អ្នកដំឡើងកាស AirPods Pro នៅវៀតណាម បានប្រាក់ខែប៉ុន្មាន?

2021-04-14 01:33:00
ព័ត៌មាន

2021-04-14 01:33:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីអំឡុងដើមឆ្នាំ ២០២០ ក្រុមហ៊ុន Apple បានចាប់ផ្ដើមការដំឡើងកាសឥតខ្សែ AirPods Pro របស់ខ្លួននៅក្រៅប្រទេសចិនជាលើកដំបូង គឺនៅរោងចក្រប្រទេសវៀតណាម។

បើតាមការចុះផ្សាយរបស់ The Information ក្រុមហ៊ុនដែលជាដៃគូរបស់ Apple នៅប្រទេសវៀតណាម អាចជាក្រុមហ៊ុន Goertek និង Luxshare-ICT។ Luxshare-ICT អាចជាក្រុមហ៊ុនដំបូងដែលចាប់ផ្ដើមការដំឡើងកាស AirPods Pro ឲ្យ Apple។

Luxshare-ICT មានរោងចក្រចំនួនបីកន្លែងនៅប្រទេសវៀតណាម ដែលមានទីតាំងនៅខេត្ត Bac Giang, ខេត្ត Bac Ninh និងខេត្ត Nghe An។ កាលពីដើមឆ្នាំ ២០២០ ក្រុមហ៊ុននេះបានបើកជ្រើសរើសបុគ្គលិកជាង ១២ ០០០ នាក់ ហើយពេលនេះនៅតែបន្តស្វែងរកសម្រាប់បំពេញនូវសង្វាក់ផលិតកម្មរបស់ខ្លួន។

បុគ្គលិកធ្វើការនៅរោងចក្ររបស់ Luxshare-ICT បានប្រាប់សារព័ត៌មានវៀតណាម Zing ឲ្យដឹងថា ក្នុងមួយខែគេអាចទទួលបានប្រាក់ខែលើសពី ១០ លានដុង (ប្រមាណ ៤២៨ដុល្លារ)។ បុគ្គលិកនៅរោងចក្រមានថ្ងៃធ្វើការ ២៦ថ្ងៃក្នុងមួយខែ និងមានថ្ងៃឈប់ ៤ថ្ងៃ (ថ្ងៃអាទិត្យ)។ ពួកគេទទួលបានប្រាក់ខែគោល ៤,៨លានដុង (ប្រមាណ ២០៥ដុល្លារ) ប៉ុន្តែបើធ្វើការថែមម៉ោងនាពេលយប់ ១-២ម៉ោងជារៀងរាល់ថ្ងៃ និងថែមម៉ោងរាល់ថ្ងៃអាទិត្យ បូកនឹងធ្វើការនៅថ្ងៃបុណ្យឈប់សម្រាក អាចឲ្យពួកគេបានប្រាក់ខែសរុបជាង ១០លានដុង។

Luxshare-ICT ជាក្រុមហ៊ុនដែលមានមូលដ្ឋាននៅទីក្រុង Shenzhen ប្រទេសចិន ដែលបើកដំណើរការនៅឆ្នាំ ២០០៤។ អ្នកបង្កើតក្រុមហ៊ុននេះគឺអ្នកស្រី Grace Wang ដែលធ្លាប់ជាបុគ្គលិកដំបូងៗរបស់ក្រុមហ៊ុន Foxconn។ ត្បិតថាមានអាយុកាលតិចមែន ប៉ុន្តែ Luxshare-ICT បានពង្រីកខ្លួនពីក្រុមហ៊ុនផលិតគ្រឿងបន្លាស់តូច ក្លាយជាក្រុមហ៊ុនធំ មានអតិថិជនធំៗជាច្រើនដូចជា Apple, Huawei, OPPO, vivo និង Tesla ផងដែរ៕

ប្រភព៖ Zing ប្រែសម្រួល៖ សុខហេង