រថយន្តភីកអាប់ថ្មីរបស់ Chevrolet នឹងមានដំបូលទាំងមូលជាកញ្ចក់សុទ្ធ

2021-10-19 03:05:10
ផលិតផលថ្មី

2021-10-19 03:05:10
ចំនួនមតិ 0 | ចំនួនចែករំលែក 0

ចន្លោះមិនឃើញ

Chevrolet បានបញ្ចេញវីដេអូ Teaser ខ្លីមួយបង្ហើបពីរថយន្តភីកអាប់ថ្មីរបស់ខ្លួនដែលដំបូលរថយន្តគឺជាកញ្ចក់សុទ្ធ ដែលក្រុមហ៊ុនផលិតរថយន្តអាមេរិកនេះ អះអាងថា នឹងផ្តល់បទពិសោធន៍ និងអារម្មណ៍ថ្មីដល់អ្នកបើកបរ និងអ្នករួមដំណើរអង្គុយខាងមុខ និងក្រោយ អាចមើលឃើញទិដ្ឋភាពខាងលើបានយ៉ាងធំស្រលះ។

ដំបូលកញ្ចក់នេះ ត្រូវបានគេជឿជាក់ថា នឹងបំពាក់នៅលើរថយន្តម៉ូដែល Silverado EV ដែល Chevrolet គ្រោងនឹងដាក់បង្ហាញក្នុងព្រឹត្តិការណ៍ CES នៅក្រុង Las Vegas នាដើមខែមករា ឆ្នាំ២០២២ខាងមុខ។ រថយន្តនេះក៏ត្រូវរំពឹងដែរថា ជាគូប្រជែងនឹង F-150 Lightning របស់ Ford។

បើតាមការបង្ហាញក្នុងវីដេអូនោះ គឺគេអាចមើលឃើញធ្លុះពីលើដំបូលកញ្ចក់រថយន្តនូវមនុស្ស ២នាក់ដែលជាអ្នកបើកបរ និងអ្នករួមដំណើរម្នាក់។ ក្នុងនោះអ្នកបើកបរ កំពុងចុចលើអេក្រង់ឌីជីថលរាងកោង ដែលប្រវែងវាលាតដល់ ២ភាគ៣ នៃផ្ទៃតាប្លូ។

គួរដឹងថា Silverado ជាប្រភេទរថយន្តអគ្គិសនី ដែលសាកភ្លើងពេញម្តងអាចបើកដល់ចម្ងាយ ៦៤៤គីឡូម៉ែត្រ។ វាបំពាក់មកជាមួយបច្ចេកវិទ្យាដែលអាចបង្វិលកង់បានខ្លាំងដូច Hummer EV ដែរ ពោលគឺងាយស្រួលក្នុងការបត់ឆ្វេង បត់ស្តាំ ឬបើកបរលើផ្លូវកោង និងរង្វង់មូលជាដើម។