- 2021-03-15 06:09:31
- ព័ត៌មាន
អតីតសិស្ស IT ឡី កំថូង ឃើញឱកាសមាសហើយប្រឹងប្រែងរហូតចាប់បានក្តីស្រមៃលើវិស័យបច្ចេកវិទ្យា
- 2021-03-15 06:09:31
- ចំនួនមតិ 0 | ចំនួនចែករំលែក 0
អតីតសិស្ស IT ឡី កំថូង ឃើញឱកាសមាសហើយប្រឹងប្រែងរហូតចាប់បានក្តីស្រមៃលើវិស័យបច្ចេកវិទ្យា
ចន្លោះមិនឃើញ
ឡី កំថូង ជាឈ្មោះស្ថាបនិក PAPA Deliver ដែលជាបច្ចេកវិទ្យាមួយនៅលើកម្មវិធីទូរសព្ទដៃទំនើប សម្រាប់ផ្តល់ភាពងាយស្រួលក្នុងការស្វែងរកសេវាកម្មដឹកជញ្ជូននៅក្នុងប្រទេសកម្ពុជា។ មុននឹងឈានដល់ចំណុចនេះ យុវជនមានស្រុកកំណើតមកពីខេត្តអ្នកបន្ទាយមានជ័យ បានដាក់ចិត្តនិងប្រឹងប្រែងជាខ្លាំងលើវិស័យបច្ចេកវិទ្យា។
ត្រឡប់ទៅកាលប៉ុន្មានឆ្នាំមុន ដោយមានចិត្តស្រលាញ់ជំនាញសរសេរកម្មវិធី កំថូង បានជ្រើសយកសាកលវិទ្យាល័យន័រតុន ហើយផ្តោតចិត្តខ្លាំងលើ រៀនជំនាញអភិវឌ្ឍន៍កម្មវិធី ឬ Software Development? កំថូង ប្រាប់ថា កត្តាដែលធ្វើឱ្យគេជ្រើសរើសផ្នែក Software Development ព្រោះមើលឃើញការរីកចម្រើននៃបច្ចេកវិទ្យា។ ម្យ៉ាងវិញទៀត គេក៏មានគោលបំណងចង់ក្លាយខ្លួនជា អ្នកបង្កើតប្រព័ន្ធគ្រប់គ្រងទិន្នន័យ គេហទំព័រ និងកម្មវិធីទូរសព្ទដៃជាដើម។
ក្នុងពេលសិក្សា កំថូង ធ្លាប់ទទួលបានពានរង្វាន់លេខ ៣ ក្នុងការប្រកួតប្រជែងផ្នែកព័ត៌មានវិទ្យាលើកទី ១២ ក្នុងសកលវិទ្យាល័យន័រតុន និងមេដាយប្រាក់ ពីប្រទេសម៉ាឡេស៊ីក្នុងការប្រកួតប្រជែងអន្តរជាតិ i-ENVEX ។ រូបគេក៏ជាអតីតសិស្សរបស់ថ្នាក់បណ្តុះបណ្តាលបច្ចេកវិទ្យាអាន-ANT(ANT Technology Training Center)តាំងពីឆ្នាំ ២០១៣ មកម្លេះ។
ដោយសារការខិតខំប្រឹងប្រែង កំថូង ក៏បានជាប់ទៅបន្តការសិក្សាជំនាញអភិវឌ្ឍន៍កម្មវិធីទូរសព្ទដៃ PG Diploma Mobile Computing នៅមជ្ឍមណ្ឌលបណ្តុះបណ្តាលបច្ចេកវិទ្យាជាន់ខ្ពស់ Centre for Development of Advanced Computing (C-DAC) នៅទីក្រុង Pune ប្រទេសឥណ្ឌា និងជាប់បានទៅធ្វើការផ្នែកស្រាវជ្រាវបច្ចេកវិទ្យាក្នុងវិទ្យាស្ថានជាតិ NICT ប្រទេសជប៉ុន កាលពីឆ្នាំ ២០១៧ ។
ពេលសួរថា តើ កំថូង យល់យ៉ាងណាដែរ ក្រោយបានធ្វើការនៅជប៉ុន?
អតីតសិស្សវិទ្យាល័យ មង្គលបូរី លើកឡើងថា៖ "ខ្ញុំពិតជាសប្បាយចិត្តខ្លាំងណាស់ ដែលបានមកធ្វើការ និងយកបទពិសោធន៍នៅជប៉ុន ប៉ុន្តែមិនទាន់គ្រប់គ្រាន់ទេសម្រាប់ខ្ញុំ។ ពេលខ្ញុំនៅក្នុងប្រទេសអភិវឌ្ឍន៍មួយនេះទើបដឹងថា ខ្ញុំនៅមានចំណុចខ្វះខាតច្រើន ដែលតម្រូវឲ្យខ្ញុំស្វែងយល់ និងរៀនសូត្របន្ថែមទៀត"។
មូលហេតុដែលបានធ្វើការនៅជប៉ុន
កំថូង ប្រាប់ថា បន្ទាប់ពីបានឃើញមានការជ្រើសរើសបេក្ខជន ទៅធ្វើការនៅប្រទេសជប៉ុន ទើបគេបានចាប់ផ្តើមសិក្សាសមត្ថភាពខ្លួនឯង និងសម្រេចចិត្តចូលរួមប្រកួតប្រជែងដើម្បីមានសិទ្ធិទៅធ្វើការនៅប្រទេសខ្លាំងផ្នែកបច្ចេកវិទ្យានេះ។
យុវជនរូបនេះប្រាប់ថា មុនបានទៅធ្វើការ គេទាមទារចំណេះផ្នែក Programming, ត្រូវបញ្ចប់ការសិក្សាផ្នែកព័ត៌មានវិទ្យា(Computer Science), ត្រូវឆ្លងកាត់ការសម្ភាសន៍ផ្ទាល់ ហើយចាំបាច់ត្រូវចេះភាសាអង់គ្លេស ឬភាសាជប៉ុន។
នៅប្រទេសជប៉ុន លោកបានរៀនពីបច្ចេកវិទ្យាថ្មីៗ ដែលពិភពលោកកំពុងត្រូវការ។ លើសពីនេះ ក៏បានយល់ដឹងអំពីបែបបទនៃការងារ ទំនៀមទម្លាប់ ប្រពៃណី និងបានរាប់អានស្គាល់មិត្តភ័ក្ដិច្រើន ដែលសុទ្ធសឹងតែជាអ្នកស្រាវជ្រាវបច្ចេកវិទ្យា ដូចជា មកពីវៀតណាម មីយ៉ាន់ម៉ា ចិន និងអឺរ៉ុបជាដើម។
ទាក់ទងបទពិសោធន៍ឆ្លងកាត់ទាំងជីវិតការងារ និងការសិក្សា ឡី កំថូង ប្រាប់ថា ការចង់សម្រេចអ្វីមួយ មិនមែនធ្វើមួយថ្ងៃ ឬពីរថ្ងៃនោះទេ ពោលគឺត្រូវព្យាយាមតស៊ូ ទើបរឿងល្អៗអាចកើតឡើងនិងសម្រេចជោគជ័យ។
"ក្នុងន័យនេះខ្ញុំចង់បញ្ជាក់ថា ការរៀនមិនពូកែនៅវិទ្យាល័យ មិនប្រាកដថា យើងខ្សោយនៅមហាវិទ្យាល័យនោះទេ អ្វីដែលសំខាន់យើងត្រូវមានគោលដៅច្បាស់លាស់ និងការខិតខំប្រឹងប្រែង"។
បទពិសោធន៍ការងារ
កំថូង បានចាប់ផ្តើមអាជីពការងារជាអ្នកអភិវឌ្ឍន៍កម្មវិធី (Software Developer) តាំងពីឆ្នាំ២០១៤ នៅក្នុងប្រទេសកម្ពុជា។ ឆ្នាំ២០១៧ គាត់បានទៅធ្វើការផ្នែកស្រាវជ្រាវបច្ចេកវិទ្យា ក្នុងវិទ្យាស្ថានជាតិ NICT ប្រទេសជប៉ុន អស់រយៈពេលមួយឆ្នាំ។ មកដល់ប្រទេសកម្ពុជាវិញមិនយូរប៉ុន្មាន កំថូងបានទទួលមេដាយមាសពីកម្មវិធី i2CreaTE 2019 នៅប្រទេសម៉ាឡេស៊ី និងបន្តទទួលបានពាន់រង្វាន់ពីកម្មវិធី ITE 2019 នៅប្រទេសអង់គ្លេសថែមទៀត។ ការងារចុងក្រោយរបស់គេគឺជាប្រធានគ្រប់គ្រងគម្រោង (Project Manager) នៅក្រុមហ៊ុន Cellcard យ៉ាងណាមិញ យុវជនខេត្តបន្ទាយមានជ័យរូបនេះ បានសម្រេចចិត្តបោះបង់ប្រាក់ខែដែលទទួលបានក្បែរ ២ពាន់ដុល្លារដើម្បីមកសម្រេចក្តីស្រមៃរបស់ខ្លួនក្នុងការចាប់ផ្តើមអាជីវកម្មមួយនៅលើវិស័យបច្ចេកវិទ្យា។ ពេលនេះ កំថូង ក្លាយជាសាស្ត្រាចារ្យនៅក្នុងសាកលវិទ្យាល័យពុទ្ធិសាស្រ្ត ។
គោលដៅនៅថ្ងៃអនាគត
កំថូង បានប្រាប់គោលបំណងចង់ពង្រឹងនិងពង្រីកការអប់រំផ្នែកបច្ចេកវិទ្យា ព្រមទាំងចែករំលែកបទពិសោធន៍និងជំនាញដែលលោកបានរៀនទាំងក្នុង និងក្រៅប្រទេស ដល់យុវជនជំនាន់ក្រោយ។
ថ្ងៃអនាគត កំថូងចង់ឃើញប្អូនៗជំនាន់ក្រោយដែលជាអ្នករៀនបច្ចេកវិទ្យា អាចបង្កើតនូវដំណោះស្រាយថ្មីៗជាច្រើន ដើម្បីជួយដោះស្រាយបញ្ហាប្រឈមនៅក្នុងប្រទេស និងក្នុងពិភពលោក។ លើសពីនេះទៀត ចង់ឃើញកូនខ្មែរយើងអាចនាំយកបច្ចេកវិទ្យារបស់ខ្លួន ដាក់ឲ្យដំណើរការតាមបណ្តាប្រទេសផ្សេងទៀតនៅក្នងតំបន់អេស៊ាផងដែរ។
កត្តាដែលធ្វើឲ្យ កំថូង ទទួលលទ្ធផលល្អដូចសព្វថ្ងៃនេះគឺ៖
-បោះចោលពាក្យថា “ពិបាក” បើយើងនិយាយពាក្យថាពិបាក នោះវានឹងក្លាយទៅជាការរាំងស្ទះនៅសមត្ថភាពរបស់ពួកយើងភ្លាម
-បោះចោលពាក្យថា “ធ្វើមិនកើត” នៅពេលដែលយើងនិយានពាក្យថាធ្វើមិនកើត វានឹងក្លាយទៅជាការរារាំងនូវការយល់ដឹង ឬក៏ជាការបណ្តេញខ្លួនឯងចេញពីអ្វីដែលខ្លួនឯងកំពុងធ្វើ មិនអាចឲ្យយើងទទួលបានជោគជ័យ
-បោះចោលពាក្យថា “អស់សង្ឃឹម” ពាក្យនេះជាមេរោគមិនអាចឲ្យយើងរីកចម្រើនបានទេ
-បោះចោលពាក្យថា “ខ្ជិល” ឱកាសគឺគ្មានទេសម្រាប់អ្នកដែលខ្ជិល
-បោះចោលពាក្យថា “ហត់នឿយ” នៅពេលដែលអ្នកនិយាយមកកាន់ខ្លួនឯងថា ហត់នឿយ ពេលនោះវាធ្វើឲ្យខ្លួនឯងកាន់តែមានភាពទន់ខ្សោយ និងភាពទន់ជ្រាយបន្ថែមទៀត។
បច្ចុប្បន្ន យុវជនឆ្នើមខាងលើបានក្លាយខ្លួនទៅជាអគ្គនាយករបស់ក្រុមហ៊ុន អេស៊ា អិល & អ៊ី ឯ.ក (AISA L & E CO., LTD.) គឺជាក្រុមហ៊ុនបច្ចេកវិទ្យាមួយក្នុងប្រទេសកម្ពុជា ដែលផ្តោតសំខាន់នៅលើវិស័យចំនួន២រួមមានវិស័យដឹកជញ្ជូន និងពាណិជ្ជកម្មតាមប្រព័ន្ធអេឡិចត្រូនិច (e-Commerce)។ ប្រសិនចាំអារម្មណ៍ក្នុងការសហការជាមួយ PAPA Deliver អាចទំនាក់ទំនងតាម 010 562019 / 095 562019 ៕