Elon Musk ជឿជាក់ថា ចិន នឹងក្លាយជាទីផ្សារធំបំផុតសម្រាប់លក់រថយន្ត Tesla

2021-04-05 02:43:32
ព័ត៌មាន

2021-04-05 02:43:32
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Elon Musk នាយកប្រតិបត្តិនៃក្រុមហ៊ុនផលិតរថយន្តអគ្គិសនី Tesla បាននិយាយថា៖ “ចិន នឹងក្លាយជាទីផ្សារធំបំផុតសម្រាប់លក់រថយន្ត Tesla។ ចិន មានទស្សនវិស័យវែងឆ្ងាយ។ អ្វីដែលទាក់ចិត្តលោកបំផុតនោះគឺផែនការ ៥ ឆ្នាំរបស់ប្រទេសចិន លើកិច្ចការពង្រឹងថាមពលកកើតឡើងវិញ និងការប្ដេជ្ញាចិត្តខ្ពស់លើការកាត់បន្ថយការបំពុលដោយសារធាតុកាបូនឲ្យធ្លាក់នៅកម្រិតទាបបំផុត។”

លោកបន្ថែមទៀតថា នេះគឺជាជំហានបន្ទាប់ដ៏ធំមួយក្នុងទីផ្សាររថយន្តអគ្គិសនី។ ចិន នឹងក្លាយជាប្រទេសមហាអំណាចសេដ្ឋកិច្ចនៅរយៈពេល១០ឆ្នាំទៅមុខទៀត។ ថ្ងៃអនាគតទាំងអតិថិជន(ប្រជាជន) និងរថយន្តចិន នឹងមានសន្ទុះព្រមគ្នាតែម្ដង។នេះការលើកឡើងជូនដល់សារព័ត៌មានចិនជាភាសាអង់គ្លេស CGTN ក្នុងកម្មវិធី China Development Forum ។

Elon Musk នាយកប្រតិបត្តិក្រុមហ៊ុនរថយន្តអគ្គិសនី Tesla

ការថ្លែងដោយទំនុកចិត្តបែបនេះក៏ដោយសារក្រុមហ៊ុនរថយន្ត Tesla មានវត្តមានក្នុងទីផ្សារស្រុកចិនតាំងពីឆ្នាំ ២០១៣ មកម្ល៉េះដោយទទួលបានការគាំទ្រពីសំណាក់ប្រជាជនចិនច្រើនគួរសម។ ដោយឡែកថ្មីៗនេះ Tesla ក៏ទើបនឹងសាងសង់រួចរាល់នូវរោងចក្រផលិតអាគុយរថយន្តអគ្គិសនីដ៏ធំសម្បើមមួយទៀតឈ្មោះថា Tesla Gigafactory 3 នៅជាយទីក្រុងសៀងហៃ ដែលជារោងចក្រទី៣ នៅក្នុងប្រទេសចិន។

Tesla Gigafactory 3

រំឭកផងដែរថា ត្រឹមតែខែមករាដើមឆ្នាំ ២០២១ ទីផ្សាររថយន្តអគ្គិសនីនៅចិន លក់ចេញបានចំនួន ១៥៤៨៤ គ្រឿង រីឯខែកុម្ភៈលក់ចេញបានចំនួន ១៨២១៨ គ្រឿង(ជាង២ម៉ឺន) និងកំពុងកើនឡើងបន្តទៀត បន្ទាប់ពីទទួលបានការគាំទ្រលើកទឹកយ៉ាងសម្បើមពីសំណាក់រដ្ឋាភិបាលចិន ដែលទើបនឹងចាក់បញ្ចូលទឹកប្រាក់វិនិយោគជាង ៦០ លានដុល្លារបន្ថែមដើម្បីជំរុញឲ្យពលរដ្ឋប្រើប្រាស់រថយន្តបៃតង(អគ្គិសនី) កាន់តែច្រើនឡើងថែមទៀត។

ក្រៅពី Tesla គេសង្កេតឃើញថានៅមានក្រុមហ៊ុនក្នុងស្រុកផលិតបានរថយន្តអគ្គិសនីតម្លៃសមរម្យ ជាច្រើនម៉ាកយីហាកំពុងប្រជែងជាមួយ Tesla មានដូចជា Nio, Li Auto និង Xpeng ជាដើម៕

ទស្សនាវីដេអូខាងក្រោម៖