ទម្រាំច្នៃចេញ Flying Car ឲ្យវាហោះរួចចុះដីក្លាយជាឡានវិញ ចង់ដឹងទេថាចាយលុយអស់ប៉ុន្មានលានដុល្លារ?

2021-07-05 03:09:12
ព័ត៌មាន

2021-07-05 03:09:12
ចំនួនមតិ 0 | ចំនួនចែករំលែក 0

ចន្លោះមិនឃើញ

បើយោងទៅលើប្រភពច្បាស់ការពីគេហទំព័រ Klein-vision រំលេចឲ្យដឹងនូវទំហំចំណាយក្នុងការច្នៃចេញជា Flying Car ដ៏ល្បីល្បាញបន្ទាប់ពីហោះសាកល្បងជោគជ័យយ៉ាងត្រចះត្រចង់។

ស្ថាបនិកលោក Stefan Klein ជនជាតិស្លូវ៉ាគីនិងសហស្ថាបនិកមួយរូបទៀត បានប្រាប់សារព័ត៌មានថា៖ «បើគិតសរុបទាំងទាំងការឌីហ្សាញផលិតគ្រោងឆ្អឹងទាំងមូល និងពេលឲ្យវាហោះរួចចុះដី ក្លាយជាឡានវិញនេះ លោកចំណាយពេល ២ ឆ្នាំចាយអស់តែ ២ លានដុល្លារអាមេរិកប៉ុណ្ណោះ។» លោកបន្ថែមទៀតថា បើតាមគម្រោងវាអស់ច្រើនជាងនេះ តែដោយសារពួកយើងច្នៃវត្ថុដែលមានស្រាប់ខ្លះ ដូចនេះវាកាត់បន្ថយចំណាយបានខ្លះដែរ។

ស្ថាបនិកលោក Stefan Klein ជនជាតិស្លូវ៉ាគី

រីឯអ្នកស្រាវជ្រាវផ្នែកសេដ្ឋកិច្ចបច្ចេកវិទ្យា Morgan Stanley លើកឡើងដោយសុទិដ្ឋិនិយមថា៖ «ឡានហោះ ឬយានយន្តហោះហើរស្វ័យប្រវត្តិនឹងលេចរូបរាងឡើងច្បាស់ៗក្នុងជំនាន់យើងនៅសតវត្សទី ២១ នេះឯង។ វាលែងស្ថិតក្នុងក្តីស្រម៉ៃ ឬខ្សែភាពយន្ត ឬក្នុងសៀវភៅបែបវិទ្យាសាស្ត្រមាន Hero(Comic books) ទៀតហើយ។ តទៅថ្ងៃមុខតម្លៃទីផ្សារវិនិយោគ Flying Car ប្រភេទនេះវាអាចនឹងកើនឡើងតម្លៃខ្ទង់ ១,៥ ទ្រីលាន ក្នុងឆ្នាំ ២០២៤ ។»

ឡាននេះបំពាក់ម៉ាស៊ីនរថយន្ត BMW ប្រើសាំងសុទ្ធ អាចហោះបានកម្ពស់ ២៥០០ ម៉ែត្រចម្ងាយ ១០០០ គីឡូម៉ែត្រក្នុងល្បឿនលឿនបំផុត ១៧០ គីឡូម៉ែត្រក្នុងមួយម៉ោង និងអាចសំកាំងលើអាកាសបាន ៤០ ម៉ោងដូចយន្តហោះខ្នាតតូច។

ព្រោះវាមានរូបរាងជាឡាន ពេលចង់ហោះត្រូវការពេល ២ នាទីដើម្បីពន្លារស្លាបនិងកង្ហារឲ្យវិលជក់ មុននឹងអាចរត់ឡើងលើអាកាស។ លុះដល់ពេលចុះមកដីវិញ ក៏ត្រូវការពេល២នាទីដើម្បីបត់ស្លាបចូលគ្នា រួចជាន់ហ្គែរបើកដូចឡានធម្មតាទូទៅវិញ។ ឡាននេះធ្វើតេស្តច្រើនលើកច្រើនសារមកហើយ ទើបតែម្ដងនេះ ហ៊ានហោះខ្ពស់ហើយអាចសំកាំងយូរជាងរាល់ដង ដោយបញ្ចប់ការហោះសាកល្បងរយៈពេល ៣០ នាទីសំកាំងកាត់លើអាកាសយានដ្ឋានចំនួនពីរគឺ Nitra និង Bratislava ប្រទេសស្លូវ៉ាគី។

រំឮកផងដែរថា ស្នាដៃបង្កើតថ្មី(Innovations) ដ៏លេចធ្លោរបស់ស្ថាបនិកខាងលើនេះគឺ Flying Car នេះឯង។ ដោយឡែកលោកក៏នៅមានស្នាដៃផ្សេងៗទៀតដែលក្រុមការងារ Sabay នឹងចុះផ្សាយជូននៅលេខបន្ទាប់៕