ក្រុមហ៊ុន​រថយន្ត​មួយទៀតហើយ ដែលសម្រេចចិត្ត​បោះបង់ម៉ាស៊ីន V8 គឺ Nissan ដែល​រថយន្ត​ថ្មី​របស់​ក្រុមហ៊ុននេះ ម៉ូដែល Armada ឆ្នាំ២០២៤ ត្រូវបានរាយការណ៍ថា នឹង​ប្រើម៉ាស៊ីន V6 Twin-Turbo ជំនួសវិញ។

ការទម្លាក់​កម្លាំងម៉ាស៊ីននេះ គឺ​កើតមានរួចមកហើយ នៅលើ​រថយន្ត​ Toyota Sequoia, Lexus Lx600 និង Ford Expedition ដែលសុទ្ធតែទម្លាក់​ម៉ាស៊ីនមកនៅត្រឹម V6 Twin-Turbo។

ជាមួយ​នឹង​ម៉ាស៊ីនទាបជាមុនហើយ​បំពាក់បច្ចេកវិទ្យា Turbo គឺវា​នឹង​ជួយ​ឱ្យរថយន្ត​សន្សំសំចៃសាំងជាងមុន​ផងដែរ ប៉ុន្តែនៅតែអាចរក្សាកម្លាំងសេះ និងកម្លាំងរមួល មិនចាញ់​ម៉ាស៊ីន V8 នោះទេ។ សូមបញ្ជាក់​ថា Nissan Armada ដែលប្រើម៉ាស៊ីន V8 បច្ចុប្បន្ន គឺ​ស៊ីសាំងប្រមាណ ១៤លីត្រក្នុង១០០គីឡូម៉ែត្រ។

គួរកត់សម្គាល់ថា ការប្រើម៉ាស៊ីន​សាំង​ ឬម៉ាស៊ូតធំៗលើរថយន្ត មិនថានៅអឺរ៉ុប ឬសហរដ្ឋអាមេរិកនោះទេ គឺ​ត្រូវបានកាត់​បន្ថយ និងលុបបំបាត់​ជាបណ្តើរ ដោយសារតែកត្តាមួយចំនួន​ដូចជា ថ្លៃដើម ច្បាប់ ផលប៉ះពាល់​បរិស្ថាន ការប្រកួត​ប្រជែង ពិសេស​ការ​ហូរចូល​នូវរថយន្តអគ្គិសនី។

Nissan បាន​បញ្ជាក់​​ថ្មីៗនេះថា ខ្លួន​នឹង​បញ្ឈប់​ការផលិតរថយន្ត​ដែលប្រើសាំង​នៅតំបន់អឺរ៉ុប អំឡុងឆ្នាំ២០២៥ ដោយ​ផ្តោតទៅលើ​ការ​ផលិត​រថយន្ត​អគ្គិសនី​ជំនួសវិញ៕