិច​គ្នា ដើម្បី​កុំឱ្យបន្តទៅប៉ះយានយន្តដទៃទៀត, មុខងារ​សម្គាល់​សញ្ញាចរាចរណ៍, ហ្វ្រាំង​ចំណត​អេឡិចត្រូនិច។ លើសពីនេះ វាបាន​បន្ថែមប្រ័ពន្ធ​ជំនួយ​ Parallel and Perpendicular Park Assist ដែល​ប្រើសេនស័រក្នុងការ​ចូលចត និង​ចេញ​ពីចំណត៕