ថ្វីបើក្រុមហ៊ុន Chevrolet មិនទាន់មានរថយន្តដែលអាចទៅប្រកួតប្រជែងផ្ទាល់ ជាមួយ Ram 1500 TRX ប៉ុន្តែវាមានម៉ូដែល Silverado ZR2 ដែលអាចយកទៅប្រៀបធៀបជាមួយ Ford F-150 Raptor បានដែរ។

ជាមួយនឹងការបំពាក់ម៉ាស៊ីន V8 មានកម្លាំង ៤២០សេះ រថយន្ត Chevrolet Silverado ZR2 ឆ្នាំ២០២២ ត្រូវបានគេចាត់ទុកថា ជាភីកអាប់ខ្នាតធំដែលមានសមត្ថភាពអស្ចារ្យមួយ។

ទោះជាយ៉ាងណាក៏ដោយ ក្រុមហ៊ុន Chevrolet មិនទាន់បានប្រកាសចេញនូវតម្លៃរបស់វាជាផ្លូវការឡើយ ប៉ុន្តែបើយោងតាមប្រភពជិតស្និទបានបង្ហាញថា Chevrolet Silverado ZR2 ឆ្នាំ២០២២ នឹងមានតម្លៃថ្លៃជាង Ford F-150 Raptor ទៅទៀត។

យោងតាមប្រភពខាងលើអះអាងថា Silverado ZR2 ឆ្នាំ២០២២ នឹងត្រូវដាក់លក់ក្នុងតម្លៃចាប់ពី ៦៥ ១០០ដុល្លារ សម្រាប់ទីផ្សារសហរដ្ឋអាមេរិក ដែលថ្លៃជាង Ford F-150 Raptor ឆ្នាំ២០២១ ប្រហែល ១ ០០០ដុល្លារ (តម្លៃ ៦៤ ១៤៥ដុល្លារ)។

ការប្រៀបធៀបរវាង Silverado ZR2 ឆ្នាំ២០២២ និង F-150 Raptor ឆ្នាំ២០២១ នេះ ក៏ដោយសារតែ F-150 Raptor ឆ្នាំ២០២២ មិនទាន់ចេញតម្លៃលក់ជាផ្លូវការនៅឡើយទេ ប៉ុន្តែវាទំនងជាថ្លៃជាងស៊េរីចាស់បន្តិច។

ដោយឡែក ចំពោះ Ram 1500 TRX វិញ គឺខុសគ្នាឆ្ងាយតែម្តង ដោយវាមានតម្លៃចាប់ពី ៧៣ ៣៨០ដុល្លារ ប៉ុន្តែមានបំពាក់ម៉ាស៊ីន V8 ដែលបង្កើតកម្លាំងបានសរុប ៧០២សេះឯណោះ៕