ភាគហ៊ុន Apple បានបំបែកកំណត់ត្រាតម្លៃខ្ពស់បំផុតមិនធ្លាប់ ខ្ពស់ជាងកាលពី Apple បញ្ចេញកំពូលទូរសព្ទ iPhone ទៅទៀត ដោយគិតត្រឹមថ្ងៃបិទផ្សារទី២២ ខែវិច្ឆិកា ឆ្នាំ២០២១ ភាគហ៊ុនរបស់យក្សបច្ចេកវិទ្យាអាមេរិចនេះ មានតម្លៃដល់ទៅ ១៦១,០២ដុល្លារ ក្នុងមួយហ៊ុន។ នេះបើយោងទៅតាម សន្ទស្សន៍ផ្សារភាគហ៊ុន NASDAQ: AAPL។

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

ហេតុផលស្នូលដែលរុញតម្លៃភាគហ៊ុន Apple បណ្ដាលមកពី ដំណឹងចចាមអារ៉ាមថ្មីៗពី បណ្ដាញសារព័ត៌មានសេដ្ឋកិច្ចដ៏ល្បី Bloomberg ដោយបានរាយការណ៍ថា Apple កំពុងតែរចនាឡានអគ្គិសនី និងមានបំណងផលិតឡានបើកបរដោយស្វ័យប្រវត្តិដ៏ពេញលេញដែលក្រុមហ៊ុនដទៃពិបាកសម្រេចបាន។

អ្នកវិនិយោគគិន (អ្នកជួញដូរភាគហ៊ុន) ហាក់មិនមានការងឿងឆ្ងល់ទេ ឬក៏សង្ស័យអីច្រើនពី Apple ដែលនឹងហក់ចូលទៅទីផ្សាររថយន្តអគ្គិសនីនោះទេ គឺពួកគេមានការជឿជាក់ខ្លាំងទៅលើក្រុមហ៊ុនមួយនេះ។

ប៉ុន្ដែយ៉ាងណាក៏ដោយ គម្រោងដ៏ធំនេះ វាមិនទាន់សម្រេចបានភ្លាមៗនោះទេ ដែលមានការរំពឹងទុកថានឹងសម្រេចបាន នាឆ្នាំ២០២៥ ខាងមុខ៕